1 Ana Josuwa kuwa̱i, aza a Isra'ila e ece ta̱ A̱sulazuva a damma, <<Ugundo u ne u ɗa a̱tsuma̱ a̱ tsu waa fara 'ya̱wa̱a̱ tsu u yuwan uvon na aza a Ka'ana?>>

2 Reve A̱sulazuva a̱ usu, <<Ugundo wa Yahuza u ɗa wa̱a̱ 'ya̱wa̱. Uwwai nda, n ca ta̱ ɗe iɗa'a e ekere e le.>>

3 Reve ama a Yahuza a damma a̱za̱ e le a̱za̱ o ugundo wa Saminu, <<Ta̱wa̱i tsu 'ya̱wa̱i oɓolo a̱tsuma̱ o upasu wa akunda e iɗa i na a ca ntsu, tsa̱ra̱ tsu yuwain uvon na aza a Ka'ana. Ne ɗa a̱tsu fo tsa̱ 'ya̱wa̱ oɓolo na̱ a̱ɗu upasu wa akunda e iɗa i na a ca nɗu.>> Reve ugundo wa Saminu u 'ya̱wa̱ oɓolo ne ele.

4 Ana ugundo wa Yahuza u farai uvon, ɗaɗa gba A̱sulazuva a cayi aza a Ka'ana na aza a Periziya e ekere e le, a̱vu o una ama ukpakukupa kupa (10,000) ɗe Beze. 5 Ele ɗe reve a cina ɗe Adoni Beze, a̱vu a yuwan uvon na̱ a̱yi, a̱vu waru a lyuwa aza a Ka'ana na aza a Periziya nu uvon. 6 A̱vu Adoni Beze suma, a̱vu a saɓa yi e reme yi reve o koɗo akatsu a gbagbain e ekere a̱ yi na aza a ana a̱ yi.

7 A̱vu Adoni Beze damma, <<Ngono kupocindere n na o koɗoi akatsu a gbagbain e ekere e le na aza a ana e le, a yuwusan ta̱ wuta̱ɗu wi ilyalya za̱la̱ va apada a̱ va̱. Cine n yuwain, ne ɗaɗa A̱sulazuva a tsupaa numu.>> Reve a̱ ta̱wa̱ na̱ a̱yi a̱tsuma̱ a̱ Urishelima, ɗe ɗa u kuwa̱i.

8 Reve ugundo wa Yahuza u yuwan uvon na̱ a̱za̱ a̱ Urishelima, a̱vu a lyuwa yi nu uvon. A̱vu o kototo ama a̱ yi na̱ matsun me pe'eni, a̱vu waru a daɓa lyuci'i na akina.

9 Ana a̱yi ndolo kotoi, a̱vu aza a Yahuza a̱ zura̱ a̱ 'ya̱wa̱ a yuwan uvon na aza a Ka'ana aza a na a̱ ri nden e iɗa ya agaɗi, na̱ a̱tsuma̱ o upasu we Nege ne e iɗa i mugaɗi. 10 Reve e reme uvon na aza a Ka'ana a na a̱ ri nden a̱tsuma̱ a Heburon, za na a̱ shi a̱ tsu ɗe Kiriyat Arba nu ufaru. A̱vu a lyuwa ugundo wa Sheshai, oɓolo na̱ Ahiman na̱ Talmai nu uvon.

11 Diga ɗe Heburon reve ama a Yahuza a̱ 'ya̱wa̱i a yuwan uvon na aza a na a̱ ri nden a̱tsuma̱ a Debi, za na a̱ shi a̱ tsu ɗe Kiriyat Sefa nu ufaru. 12 A̱vu Keleb damma, <<N ta ca vuma na suru riya̱yi Kiriyat Sefa nu uvon a̱vu u lyuwa yi, lolo vu usheli u va̱ Akisa.>> 13 A̱vu Otiniye ulobo wu zawa'a va Keleb za na a̱ tsu ɗe Kena u lyuwa lyuci'i nu uvon, ɗaɗa Keleb ca niyi usheli wa̱ yi Akisa u zuwai.

14 Urana u ro ana Akisa ta̱wa̱i uba̱ta̱ wa̱ Otiniye, a̱vu Otiniye kushanu yi u pati dada va̱ yi atsusa. Ana u cipa̱i o mololi ma̱ yi, a̱vu Keleb ece yi, <<Nye vu cigai n yuwaan wu?>>

15 A̱vu u usu, <<Vu yuwaan mu ta̱ isa'ani, ana vu ca numu iɗa a̱tsuma̱ a̱ Nege. N ciga ta̱ waru vu ca mu esu a̱ mini.>> Reve Keleb ca yi esu a̱ mini za na ri gon na̱ za va̱ za̱la̱.

16 Reve umatsun wa̱ a̱za̱ a̱ Keni, wa̱ a̱sha̱wa̱ a̱ le a Musa oɓolo na ama a Yahuza a gawan diga a̱ Lyuci Gbain vu Shuwa za na a̱yi ɗa Jeriko adama a̱ da̱nu oɓolo na ama a̱ A̱tsumona a Yahuda, za na ri upasu we Nege zuzu na̱ Arada.

17 A̱vu ugundo wa Yahuza a̱ 'ya̱wa̱ oɓolo na aza a Saminu a̱za̱ e le, a̱vu a lyuwa aza a Ka'ana nu uvon aza a na a̱ shi nden a̱tsuma̱ a Zefa, a̱vu o kototo lyuci'i suru suru. Adama o ndolo a ɗa a cayi lyuci'i ala Homa.* 18 A̱vu waru ama a Yahuza a lyuwa Gaza na̱ Ashikelon na̱ Ekuron nu uvon, suru nle na̱ pasu na ri uka̱nda̱ruwu ne ele.

