1 A yuwan ta̱ vuma ro e iɗa ya agaɗi ya Ifiramu, za na a̱ tsu ɗe Mika. 2 Reve u damma mma va̱ yi, <<Ele azurufa ukpakukupa nu ukpaku (1,100) na a tara nuwu i ɗa waru adama a za na mu uwwa nuwu a yuwusaan una̱, ikebe'e a̱ ta̱ uba̱ta̱ u va̱, a̱mu ɗa n tara nle.>>

A̱vu mma va̱ yi damma, <<A̱sulazuva a zuwaa wu aba'un ulobo u va̱!>>

3 Ana u ka̱mbuwa̱yi mma va̱ yi azurufa ukpakukupa nu ukpaku'u (1,100), reve mma va̱ yi damma, <<N ta casu azurufa nda e ekere a̱ A̱sulazuva o una̱ wu ulobo u va̱ adama ee she'en oroci a̱ a̱ma̱li suru na̱ azurufa. Gogo n ta̱ ka̱mbuwa̱a̱ wu a̱yi.>>

4 A̱vu u ka̱mbuwa̱ azurufa'a uba̱ta̱ wa mma va̱ yi, a̱vu mma va̱ yi tara azurufa ukpakure (200) a̱vu u ca maruma ma azurufa, za na she'ein oroci a̱ ma̱sula̱ reve u sura yi na̱ azurufa'a. A̱vu a zuwa yi o u'wa wa Mika.

5 Reve gba Mika tsura̱ a̱a̱'isa̱, a̱vu u yuwan epo oɓolo na̱ a̱ma̱li o ro, a̱vu u zuwa ulobo u ta̱ a̱tsuma̱ o olobo a̱ yi wo o'wo yi ganu. 6 *A rana ndolo aza a Isra'ila a̱ da̱na̱ na̱ mogono shi, za suru tsu yuwan ta̱ cine u cigai.

7 A yuwan ta̱ ulobo u ro za vu ugundo wa̱ Levi diga Batalami a̱tsuma̱ a Yahuda. 8 Ulobo'o u lyawa ta̱ lyuci va Batalami e izami yu uba̱ta̱ u na wa̱a̱ da̱nu. Reve a̱yi a̱tsuma̱ a mmalu, u rawa o u'wa wa Mika a̱tsuma̱ e iɗa ya agaɗi ya Ifiramu.

9 A̱vu Mika ece yi, <<Te ɗa vu uta̱i?>>

Reve u usu yi, <<A̱mu za va Levi ɗa diga Batalami a̱tsuma̱ a Yahuda, waru n te e izami yu uba̱ta̱ u na ma̱a̱ da̱nu.>>

10 A̱vu Mika damma yi, <<Isawan pa oɓolo na̱ a̱mu, voo o'wo mu dada na̱ ganu, n ta ca wu azurufa kupa a̱tsuma̱ a aa'wan, ni itana yu otosu ni ilyalya i malya.>> 11 A̱vu a̱yi za va Levi'i u usu u da̱nu oɓolo na̱ a̱yi. A̱vu wo o'wo tso ulobo wa̱ yi. 12 A̱vu Mika zuwa yi wo o'wo ganu va̱ yi, reve waru u da̱nu a̱tsuma̱ o u'wa wa̱ yi. 13 Ɗaɗa Mika tsu damma, <<Gogo tsunda n reve ta̱ A̱sulazuva a ta zuwa ili biti i wala mu mejege, adama a na za va Levi nda o'woi ganu va̱.>>