1 Urana u ro a̱vu Abimele ulobo wa̱ Jeru Ba'al, u 'ya̱wa̱ Shekem uba̱ta̱ wi imaci ya mma va̱ yi a̱vu u damma le oɓolo nu ugundo wa mma va̱ yi suru, 2 <<N te ipati i ɗu, i pati azagbain a Shekem, i damma le, <Ili i ne i ɗa i la'aa nɗu ulobonu, a damma olobo a Jeru Ba'al kupocindere suru a yuwan tsugbain tsa̱ ɗu ko a damma vuma ta̱ yuwan tsugbain tsa̱ ɗu?> Agba i cuwan a̱mu lipu na̱ mpasa n ɗu n ɗa.>>

3 A̱vu a̱za̱ o ugundo wa mma va Abimele a̱ ka̱mbuwa̱ azagbain a Shekem na adanshi a nda. Ɗaɗa okolo a azagbain a̱ ka̱mba̱i uba̱ta̱ wa Abimele reve a damma, <<A̱yi za tsu ɗa.>> 4 A̱vu a ca yi azurufa kupocindere diga a̱tsuma̱ o u'wa u ma̱sula̱ ma Ba'al Beri za na Abimele yuwayin ulinga u kopoi a̱za̱ o ugbawu ama a vama ne ele, reve ele gba a̱ kuru yi. 5 A̱vu u 'ya̱wa̱ o u'wa wa dada va̱ yi a Ofura a̱vu wu una a̱za̱ a̱ yi kupocindere zuva va aatali a̱ ta̱, olobo a Jeru Ba'al. Amma Jotam ulobo wu ukosu wa Jeru Ba'al, u la'a ta̱ adama a na u sokoyi aciya̱yi. 6 A̱vu azagbain a Shekem na aza a Bet Milo suru o ɓoloto zuzu nu uɗanga wo Oku uba̱ta̱ wa aatali a gbain a̱tsuma̱ a Shekem adama a katala Abimele mogono.

7 Ana a dammai Jotam aɗa a nda, a̱vu u kumba a̱ ncilecile m Masasan ma Gerizim a̱vu u saala le, <<I zuwaa mu atsuvu a̱ɗu azagbain a Shekem, adama A̱sula̱ o poloo ɗu atsuvu. 8 Urana u ro ɗanga vu uta̱ ta̱ tsa̱ra̱ a katalaa aciyele mogono. A̱vu a damma uɗanga u zetun, <Voo o'wo tsu mogono.> >>

9 <<Reve uɗanga u zetun u usu, <Mi icina na̱ mani'in ma na maa casu, uba̱ta̱ u na musula̱ na ama suru a̱ tsu tsura̱ tsugbain, a̱vu n 'ya̱wa̱ n reme mpolo na̱ ɗanga?>

10 <<A̱vu ɗanga'a a damma uɗanga wu ubiri, <Ta̱wa̱ vo o'wo tsu mogono.>

11 <<Agba a̱vu uɗanga wu ubiri u usu, <N lyawa a casu muwun mu uɗanga n va̱, aza a na a̱ ri ulobonu na̱ a̱limu, a̱vu n ta̱wa̱ n reme mpolo na̱ ɗanga?>

12 <<A̱vu ɗanga damma ataci, <Ta̱wa̱ vo o'wo tsu mogono.>

13 <<A̱vu ataci a̱ usu, <N lyawa masayan ma sa'avu ma̱ va̱, za na aa casu musula̱ na ama ma̱za̱nga̱, a̱vu n ta̱wa̱ n reme mpolo na̱ ɗanga?>

14 <<A̱ tyo o ukosu, a̱vu ɗanga suru a damma awanda o una, <Ta̱wa̱ vo o'wo tsu mogono.>

15 <<A̱vu awanda o una a damma ɗanga, <Ni i ciga ta̱ na amayun i katala mu mogono a aci a̱ ɗu, ta̱wa̱i i pa'an o ululu u va̱, na̱ ne ɗa shi, lyawa akina o uta̱ a̱tsuma̱ a awanda o una u kula̱to ɗanga sida va Lebanon.> >>

