1 A̱vu Josuwa ɓoloto gundo va aza a Isra'ila suru a Shekem. A̱vu u ɗe mbara na azagbain na̱ a̱za̱ o uge'etosu na azagbain o uvon a Isra'ila, reve a̱ ta̱wa̱ a̱ ma̱ka̱ka̱n ma̱ A̱sula̱.

2 *Reve Josuwa damma ama'a suru, <<Apa nda ili i na A̱sulazuva A̱sula̱ a Isra'ila a dammai, <Ɗe nu ujumu nkaya n ɗu oɓolo na̱ Tera dada va Ibrahim, na̱ Naho a̱ da̱nu ta̱ mavada mo Uɗolu wa̱ Yufireti, a̱vu a yuwaan musula̱ n ro a̱ga̱nda̱. 3 *Reve n tara dada ɗu Ibrahim diga mavada ma̱ Yufireti'i reve n kuru na̱ a̱yi a̱tsuma̱ e iɗa ya Ka'ana suru, reve n ca yi limatan va a̱bunda̱. N ca yi Ishiyaku. 4 *Reve n ca Ishiyaku Yakubu na̱ Isuwa. Reve n ca Isuwa iɗa ya agaɗi ya̱ Seyi wo o'wo za va̱ yi, agba a̱vu Yakubu na̱ muwun ma̱ yi a̱ zura̱ a̱ tyo Masar.

5 <<<*A̱vu n lyungu Musa na̱ Haruna, a̱vu n lapa aza a Masar na̱ mɓa̱la̱ adama meleshe ma na n ta̱wa̱ yi a̱tsuma̱ a̱ yi. Reve mu uta̱a̱ ɗu. 6 *Ana mu uta̱yi nkaya n ɗu diga a̱tsuma̱ a Masar, a̱vu a rawa a Mala ma̱ Shili, reve aza a Masar a̱ kuru le ni ikeke yi ido na akumbi e ido a rawa Mala ma̱ Shili. 7 Reve e showen A̱sulazuva, ɗaɗa u zuwai irumbu e memere ma̱ ɗu na aza a Masar. A̱vu u zuwa mala mo soɗu le. Ne esu a̱ ɗu ye ene ta̱ ili i na n yuwain na aza a Masar. Reve i jima nden a̱tsumona.

8 <<<*Reve n ta̱wa̱ na̱ a̱ɗu a̱tsuma̱ e iɗa ya aza a Amoriya aza a na a̱ shi nden mavada ma asana mo Uɗolu wa̱ Urudu. A yuwan ta̱ uvon na̱ a̱ɗu a̱vu n ca ɗu ele e ekere a̱ ɗu, a̱vu n kototo le a̱ ma̱ka̱ka̱n ma̱ ɗu, reve i usa iɗa i le. 9 *Reve Balak ulobo wa Zipo mogono ma Mowa ma̱ 'yon u yuwan uvon na̱ Isra'ila. A̱vu u banu Balam ulobo wa̱ Beyo u yuwaan ɗu una̱. 10 Agba m poloo Balam atsuvu shi, adama o ndolo a̱vu u zuwaa ɗu aba'un babu ucigu. Ne ɗa n wawa nɗu diga e ekere a̱ yi.

11 <<<*Reve i pasa Uɗolu wa̱ Urudu a̱vu i rawa Jeriko. A̱vu ali o uvon a Jeriko a yuwan uvon na̱ a̱ɗu ne ɗa waru aza a Amoriya na aza a Periziya na aza a Ka'ana na aza a Hitiya na aza a Girigashiya na aza a Hiviya na aza a Jebusiya. A̱vu gba n ca ɗu ele e ekere a̱ ɗu. 12 A̱vu n lyunguwa̱ le ni ili i wovon kafu i rawa i na i gba̱ra̱ nle elime a̱ ɗu, cine n yuwain na̱ ngono n re ma aza a Amoriya. Agba ulinga u matsun me pe'eni ma̱ ɗu ko utan u ɗu u ɗa shi. 13 N ca ɗu ta̱ iɗa i na i sowoi awuya adama a̱ yi shi, ni ilyuci i na i suwai shi. A̱ɗu ɗa pe nda nden a lyuwusa matsun ina̱bi va ataci na̱ zetun vu ɗanga na i cu'wa̱in shi.>

14 <<Adama o ndolo gogo, yu uwwa wovon wa̱ A̱sulazuva i yuwaan yi a̱ga̱nda̱ a̱tsuma̱ a̱ɓula̱ na amayun. Yo oco musula̱ n na nkaya n ɗu n yuwayin a̱ga̱nda̱ mavada mo Uɗolu wa Yufiriti na̱ a̱tsuma̱ a Masar, a̱vu i yuwaan A̱sulazuva goon a̱ga̱nda̱. 15 Agba ni ili i wuya i ɗa i yuwaan A̱sulazuva a̱ga̱nda̱ e yeni i ɗu, ana'an i ɗangula za na yaa yuwaan a̱ga̱nda̱, ko musula̱ n na nkaya n ɗu n yuwayin a̱ga̱nda̱ upasu u mavada mo Uɗolu wa̱ Yufireti, ko musula̱ ma aza a Amoriya aza a na i ri nden e iɗa i le. Amma a̱mu nu u'wa u va̱, A̱sulazuva a ɗa tsaa yuwaan a̱ga̱nda̱.>>

