1 Urana u ro Samuson 'ya̱wa̱ ta̱ a̱ lyuci va Gaza va aza a Filistiya, ɗe ɗa we enei aashakala o ro, a̱vu u uwa waa asa na̱ a̱yi. 2 A damma ta̱ ama a Gaza, <<Samuson ta̱ pa!>> A̱vu a̱ka̱nda̱ruwa̱ uba̱ta̱'a̱ a vawan yi ayin ma̱ɓula̱ o u'uwata u lyuci'i. A yuwan elemu shi na ayin o ndolo, adansa, <<Nu usana u tawa reve tsu una yi.>>

3 Agba a̱vu Samuson von hali ayin uɓatsulai lon. A̱vu u 'yon a̱vu u reme una̱ntsu wu u'uwata u lyuci'i, na akpata a̱ nge'en e re, a̱vu wu mula̱ le oɓolo na̱ rumu, a̱vu u tanu le a̱ nlyungu ma̱ yi, ɗaɗa u tara nle a̱ tyo a aagaɗi a na a̱ ri nka̱la̱la̱i na̱ Heburon.

4 Ana a̱yi ndolo kotoi, a̱vu Samuson ciga usheli u na a̱ tsu ɗe Dalila, za na ri na̱ nden o Uka̱ri wa̱ Sore. 5 Reve azagbain a aza a Filistiya a̱ 'ya̱wa̱ ya Dalila reve a damma yi, <<Vu kpara Samuson u damma wu uba̱ta̱ u na u tsura̱i cu'un vu ucira nda, waru na̱ cine tsaa yuwan tsu la'a ucira wa̱ yi, adama tsu nla̱ yi, tsa̱ra̱ tsu suɗato yi lon. Za suru a̱tsuma̱ a̱ tsu u ta ca wu ikebe i azurufa ukpakukupa nu ukpaku (1,100).>>

6 Reve Dalila damma Samuson, <<Yuwan ankuri damma mu uba̱ta̱ u na vu tsura̱i cu'un ucira u nda. Na̱ vuma ciga wu nla̱ wu, tsa̱ra̱ u suɗato wu, cine waa yuwan na̱ a̱vu?>>

7 Reve Samuson usu yi, <<Na̱ a̱ nla̱ mu na a'yin a sa'avu e cindere a na koto a̱ 'yetsuyi shi, n to o'wo babu ucira cine akapi a ama a̱ ri.>>

8 Reve azagbain a aza a Filistiya a̱ ta̱wa̱a̱ Dalila na a'yin a sa'avu e cindere aza a na koto e 'yetsuyi shi, reve wu nla̱ Samuson ne ele. 9 Agba u shi ta̱ ɗe u zuwa ali a vawan a aasula o ro a̱tsuma̱ o u'wa wa̱ yi. Reve u damma, <<Samuson! Aza a Filistiya a̱ ta̱wa̱ ta̱ tsa̱ra̱ e reme wu!>> Reve Samuson kakasa a'yi'in tsa agaruma tsa na a zuwayi akina. Adama o ndolo e reve uba̱ta̱ u na ucira wa̱ yi u ri shi.

10 Reve u damma Samuson, <<Vu luma̱ mu ta̱ vu yuwaan mu epen. Gogo yuwan ankuri damma mu, cine maa gura nla̱ wu na amayun.>>

11 Reve u damma yi, <<Na̱ a̱ nla̱ mu na amunga a sa'avu a na koto a yuwayin ulinga shi, n to o'wo babu ucira cine akapi a ama a̱ ri.>>

12 Reve Dalila tara amunga a sa'avu, reve wu nla̱ yi ne ele. Ali'i a̱ da̱na̱ ta̱ uvawun a aasula o ro cine a̱ da̱na̱i nu ufaru. Reve Dalila damma, <<Samuson! Aza a Filistiya a̱ ta̱wa̱ ta̱ tsa̱ra̱ e reme wu!>> Reve Samuson kakasa amunga'a gashi a̱punda̱ a ɗa.

13 A̱vu Dalila damma Samuson, <<Vu da̱shi ta̱ luluma̱ mu, a̱vu waru vu yuwaan mu epen. Damma mu, cine za aa gura nla̱ wu.>>

Reve u damma yi, <<Na̱ vu ɗava a̱kutsu e cindere a aaci a̱ va̱ a̱ a̱a̱punda̱ o uɗava, reve vu nla̱ yi na agita o uɗava ugbamu lon, n to o'wo babu ucira cine akapi a ama a̱ ri.>>

14 Samuson pe a̱tsuma̱ a nlavu ɗaɗa Dalila ɗavai a̱nji a̱ yi tsu umuna. Reve u yuwan yi ugbamu na aagita, reve u damma, <<Samuson! Aza a Filistiya a̱ ta̱wa̱ ta̱ tsa̱ra̱ e reme wu!>> Reve u 'yon ɗaɗa woo rono a̱nji a̱ yi, reve u foɗo le diga a aagita'a na̱ a̱punda̱'a̱.

15 Reve Dalila damma yi, <<Cine vaa damma, <N ciga wu ta̱,> agba vu kpa̱tu'wa̱a̱ mu okolo a̱ wu shi? Vu luma̱ mu ta̱ toto uta'atsu, agba hali n gogo koto vu damma mu uba̱ta̱ u na a̱ba̱jini o ucira wa̱ wu u ri shi.>> 16 Reve u ka̱ra̱ a damatosun yi ana'an na̱ nfa'an na acingi. A̱vu ili'i i makan yi gashi u to una yi.

