1 *Reve A̱sulazuva a damma Josuwa, 2 <<Damma aza a Isra'ila a tawa ilyuci i mapa'an cine n damma nɗu o una̱ wa Musa. 3 I ta tawa ilyuci i nda tsa̱ra̱ za na suru unai vuma na̱ meleshe waru nu ucigu wa̱ yi shi, u suma a̱ tyo ɗe. O to o'wo ɗu upa'atan e ekere e imaci i zuzu yi za na o unai na waa ciga u tsupaa mpasa mu za va̱ yi.

4 <<Nu u suma a̱ tyo a̱ lyuci ta̱ a̱tsuma̱ e ilyuci i nda, u te isawan o una̱ntsu u lyuci'i, a̱vu u ɗaraa mbara n lyuci adama e ili i n i farai na̱ a̱yi. Reve a̱ ushi yi a̱ lyuci'i, a̱vu a ca yi uba̱ta̱ u na wa̱a̱ da̱nu oɓolo ne ele. 5 Na̱ za va atsupu a mpasa'a u kuru yi, mbara n lyuci'i aa ca vuma na unai vuma'a shi, adama a na wu una ta̱ za va̱ yi babu ucigu, waru u shi u 'yuwan yi ɗe a̱ca̱pa̱ shi. 6 U ta̱ da̱nu pe a̱ lyuci'i hali she na̱ wi isawan a̱ ma̱ka̱ka̱n ma ama ana aa yuwaan yi uge'etosu waru she na abara a nan ganu a mantsa mo ndolo a̱ kuwa̱. Reve za na unai vuma'a u ta gura ka̱mba̱ o u'wa wa̱ yi a̱ lyuci na u shi u sumai.>>

7 Ɗaɗa a tawai Kedesh a̱tsuma̱ a̱ Ga̱lili e iɗa ya agaɗi ya Nafutali na̱ Shekem e iɗa ya agaɗi ya Ifiramu na̱ Kiriyat Arba, za na a̱yi ɗa Heburon, e iɗa ya agaɗi ya Yahuda. 8 Upasu wa asana wa̱ Jeriko mavada mo Uɗolu wa̱ Urudu waru a tawa ta̱ Beza a̱tsumona a agalaci a agaɗi o ugundo wa̱ Roben na̱ Ramot a̱tsuma̱ a Giliyadu o ugundo wa Gadu na̱ Golan a̱tsuma̱ a Bashan o ugundo wa Manase. 9 Ele ɗa ilyuci i na a tawai adama a aza a Isra'ila suru na adama o omocin a na ri na̱ nden a̱tsuma̱ e le, na za na suru unai vuma na̱ meleshe u ta gura suma a̱ tyo ɗe, adama za va atsupu a mpasa'a wu una yi kafu wi isawan a̱ ma̱ka̱ka̱n ma ama a na aa yuwaan yi uge'etosu wan.