19 A̱sulazuva a̱ da̱na̱ ta̱ oɓolo na ama a Yahuza. A̱vu a usa iɗa ya agaɗi, agba a gura gba̱ra̱ aza a na a̱ ri agalaci shi adama a na a̱ shi ta̱ ni ikeke yi ido yi irumu. 20 A ca ta̱ Keleb Heburon cine Musa yuwain nzuwulai.* A̱vu a̱yi gba u gba̱ra̱ umatsun wo olobo a ta'atsu wa Anaku pe. 21 Amma ugundo wa Banyami u gba̱ra̱ aza a Jebusiya aza a na a̱ da̱na̱i na̱ nden a̱tsuma̱ a̱ Urishelima shi. Ɗaɗa aza a Jebusiya a̱ ri nden pe oɓolo nu ugundo wa Banyami hali na ana'an.

22 Gundo va̱ Isuhu yuwan ta̱ uvon na̱ lyuci va Betel waru A̱sulazuva a̱ da̱na̱ ta̱ oɓolo ne ele. 23 A mantsa ma na a̱ lyunguyi ama a tawa utyo we Betel, za na a̱ shi a̱ tsu ɗe Luz nu ufaru, 24 a̱vu aza a matawa mo utyo wi iɗa'a e ene vuma o uta̱ a̱tsuma̱ a̱ lyuci'i, reve a damma yi, <<Yuwan ankuri roco tsu ure a uwa pe a̱tsuma̱ a̱ lyuci'i, a̱tsu gba tsu to roco wu isa'ani ya amayun.>> 25 Reve u roco le ure a uwa pe a̱tsuma̱ a̱ lyuci'i. Reve o una ama a̱ lyuci'i na̱ matsun me pe'eni, a̱vu gba a lyawa vuma'a na ama o u'wa wa̱ yi suru a la'a. 26 A̱vu vuma'a u ka̱ra̱ a̱ tyo e iɗa ya aza a Hitiya, a̱vu u suwa lyuci a̱vu u ca yi aala Luz, a̱yi ɗa gba aala a̱ yi hali na ana'an.

27 Ugundo wa Manase u gba̱ra̱ aza a na a̱ da̱na̱i na̱ nden a̱tsuma̱ a Bet Shan na̱ Ta'ana na̱ Do na̱ Ibileyam na̱ Megido, oɓolo na̱ mulyuci n na n ri uka̱nda̱ruwu ne ele shi, adama a na aza a Ka'ana a zuwa ta̱ okolo a̱ da̱nu pe a̱tsuma̱ e iɗa'a. 28 Ana aza a Isra'ila a yuwain ucira lon, reve a zuwa aza a Ka'ana ulinga u tsugbashi nu ucira, agba a̱ gba̱ra̱ le suru suru shi.

29 Waru ugundo wa Ifiramu a̱ gba̱ra̱ aza a Ka'ana aza a na a̱ da̱na̱i na̱ nden a̱tsuma̱ a Geza shi. Amma aza a Ka'ana a lyuwa ta̱ elime na̱ nden oɓolo ne ele pe.

30 Waru ugundo wa̱ Zebulun u gba̱ra̱ aza a na a̱ da̱na̱i na̱ nden a̱tsuma̱ a Kitron na̱ Nahala shi. Ɗaɗa aza a Ka'ana a lyuwai elime na̱ nden oɓolo ne ele. Reve gba ama a Zebulun a zuwa le ulinga u tsugbashi nu ucira.

31 Ugundo wa Asha waru u gba̱ra̱ aza a na a̱ da̱na̱i na̱ nden a̱tsuma̱ a Ako na̱ Sidon na Ahala na Akizi na̱ Helba na̱ Afe na̱ Reho shi. 32 Adama o ndolo ugundo wa Asha u da̱nu ta̱ oɓolo na aza a Ka'ana a̱za̱ e iɗa'a, adama a na a̱ gba̱ra̱ le shi.

33 Ugundo wa Nafutali waru u gba̱ra̱ aza a na a̱ da̱na̱i na̱ nden a̱tsuma̱ a Bet Shemesh na̱ Bet Ana shi. A̱vu gba ele fo a̱ da̱nu a̱tsuma̱ a aza a Ka'ana, a̱za̱ e iɗa'a. Na̱ ne suru, ugundo wa Nafutali u zuwa ta̱ aza a na a̱ ri na̱ nden a̱tsuma̱ a Bet Shemesh na̱ Bet Ana ulinga u tsugbashi nu ucira.

34 Aza a Amoriya a̱ ca̱co ta̱ ugundo wa Dan a̱ ka̱mba̱ e iɗa ya agaɗi nu ucira, a lyawa le a̱ da̱nu agalaci shi. 35 Aza a Amoriya a zuwa ta̱ okolo a̱ da̱nu a̱tsuma̱ a Masasan ma̱ Here na̱ Ajalon na̱ Sha'albim. Agba ana gundo va̱ Isuhu da̱shiyi ucira, a̱vu a zuwa le fo ulinga u tsugbashi nu ucira.

36 Utyo wa aza a Amoriya u toni ta̱ diga Sela a gawan nu ure wa Akarabim a̱ 'ya̱wa̱ elime.