17 Ɗaɗa Samuson damma niyi ili yu usokowu ya̱ yi suru. U damma yi, <<Ko utanu koto u ju'wa̱n aaci a̱ va̱ shi, adama a na a̱mu za na a tawayi A̱sula̱ a ɗa diga a̱tsuma̱ a mma va̱. Na̱ za ro puna aaci a̱ va̱, n ta lamba ucira u va̱, reve moo o'wo cine akapi a ama a̱ ri.>>

18 Ana Dalila revei u damma yi ta̱ amayun e ili'i, reve u lyunguwa̱ azagbain a aza a Filistiya, reve u damma le, <<Da̱shi ta̱wa̱i u ta̱. U damma mu ta̱ amayun e ili'i suru.>> Ana a̱ ta̱wa̱i, reve a̱ ta̱wa̱ oɓolo ni ikebeꞌe e ekere e le. 19 Reve Dalila kpara Samuson, reve u zuwa yi u lantsa a agutsu a̱ yi. Reve u ɗe vuma ta̱ a̱tsuma̱ e le u puna yi a̱kutsu a̱ cindere a̱ a̱nji'i. Ana u kotoi, a̱vu Dalila fara a suɗatosu yi, ɗaɗa ucira u lyawai Samuson.

20 Reve u damma, <<Samuson! Aza a Filistiya a̱ ta̱wa̱ ta̱ tsa̱ra̱ e reme wu!>> Reve u 'yon a yuwusan majiyan, <<N ta̱ 'yon reve m ba̱ɗa̱ aciya̱va̱ cine n tsu yuwusan.>> Agba u reve a na A̱sulazuva a lyawa niyi shi.

21 Reve aza a Filistiya e reme Samuson, ɗaɗa o kongoro niyi esu. Reve a tara yi a̱ tyo a̱ lyuci va Gaza, reve a̱ nla̱ yi na akani a̱ rumushili. Reve a zuwa yi yira o u'wa wa ali. 22 Agba a̱nji a̱ yi a na a̱ shi a punai a fara ta̱ mota̱.

23 Reve azagbain a Filistiya o ɓoloto, tsa̱ra̱ a yuwaan Dagon ma̱sula̱ me le kucci gbain reve a yuwan a̱buki, a̱vu a damma, <<A̱a̱ma̱li a̱ tsu a ca tsu ta̱ ma'yuwatan ma̱ tsu Samuson e ekere a̱ tsu!>> 24 Ana ama e ene niyi, reve a cana ishipa yi ica ya̱ ma̱sula̱ me le, a dansa, <<Ma̱sula̱ ma̱ tsu ma a ca tsu ta̱ ma'yuwatan ma̱ tsu e ekere a̱ tsu, za na lungusa̱i iɗa i tsu reve wu una ama a̱ tsu na̱ a̱bunda̱.>> 25 A mantsa ma na ama a̱ ri a uwwusa uyo'o wa̱ a̱buki'i, reve a damma, <<Ta̱wa̱yi na̱ Samuson tsa̱ra̱ u yuwaan tsu uro!>> Reve o uta̱a̱ yi diga ɗe o u'wa wa ali reve u yuwaan le uro. Reve a zuwa yi wi isawan e memere ma mpakatalai ma atsura.

26 Reve Samuson damma molobo ma na ma̱ ri uɓa̱nu na̱ a̱yi, <<Zuwa mu n ju'wa̱n atsura a na a̱ guza̱i a̱a̱'isa̱ a nda, adama n raɓato ɗe.>> 27 A̱a̱'isa̱'a̱ a̱ da̱na̱ ta̱ tapu na ama ali na̱ a̱ma̱ci. Suru azagbain a aza a Filistiya a̱ da̱na̱ ta̱ pe. A̱bunda̱ a aza a na a̱ da̱na̱i zuva vu ukwa̱'a̱ a̱ a̱ka̱nla̱ a Samuson a yuwusan uro a ta rawa ali na̱ a̱ma̱ci zuzu nu ukpakukupa uta'atsu (3,000). 28 Reve Samuson yuwan ipati a̱ tyo uba̱ta̱ wa̱ A̱sulazuva, <<A̱sulazuva Zagbain, yuwan ankuri cuwisan na̱ a̱mu. A̱sula̱, yuwan ankuri ne'ishe mu ucira u ta̱ nda, tsa̱ra̱ n tsupa aza a Filistiya adama e esu e re a̱ va̱.>> 29 Reve Samuson ɓa̱na̱ atsura e re a na a̱ ri e memere aza a na a̱ ɓa̱na̱i a̱a̱'isa̱'a̱. Reve u rutsa̱ le, ukere u sa'ani wa̱ yi a za ta̱ za vu ugula̱ waru a za ta̱. 30 Reve u damma, <<Lyawa n kuwa̱ oɓolo na aza a Filistiya a nda!>> Reve u keɓe nu ucira, ɗaɗa a̱a̱'isa̱'a̱ u ra̱moyi a aci a azagbain a aza a Filistiya na ama a na a̱ ri pe. Ne ɗa ama a na wu unai o ukwa̱ wa̱ yi a la'ai ama a na wu unai a mantsa ma na u da̱na̱i wuma.

31 Reve a̱za̱ a̱ yi na̱ umatsun wa dada va̱ yi suru a̱ ta̱wa̱ tsura̱ a tara yi. Reve a̱ ka̱mba̱ na̱ a̱yi a̱vu a̱ ciɗo yi e memere ma̱ Zora na̱ Eshitawo a aason a dada va̱ yi Manowa. U yuwan ta̱ tsugbain tsa aza a Isra'ila hali a'wan ushin.