1 Japuta za va Giliyadu vuma gbain ɗa na gurai uvon. Giliyadu ɗa dada va̱ yi, amma mma va̱ yi aashakala a ɗa. 2 Ka va Giliyadu gba u matsaan yi ta̱ olobo, reve ana muwun mu ka'a n kungwai, a̱vu a̱ gba̱ra̱ Japuta, a damma yi, <<Va̱a̱ tsura̱ ko agadu e ili i ta̱ ya dada tsu shi, adama a na a̱vu mawun ma ka ro ma ɗa.>> 3 Reve Japuta suma diga uba̱ta̱ wa̱ a̱za̱ a̱ yi, reve u 'ya̱wa̱ u da̱nu e iɗa ya Tob, uba̱ta̱ u na iɓolo ya ama a vama o ɓolotoi uba̱ta̱ wa̱ yi, reve a̱ kurusu yi o uta̱.

4 Urana u ro, reve aza a Amon a̱ 'ya̱wa̱a̱ aza a Isra'ila nu uvon. 5 Reve ana aza a Amon a̱ 'ya̱wa̱yi aza a a Isra'ila nu uvon, reve mbara ma Giliyadu n 'ya̱wa̱ adama a̱ ta̱wa̱ na̱ Japuta diga e iɗa ya Tob. 6 Reve a damma Japuta, <<Ta̱wa̱ vu wala tsu elime tsura̱ tsu yuwan uvon na aza a Amon.>>

7 A̱vu Japuta damma le, <<A̱ɗu ɗa i 'yuwan numu shi, a̱vu i gba̱ra̱ mu o u'wa wa dada va̱ shi? Nye i zuwai i ta̱wa̱i ya̱'a̱ va̱ gogo, ana i riya̱i a̱tsuma̱ a addama ko?>>

8 Reve mbara'a n damma Japuta, <<A̱yi ɗa i zuwai tsu ka̱mba̱i uba̱ta̱ wa̱ wu gogo. Tsu ka̱mba̱ ta̱ ya̱'a̱ wu tsa̱ra̱ vu kuru tsu a̱ ka̱mba̱, vu yuwan uvon na aza a Amon, a̱vu ɗa voo o'wo zagbain tsu, waru na aza a na a̱ ri na̱ nden e iɗa ya Giliyadu suru.>>

9 A̱vu Japuta usu, <<Hali ni i ka̱mbuwa̱ mu n yuwan uvon na aza a Amon, na̱ A̱sulazuva a ca mu n lyuwa aci e le, n to o'wo zagbain ɗu mayun?>>

10 A̱vu mbara'a a̱ usu, yi <<A̱sulazuva a̱ ta̱ e inda tsu, tsu ta̱ gba a yuwan cine vu dammai na amayun.>> 11 Ɗaɗa Japuta toniyi mbara ma Giliyadu'u a̱ ka̱ra̱, reve ama'a a zuwa yi zagbain le na̱ yali ya̱ a̱soja e le. Japuta gba u dammisa ta̱ suru ili i na u dammai a̱ ma̱ka̱ka̱n ma̱ A̱sulazuva a̱tsuma̱ a Mizfa.

12 Reve Japuta lyungu nlingata uba̱ta̱ u mogono ma aza a Amon na̱ yeci, <<Nye i ɗa i ɓolo numu na̱ a̱vu, i na i zuwai vu ta̱wa̱a̱ numu nu uvon e iɗa i va̱?>>

13 Mogono ma aza a Amon ma̱ usu ta̱ nlingata ma Japuta u damma, <<Ana aza a Isra'ila o uta̱i diga e iɗa ya Masar, a usa mu ta̱ iɗa diga o Uɗolu wa Anon a̱ tyo o Uɗolu wa Jabo, hali a̱ tyo o Uɗolu wa̱ Urudu. Gogo she vu ka̱mbuwa̱a̱ mu iɗa i va̱ na̱ asuvu nden.>>

