1 *A rana ndeɗe aza a Isra'ila a̱ da̱na̱ na̱ mogono shi. A yuwan ta̱ Levi ro za na da̱na̱i na̱ nden a̱ mpulu e iɗa ya aagaɗi ya Ifiramu, za na tarai ka vu nge'en adama a aciya̱yi a̱tsuma̱ a Batalami va Yahuda. 2 Agba ka'a u da̱na̱ na̱ a̱ɓula̱ e ekere a̱ yi shi. U lyawa ta̱ vali'i a̱vu u ka̱mba̱ o u'wa wa dada va̱ yi a̱tsuma̱ a Batalami va Yahuda. Reve u yuwan ɗe woto na̱shi. 3 A̱vu vali'i u 'ya̱wa̱ u ca yi adanshi tsa̱ra̱ u ka̱mba̱. U 'ya̱wa̱ ta̱ oɓolo na aagbashi a̱ yi na̱ nloli n re. Reve u tara vali'i a̱ tyo o u'wa wa dada va̱ yi, ana dada va̱ yi ene niyi, u raba yi ta̱ na̱ ma̱za̱nga̱. 4 A̱vu a̱sha̱wa̱le, dada vu usheli'i, u zuwa yi u da̱nu oɓolo ne ele hali u yuwan pe rana ta'atsu. Reve a lyuwa o sowo a̱vu wa asusa pe.

5 O urana wa̱ na̱shi, a̱vu a̱ 'yon na̱ wasasa a̱vu o foɓo adama a̱ ka̱ra̱, a̱vu dada vu usheli'i u damma toto va̱ yi, <<Vu lyuwa ili i ro adama vu tsura̱ ucira, a̱vu i ka̱ra̱.>> 6 A̱vu a̱ da̱nu ele ra a lyuwa o sowo oɓolo. A̱vu dada vu usheli'i u damma vali'i, <<Vu yuwan ankuri vu da̱shi asa pa tsa̱ra̱ vu uwwaa aciya̱wu uyo'o.>> 7 Ana toto'o u 'yoyin tsa̱ra̱ u ka̱ra̱, a̱vu a̱sha̱wa̱le a kpara yi wi isawan, a̱vu wa asisa ayin o ndolo. 8 O urana wa tawun na̱ wasasa, ana u 'yoyin tsa̱ra̱ u ka̱ra̱, a̱vu dada vu usheli'i u damma, <<Vu lyuwa ilyalya adama vu tsura̱ ucira hali urana u gaɗuwa.>> Ɗaɗa a lyuwai ilyalya ra.

9 Ana vali'i u 'yoyin adama u ka̱ra̱ a̱yi oɓolo na̱ ka vu nge'en va̱ yi na aagbashi a̱ yi, a̱vu dada vu usheli, a̱sha̱wa̱le, u damma, <<Ka̱lyuwa̱ gogo urana u koto ta̱. Va asisa pa, gogo ɗa usana waa tawa. Vi isawan vu uwwaa aciya̱wu uyo'o. Nfa'an nu usana usana a̱vu i ka̱ra̱ a̱ tyo o u'wa u ɗu.>> 10 Amma a̱yi gba vali'i a mantsa ma nda u ciga wa asisa shi. A̱vu u 'yon a̱vu u yuwan mmalu ma̱ yi. A̱vu u rawa Jebusiya za na a̱yi ɗa Urishelima, oɓolo na̱ nloli n re ma̱ yi aza a na a̱ ri na̱ rutsu vu nden na̱ ka vu nge'en va̱ yi.

11 Ana a rawai zuzu na̱ Jebusiya waru urana u cigai mokotoo, a̱vu aagbashi'i a damma zavu'wa va̱ yi, <<Yuwan ankuri, lyawa tsu ɓatsai a̱ lyuci va aza a Jebusiya tsa asai pe.>>

12 Ɗaɗa zagbain va̱ yi damma niyi, <<O'o, tsaa ɓatsa a̱ lyuci vo omocin shi, aza a na ama e le aza a Isra'ila a ɗa shi. Tsu ta̱ ka̱ra̱la̱i a̱ tyo Gibiya.>> 13 A̱vu u damma aagbashi a̱ yi, <<Lyawai tsu rawai zuzu na̱ ba̱ta̱ ndeɗe tsa̱ra̱ tsaa asai Gibiya ko Rama.>> 14 Ɗaɗa a lyuwai elime na̱ mmalu. Reve urana u koto le zuzu na̱ Gibiya upasu wi iɗa wa Banyami. 15 Lo ɗa a ɓatsai adama aa asa. A̱vu za va Levi'i u 'ya̱wa̱ u da̱nu a aagalaci a̱ lyuci'i, adama a na a̱ tsura̱ vuma na tara nle a̱ tyo o u'wa wa̱ yi aa asa shi.