16 Ɗaɗa Jotam dammai, <<Gogo, i yuwan ta̱ mejege na amayun a na i katalai Abimele mogono ma̱ ɗu? To, i yuwaan ta̱ Jeru Ba'al nu umatsun wa̱ yi a̱ɓula̱? A̱yi ndolo ɗa atsupu o ulinga wa̱ yi? 17 I cuwan na dada va̱ yuwain uvon adama a̱ ɗu. U ca ta̱ wuma wa̱ yi adama u wawa ɗu e ekere aza a Midiya. 18 Amma ana'an gba a̱ɗu ɗa nda i vadalai a yuwusan nla̱ngi nu umatsun wa dada va̱. Reve yu una olobo a̱ yi kupocindere zuva va aatali a̱ ta̱. A̱vu i katala Abimele ulobo wa aagbashi o usheli, wo o'wo mogono ma aza a Shekem, adama a na a̱yi maci ɗu ɗa. 19 Gogo tsunda, ni ili i na i yuwayin Jeru Ba'al nu umatsun wa̱ yi mejege ma ɗa na amayun ana'an, to, i za̱nga̱na̱ oɓolo na̱ Abimele, a̱yi waru u yuwan ma̱za̱nga̱ oɓolo na̱ a̱ɗu! 20 Na̱ ne ɗa gba shi, lyawa akina o uta̱ uba̱ta̱ wa Abimele u lyuwa ɗu, azagbain a Shekem na̱ Bet Milo, lyawa akina o uta̱ uba̱ta̱ u ɗu, a̱ɗu aza a Shekem na̱ Bet Milo, u lyuwa Abimele!>>

21 A̱vu Jotam suma u la'a a̱ tyo Biya a̱vu u da̱nu ɗe, adama a na u ta uwwusa wovon u mawun ma̱ a̱sha̱wu ma̱ yi Abimele.

22 Abimele yuwan ta̱ a'wan a ta'atsu a yuwusan tsugbain tsa Isra'ila. 23 A̱vu A̱sula̱ a̱ ta̱wa̱ na̱ tsushu'un tsa vama e ekere a Abimele na azagbain a Shekem, a̱vu a̱ 'ya̱sa̱a̱n yi aci. 24 Ili i ndolo i fara ta̱ adama a tsupa wunu u na o unai olobo kupocindere a Jeru Ba'al, waru mpasa n le n da̱na̱ ta̱ a aci a Abimele na a aci a azagbain a Shekem aza a na a kamba niyi mona ma̱ a̱za̱ a̱ yi. 25 Reve azagbain a Shekem a zuwa ama a̱ vawan ɗe zuva vu nsasan, a̱vu a usa itana ya ama a na a̱ ri a̱ ka̱ra̱sa̱ le lo uba̱ta̱'a̱. A̱vu a̱ ka̱mbuwa̱ Abimele aɗa.

26 A̱vu Ga'al ulobo wa Ebe u uwa pe a̱tsuma̱ a̱ Shekem oɓolo ni imaci ya̱ yi, a̱vu azagbain a Shekem a zuwaa yi ucira. 27 Ana a̱ 'ya̱wa̱i o uɗuma̱, a̱vu o ɓoloto limatan va̱ ina̱bi, a̱vu o kpoko le, ɗaɗa a yuwain a̱buki a̱tsuma̱ o u'wa u ma̱sula̱ ma̱ le. A̱vu a lyuwa o sowo reve waru e isululai Abimele. 28 A̱vu Ga'al ulobo wa Ebe u damma, <<Zane ɗa Abimele, waru zane ɗa Shekem, a na tsa yuwaan yi tsugbashi? A̱yi ulobo wa Jeru Ba'al ɗa shi? Waru a̱yi Zebu kambi va̱ yi ɗa shi? Yuwayin ama a Hamo tsugbashi, dada va Shekem! Adama a̱ nye i ɗa tsaa yuwaan Abimele tsugbashi? 29 A damma ama a nda a̱ ta̱ za̱la̱ vu ucira u va̱, n shi ta̱ a tawa yi! N shi ta̱ a damma Abimele, <Vu da̱shi a̱bunda̱ a̱ a̱soja a̱ wu, reve vu uta̱ vu yuwan uvon.> >>