14 Japuta lyunguwisa̱ ta̱ nlingata a̱ ka̱mbisa̱ uba̱ta̱ u mogono ma aza a Amon, 15 a damma yi, <<Nda ili i na Japuta dammai: aza a Isra'ila a usa iɗa ya̱ Mowa ko iɗa ya aza a Amon shi. 16 Amma a na o uta̱i diga e iɗa ya Masar, aza a Isra'ila a̱ kuru ta̱ a̱tsuma̱ a̱tsumona a̱ tyo a Mala ma̱ Shili a̱vu a rawa Kedesh. 17 *Aza a Isra'ila a̱ lyungu ta̱ nlingata uba̱ta̱ u mogono ma Edom, a damma, <Ne'e tsu ure tsu kuru ni iɗa ya̱ wu,> agba mogono ma Edom mo polo atsuvu shi. Reve waru a̱ lyungu nlingata uba̱ta̱ u mogono ma̱ Mowa, a̱vu u 'yuwan. Ɗaɗa aza a Isra'ila a̱ da̱nuyi Kedesh.

18 <<*Ɗaɗa a lyuwai elime na̱ mmalu a̱tsumona, reve a̱ ka̱nda̱ruwa̱ iɗa ya Edom na̱ Mowa, a̱ kuru asana ni iɗa ya̱ Mowa, reve a̱ va̱la̱ upasu u ro wa Anon. A uwa upasu wi iɗa ya̱ Mowa shi, adama a na Anon ɗa utyo wa̱ yi.

19 <<*Reve aza a Isra'ila a̱ lyungu nlingata uba̱ta̱ u mogono Sihon va aza a Amoriya, za tsugono tsa Heshibon, a̱vu a damma yi, <Lyawa tsu tsu ka̱ra̱la̱i e iɗa ya̱ wu a̱ tyo uba̱ta̱ u tsu.> 20 Agba u ɓatsaa Sihon okolo aza a Isra'ila a̱ ka̱ra̱la̱i ni iɗa ya̱ yi shi. Reve u ɓoloto ama a̱ yi suru uba̱ta̱ u ta̱ reve a̱ va̱la̱ Jaha, a̱vu a yuwan uvon na aza a Isra'ila.

21 <<Reve A̱sulazuva A̱sula̱ a aza a Isra'ila, a zuwa Sihon na ama a̱ yi e ekere a aza a Isra'ila, a̱vu a lyuwa le nu uvon. Reve ama a Isra'ila a usa iɗa ya aza a Amoriya suru aza a na a̱ ri nden e iɗa'a. 22 Reve a usa iɗa ya aza a Amoriya suru diga o Uɗolu wa Anon hali a rawa o Uɗolu wa Jabo, na̱ diga a̱tsumona a̱ tyo o Uɗolu wa̱ Urudu.

23 <<Gogo ana A̱sulazuva A̱sula̱ a aza a Isra'ila a ɗa a̱ gba̱ra̱i aza a Amoriya diga e iɗa'a adama a ama a̱ yi aza a Isra'ila, gogo vu ciga ta̱ vu usa yi? 24 Vaa tara ili i na Kemosh ma̱sula̱ ma̱ wu ma ca nuwu shi? Ne ɗa a̱tsu fo ili i na A̱sulazuva A̱sula̱ a̱ tsu a ca ntsu ɗa tsaa tara. 25 *Gogo la'a ta̱ Balak ulobo wa Zipo, Mogono ma̱ Mowa ɗa? U uwa ta̱ mawasan na ama a Isra'ila, ko vu uwwa ta̱ u yuwan ta̱ uvon ne ele ɗa? 26 A̱yi ɗa nda a'wan ukpakuta'atsu (300) ana aza a Isra'ila a̱ da̱nuyi Heshibon, na̱ mulyuci ma̱ yi, na̱ Arowa na̱ mulyuci n na n ri uka̱nda̱ruwu na̱ a̱yi, na̱ suru ilyuci i na i ri zuzu na̱ Anon. Nye i zuwai vu usa nle diga mantsa mo ndolo'o shi? 27 A̱mu n yuwaan wu unusu shi, amma a̱vu ɗa nda vu yuwaan mu ta̱ iwuya uba̱ta̱ o uvon u na vaa yuwusan na̱ a̱mu. Lyawa A̱sulazuva za na a̱yi ɗa za vu uge'etosu u paɗa ugana ana'an e ekere a aza a Isra'ila na aza a Amon.>> 28 Agba mogono ma aza a Amon mo polo atsuvu e ikaka i na Japuta lyunguwa̱ niyi shi.