16 Reve ama'a a̱ usu, <<A̱sula̱ aa para na tsaa lyawa A̱sulazuva a̱vu tsu yuwaan musula̱ n ro a̱ga̱nda̱! 17 Adama a na A̱sulazuva A̱sula̱ a̱ tsu a ɗa na aciya̱yi za na uta̱a̱ ntsu na̱ nkaya n tsu diga e iɗa ya Masar e iɗa i tsugbashi, reve u yuwan a̱ba̱jini a̱ba̱jini e iroci e esu a̱ tsu. A̱vu u geshe tsu a mmalu n tsun suru ne e memere mo oɓolo ama a na tsu utula̱i suru. 18 Reve A̱sulazuva a̱ gba̱ra̱ oɓolo ama'a suru a̱ ma̱ka̱ka̱n ma̱ tsu, oɓolo na aza a Amoriya a na a̱ shi nden e iɗa'a. Adama o ndolo, tsu ta yuwaan A̱sulazuva a̱ga̱nda̱ adama a na a̱yi ɗa A̱sula̱ a̱ tsu.>>

19 A̱vu Josuwa damma ama'a, <<Yaa gura yuwaan A̱sulazuva a̱ga̱nda̱ shi. A̱yi A̱sula̱ a akiza na̱ za tsushu'un tsa ɗa. Waa yuwaan aciyogbamu a̱ ɗu nu unusu u ɗu gafura shi. 20 Nni i lyawa A̱sulazuva reve i yuwaan musula̱ mo omocin a̱ga̱nda̱, u ta vadala a̱vu u ta̱wa̱a̱ ɗu na̱ meleshe reve u tasa ɗu suru suru, ko a na u roco nɗu ɗe isa'ani.>>

21 Reve a damma Josuwa, <<Ne ɗa shi! Tsu ta yuwaan A̱sulazuva a̱ga̱nda̱.>>

22 Ɗaɗa u dammai ama'a, <<A̱ɗu ɗa esu a̱ ɗu na aciya̱ɗu a na i ɗangwa ta̱ i yuwaan A̱sulazuva a̱ga̱nda̱.>>

Reve a damma, <<A̱tsu ɗa esu.>>

23 Reve u damma, <<Adama o ndolo yo oco musula̱ mo omocin n na n ri a̱tsuma̱ a̱ ɗu, i vadala okolo a̱ ɗu a̱tyo uba̱ta̱ wa̱ A̱sulazuva A̱sula̱ a Isra'ila.>>

24 Reve a damma Josuwa, <<A̱sulazuva A̱sula̱ a̱ tsu a ɗa tsaa yuwaan a̱ga̱nda̱, waru adanshi a̱ yi a ɗa tsa yuwaan tsutoni.>>

25 Reve Josuwa yuwan akucunu o una̱ wa ama'a o urana u ndolo, reve u zuwaa le ili i na a̱a̱ kuru na̱ wila̱ a Shekem. 26 Reve Josuwa ɗana ili i nda a̱tsuma̱ a Aatagada a̱ Wila̱ wa̱ A̱sula̱. Reve u tara aatali a gbain a̱vu u shuwa̱ yi lo za̱la̱ vu uɗanga wo Oku zuzu nu uba̱ta̱ wa akiza wa̱ A̱sulazuva.

27 Reve Josuwa damma ama'a suru, <<Aatali a nda o to o'wo tsu urotsu, adama a na wu uwwa ta̱ adanshi a na A̱sulazuva a damma ntsu. Adama o ndolo u to o'wo urotsu aci a̱ ɗu, adama i yuwaan A̱sula̱ a̱ ɗu epen wan.>>

28 Reve Josuwa zuwa ama'a a̱ ka̱ra̱, za suru u ka̱mba̱ uba̱ta̱ wa agadu wa̱ yi.

29 Ana ili i ndolo i kotoi, a̱vu Josuwa ulobo wa̱ Nun, aagbashi a̱ A̱sulazuva a̱ kuwa̱ na a'wan ukpaku na̱ kupa (110). 30 Reve a̱ ciɗo yi uba̱ta̱ wa agadu a̱ yi a Timnat Sera e iɗa ya agaɗi ya Ifiramu, ugana u Masasan ma Ga'ash.

31 Isra'ila yuwaan ta̱ A̱sulazuva a̱ga̱nda̱ a rana wuma wa̱ Josuwa suru, na̱ suru a mantsa ma mbara n na n shi wuma cina Josuwa kuwa̱, aza a na e revei suru ili i na A̱sulazuva a yuwayin aza a Isra'ila.

32 *Etele a̱ Isuhu gba a na aza a Isra'ila o uta̱yi diga Masar, a̱ ciɗo le ta̱ a Shekem a apashi e iɗa i na Yakubu tsulai e ekere o olobo a Hamo dada va Shekem ikebe i azurufa ukpaku (100). Iɗa'a wo o'wo ta̱ agadu na̱ mazuwa ma agita ma limatan va̱ Isuhu.

33 A̱vu Eliyaza ulobo wa Haruna u kuwa̱, a̱vu a̱ ciɗo yi a Gibiya, lyuci va Finiha ulobo wa̱ yi za na a ca niyi a̱tsuma̱ e iɗa ya agaɗi ya Ifiramu.