30 Ana Zebu zagbain lyuci'i wu uwwai ili i na Ga'al ulobo wa Ebe u dammai, u yuwan ta̱ upan lon. 31 Reve u lyunguwa̱ Abimele na̱ nlingata a̱ 'ya̱wa̱ Aruma, adansa, <<Amayun, Ga'al ulobo wa Ebe ni imaci ya̱ yi a̱ ta̱wa̱ ta̱ Shekem, waru a ta zuwusa a̱za̱ a̱ lyuci'i a̱ 'ya̱susa̱a̱n wu ugbozu. 32 Gogo she vu 'yon a̱tsuma̱ a ayin a nda, oɓolo na ali o uvon a̱ wu, i vawan a̱tsuma̱ a atsusa. 33 Reve nu usana, na̱ mota̱a̱ mo urana, vu reme uvon na̱ lyuci'i. Mantsa ma na Ga'al na ali o uvon a̱ yi o uta̱i tsa̱ra̱ a yuwan uvon na̱ a̱vu, reve vu yuwan ne ele ili i na ve enei u lobono ta̱.>>

34 Reve Abimele oɓolo na ali o uvon a̱ yi suru a̱ 'yon na ayin, a̱vu a vawan a̱tsuma̱ o ogozo zuzu na̱ Shekem oɓolo a̱ na̱shi. 35 A̱vu Ga'al ulobo wa Ebe u 'ya̱wa̱ wi isawan o u'uwata wu una̱ntsu u lyuci'i, reve gba Abimele oɓolo na aza a na a̱ da̱na̱i uvawun a̱tsuma̱ o ogozo o uta̱ pe.

36 Ana Ga'al enei ama'a, reve u damma Zebu, <<Ka̱lyuwa̱, ama a ɗa ndeɗe a̱ cipusa̱ zuva masasan!>> A̱vu Zebu damma yi, <<Vu ta tarasa lulu vu nsasan tsa ama.>>

37 A̱vu Ga'al yuwisan adanshi u damma, <<Ka̱lyuwa̱i ama a̱ ta̱ ɗe a̱ cipusa̱ e memere me iɗa, waru oɓolo a̱ ta̱ ɗe a̱ ta̱wusa̱ diga upasu wu uɗanga wo Oku wa̱ a̱za̱ a̱ yindi.>>

38 Reve Zebu damma yi, <<Gogo te ɗa gba ushitosun wu una̱ wa̱ wu, za na vu dammai, <Zane ɗa gba Abimele, ana tsaa yuwaan yi tsugbashi?> Ele ɗa ama a na vu tarai ili'i shi shi? Uta̱ vu yuwan nla̱ngi ne ele!>>

39 Reve Ga'al uwaa azagbain a Shekem elime, a̱vu a yuwan uvon na̱ Abimele. 40 A̱vu Abimele saɓa yi, a̱vu gba u suma, a̱vu a amaton ama na̱ a̱bunda̱ a̱vu a̱ riya̱, hali a̱ tyo o u'uwata wu una̱ntsu'u. 41 A̱vu Abimele da̱nu a̱tsuma̱ a Aruma, a̱vu Zebu gba̱ra̱ Ga'al na̱ a̱za̱ a̱ yi o uta̱ a̱tsuma̱ a Shekem.