16 Nu ulivu u ndolo aabara o ro a̱ shi ta̱ a̱ ka̱mba̱ diga o uɗuma̱. A̱yi za vi iɗa ya aagaɗi a Ifiramu ɗa, amma u da̱na̱ ta̱ na̱ nden Gibiya. Ama o uba̱ta̱'a̱ a̱za̱ o ugundo wa Banyami a ɗa. 17 Ana u 'ya̱sa̱in aaci reve we ene za vu mmalu'u a agalaci a̱tsuma̱ a̱ lyuci'i, reve aabara'a we ece, <<Te ɗa vee tyo? Te ɗa waru vu uta̱i?>>

18 Reve u usu, <<Tsu uta̱ ta̱ diga Batalami va Yahuda, tsu ta̱ tyo mpulu n ro vi iɗa ya agaɗi ya Ifiramu uba̱ta̱ u na n ri na̱ nde. N 'ya̱wa̱ ta̱ Batalami va Yahuda, gogo gba n ta̱ 'ya̱wa̱ o u'wa wa̱ A̱sulazuva. Ko vuma lyawa n cu'wan o u'wa wa̱ yi shi. 19 Tsu ta̱ na̱ tsu'yuwa̱ ni ilyalya yi nloli n tsu, tsu ta̱ waru no opopofu na̱ masayan ma̱ ina̱bi, adama a̱ va̱ aagbashi a̱ wu na aagbashi o usheli a̱ wu, nu ulobo u na u ri oɓolo na̱ a̱tsu. Ko ili i ta̱ tsu lamba shi.>>

20 A̱vu aabara'a u damma le, <<Asuvu a̱ wu a̱ da̱nu, n ta ca wu ili i na vaa ciga suru. Amma she vaa asa a agalaci a̱ lyuci wan.>> 21 Ɗaɗa u tara nle a̱ tyo o u'wa wa̱ yi, a̱vu u ca nloli n le ilyalya. Ana o kotoi masa'a ma ana me ele, reve a lyuwa o sowo oɓolo.

22 Ele pe a uwwusaa aciyele uyo'o, a̱vu ama a vama o ro a̱tsuma̱ lyuci'i a̱ ka̱nda̱ruwa̱ u'wa'a. A̱vu a̱ ka̱ra̱ a lapusa una̱ntsu, a̱vu waru a damma aabara'a za vu u'wa'a, <<Uta̱a̱ na̱ vuma na uwai o u'wa wa̱ wu, tsa̱ra̱ tsu yuwan tsipere na̱ a̱yi.>>

23 A̱vu za vu u'wa'a wu uta̱ a̱vu u damma le, <<Aa yuwan tsundolo shi, n'utsa̱ n va̱. She i yuwan iwuya tsunda wan. Adama a na vuma nda mocin va̱ ɗa, she i yuwan ili i wono tsunda wan. 24 Ka̱lyuwa̱i, apa usheli u va̱ za na koto revei vali shi, oɓolo na̱ ka vu nge'en va̱ yi. N ta̱ uta̱wa̱ ɗu ele a alanga gogo, i ta gura suɗato le, a̱vu waru i yuwan ili i na i cigai ne ele. Amma e ekere a vuma nda, she i yuwan cu'un vi ili i wono i nda wan.>>

25 Agba ama'a a zuwaa yi atsuvu shi. A̱vu vuma va̱ Levi'i u reme ka vu nge'en va̱ yi wu uta̱wa̱ le a alanga, a̱vu o von na̱ a̱yi babu ucigu wa̱ yi, reve waru a yuwan na̱ a̱yi ili i na a cigai a̱tsuma̱ a ayin o ndolo, usana a matawaa a̱vu a lyawa yi u ka̱ra̱. 26 Na̱ wasasa a̱vu ka'a u ta̱wa̱ u riya̱ e iɗa o una̱ntsu wu u'wa wa aabara'a uba̱ta̱ u na zagbain va̱ yi cu'wain, hali uba̱ta̱ u palu'wa.

27 Ana zagbain va̱ yi 'yoyin nu usana, a̱vu u kpa̱tu'wa̱ una̱ntsu wu u'wa'a a̱vu wu uta̱ tsa̱ra̱ u lyuwa elime na̱ mmalu ma̱ yi, a̱vu gba u cinishi ka'a nven, uriyu o una̱ntsu wu u'wa'a, ne ekere a̱ yi uzuwu o una̱ntsu. 28 A̱vu u damma yi, <<'Yon tsu wala!>> Agba u usu shi. A̱vu vali'i u zuwa yi o mololi ma̱ yi, a̱vu e reme mmalu a̱ ka̱mba̱ o u'wa.

29 Ana u rawai o u'wa, a̱vu u tara matsun a̱vu reme ka'a, a̱vu wu paɗa yi apaɗi apaɗi, hali ba̱ta̱ kupa ne ejere, a̱vu u lyunguwa̱ ugundo wa aza a a Isra'ila suru aapaɗi a̱ ta̱. 30 Za na ene niyi suru u damma ta̱, <<Koto a yuwan ko ene cu'un nda shi, diga urana u na aza a Isra'ila a lyawai iɗa i tsugbashi a Masar. I yuwan majiyan ma̱ yi! Yuwain a̱sa̱la̱ e ili i na i farai! A̱vu i damma tsu ili i na tsaa yuwan!>>