29 Reve Ruhu va̱ A̱sulazuva cipa̱a̱ Japuta. A̱vu Japuta 'yon u kuru upasu wa Giliyadu na̱ Manase, reve u pasalai Mizfa va Giliyadu, diga ɗe a̱vu u pasa a̱ tyo uba̱ta̱ wa ama a Amon. 30 Reve Japuta yuwan akucunu a̱ tyo e ekere a̱ A̱sulazuva, u damma, <<Na̱ vu ca aza a Amon e ekere a̱ va̱ na amayun, 31 ili i na i fara uta̱i o ukobu wu u'wa u va̱ adama u ga'aton mu mantsa ma na n ka̱mba̱i nu ulyuwu wa aci diga uba̱ta̱ o uvon na aza Amon, u to o'wo za va̱ A̱sulazuva. Reve n ca yi wo o'wo kucci vu ukula̱tosu.>>

32 Reve Japuta pasa a̱ tyo uba̱ta̱ wa aza a Amon adama u yuwan uvon ne ele, a̱vu A̱sulazuva a ca yi ele e ekere a̱ yi. 33 Reve u kototo ilyuci ushin diga Arowa a̱ tyo upasu wa̱ Mini hali a rawa Habila Keramin u kototo le ta̱ wa'a shi. Ne ɗa Isra'ila lyuwai aci a Amon.

34 Ana Japuta ka̱mba̱i o u'wa wa̱ yi a̱tsuma̱ a Mizfa, ɗaɗa usheli wa̱ yi wu uta̱i adama u raba yi, o uje'en na̱ tsuwa'i. A̱yi ɗa yi mawun goon u ri nu ulobo ko usheli u ro shi. 35 Ana we ene niyi, reve wu kara a̱tugu a̱ yi a̱vu u saala, <<O! Usheli u va̱! Vo o'wo mu ta̱ ili ya̱ a̱tsuma̱la̱ngu lon, vu ta̱wa̱a̱ mu ta̱ na addama, adama a na n yuwan ta̱ akucunu e ekere a̱ A̱sulazuva agba waa yuwan n ka̱mba̱ na̱ a̱ca̱pa̱ shi.>>

36 Reve u damma yi, <<Dada va̱, vu yuwan ta̱ akucunu e ekere a̱ A̱sulazuva. Yuwan na̱ a̱mu cine vu yuwain nzuwulai, hali a na wo o'woi A̱sulazuva a tsupaa nuwu e ekere a n'yuwatan ma̱ wu, aza a Amon.>> 37 A̱vu u damma dada va̱ yi, <<Lyawa vu yuwaan mu ili i nda na̱ vu usu. Vu ca mu woto re n 'ya̱wa̱ a agaɗi oɓolo na̱ n'utsa̱ n va̱, adama n yuwan mesun ma̱ tsusheli tsa̱ va̱.>>

38 Reve u damma yi, <<Ka̱ra̱.>> A̱vu u lyawa yi u ka̱ra̱ hali woto re'e, a̱yi na̱ n'utsa̱ ma̱ yi reve a̱ 'ya̱wa̱ a agaɗi, a̱vu a yuwan a̱tsuma̱la̱ngu adama a na waa yuwan lolo shi. 39 Ana o kotoi woto re, reve u ka̱mba̱ uba̱ta̱ wa dada va̱ yi. Reve dada'a u ca yi o una̱ wa akucunu a na u yuwain e ekere a̱ A̱sulazuva. A̱yi gba koto u shi u reve vali shi. Reve wo o'wo agadu a aza a Isra'ila, 40 a na muwun me esheli ma Isra'ila n tsu uta̱ rana na̱shi a aa'wan suru adama o roco a̱tsuma̱la̱ngu e le adama a cuwan nu usheli wa Japuta vuma va Giliyadu.