42 Ana usana u tawai, ɗaɗa ama a Shekem a̱ ka̱ra̱i a̱ tyo a atsusa, a̱vu a̱ ka̱mbuwa̱ Abimele aɗa. 43 A̱vu u tara ali o uvon a̱ yi, a̱vu u ne'eshen le oɓolo a ta'atsu, a̱vu u zuwa le a vawan a̱tsuma̱ a atsusa. Ana we enei ama o utusa̱ a̱tsuma̱ a̱ lyuci'i, a̱vu Abimele uta̱ tsa̱ra̱ wu una le. 44 A̱vu Abimele no oɓolo a ama a̱ yi a̱ utushi, a̱vu gba e geshe u'uwata wu una̱ntsu u lyuci'i. A̱vu oɓolo e re a na a buwai o utushi a̱ riya̱a̱ ama'a nu uvon a̱tsuma̱ a atsusa'a, a̱vu o una nle. 45 A̱vu Abimele liva̱ a yuwusan uvon na̱ lyuci'i. Reve u usa lyuci'i, a̱vu wu una ama a̱ yi. Reve a̱ rukutsa̱ lyuci'i, a̱vu u kusha'wa yi akpaɗi.

46 Ana azagbain a atsura a Shekem suru a uwwai ne, a uwa ta̱ uba̱ta̱ wu ucira wa̱ a̱a̱'isa̱ wa El Beri. 47 Ana Abimele uwwai a na o ɓoloto ta̱ uba̱ta̱ u ta̱, 48 a̱vu u 'ya̱wa̱ zuva masasan ma̱ Zalumo oɓolo na ama a̱ yi suru. A̱vu Abimele tara aɓau, a̱vu wu koɗo eten a̱vu u sheɗe le u zuwa le a avangaci a̱ yi. A̱vu u damma ama a na a̱ ri oɓolo na̱ a̱yi, <<Ili i na ye ene numu a yuwusan, i jika̱ i yuwan yi fo!>> 49 A̱vu ama'a o koɗo eten ɗaɗa o toniyi Abimele, a̱vu o ɓoloto ete'en uba̱ta̱ wu ucira'a, reve a adaɓa yi akina za̱la̱ le. Ama a na o ɓolotoi uba̱ta̱ wu ukari wa Shekem'm, a ta yuwan ama ukpakukupa (1,000), ali na̱ a̱ma̱ci a̱vu a̱ kuwa̱.

50 A̱vu Abimele ka̱ra̱ a̱ 'ya̱wa̱ Tebe a̱vu a̱ va̱la̱ a̱ka̱nda̱ruwa̱ yi reve gba u usa yi. 51 Amma uba̱ta̱ wu ucira u ro u da̱na̱ ta̱ pe a̱tsuma̱ a̱ lyuci'i, a̱vu ali na̱ a̱ma̱ci suru na azagbain a̱ lyuci'i suru a suma a̱ tyo ɗe, reve a katsu pe aciyele. A̱vu a kumba a̱ tyo o ukwa̱'a̱ wa atsura'a. 52 A̱vu Abimele ta̱wa̱ uba̱ta̱ wa atsura'a tsa̱ra̱ u yuwan nla̱ngi na̱ a̱yi, reve u rawa zuzu nu u'uwata wa atsura'a adama u kula̱to yi na akina. 53 A̱vu ka ro vara Abimele na aakiri a yira a aaci, a̱vu mokkoto ma aaci ma̱ yi mo ɓoso.

54 A̱vu Abimele ɗeshi ulobo u na wa̱a̱ guzusa̱a̱ yi itana yu uvon, a̱vu u damma yi, <<Vu tala matsun me pe'eni ma̱ wu a̱vu vu una mu, adama a̱ ta̱wa̱ a damma <Ka ɗa vu una numu wan.> >> Ɗaɗa gba ulobo'o u sapai Abimele, reve u kuwa̱. 55 Ana ama a Isra'ila suru e enei Abimele ukwa̱ ta̱, reve suru nle a̱ ka̱mba̱ o u'wa.

56 Tsundolo tsa ɗa A̱sula̱ a̱ ka̱mbuwa̱yi Abimele ni iwuya i na u yuwayin dada va̱ yi, a na wu unai a̱za̱ a̱ yi ali kupocindere. 57 Tsundolo tsa ɗa waru A̱sula̱ a̱ ka̱mbuwa̱yi ama a Shekem ni iwuya i le. Una̱ u na Jotam ulobo wa Jeru Ba'al u yuwaan nle u reme le ta̱.