1 Reve a katsu na̱ntsu lyuci va̱ Jeriko a̱tsuma̱ na alanga adama o wovon wa aza a Isra'ila. Babu za na uwai a̱tsuma̱ a̱ lyuci'i, waru babu za na uta̱i a alanga. 2 Reve gba A̱sulazuva a damma Josuwa, <<Ka̱lyuwa̱, n ca ta̱ Jeriko e ekere a̱ wu oɓolo na̱ mogono ma̱ yi na̱ a̱soja o ucira a̱ yi. 3 A̱vu na ali o uvon a̱ wu i ka̱nda̱ruwa̱ lyuci'i ma̱ɓula̱ uta̱ urana u ta̱ hali rana ta̱li. 4 Vu zuwa nan ganu e cindere a tara avana a̱ a̱giri'i, reve vu zuwa le a wala elime na Akpati a Nzuwulai. O urana we cindere, reve a̱vu oɓolo na̱ a̱soja a̱ wu i ka̱nda̱ruwa̱ lyuci'i toto ucindere, nan ganu waru e ivulusa̱ avana'a. 5 No o koto uka̱nda̱ruwusa̱ u lyuci'i, na̱ vu uwwa e ivulula̱i avana'a na̱ yisaali ya̱ a̱bunda̱ lon, reve vu zuwa ama'a suru o ɓosho na̱ yisaali ya̱ a̱bunda̱. Ukari u lyuci'i u ta̱ riya̱, reve ama'a a gawan a uwa a̱tsuma̱ a̱ lyuci'i mejege.>>

6 Reve gba Josuwa ulobo wa̱ Nun u ɓoloto nan ganu'u uba̱ta̱ u ta̱, reve u damma le, <<Tanuyi Akpati a Nzuwulai, reve i zuwa nan ganu e cindere o ro a wala elime a Akpati'i uguzu na avana a̱ a̱giri'i.>> 7 Reve u damma ama'a, <<Walai i ka̱nda̱ruwa̱ lyuci'i, a̱soja o ro gba ni itana yu uvon a ta uwa elime a Akpati a Nzuwulai a̱ A̱sulazuva.>>

8,9 Ana Josuwa kotoi adanshi na ama'a, a̱vu a fara mmalu. A̱soja a na gba a̱ ri ni itana yu uvon a uwa ta̱ elime a nan ganu e cindere a na a̱ ri uguzu na avana e cindere e ivulusa̱. Reve nan ganu a na a tanuyi Akpati a Nzuwulai a̱ kuru, a̱vu a̱za̱ e ipiri a̱ kuru a̱ca̱pa̱ a Akpati'i. A mantsa'a suru reve e reme e ivulusa̱ avana babu lyawa. 10 Reve Josuwa damma ama'a, <<She i ɓosho na̱ yisaali ko i lyawa a uwwa uɗyo u ɗu wan, waru ko adanshi o uta̱ o una̱ u ɗu wan, she urana u na n damma nɗu i ɓosho na̱ yisaali. Reve i ɓosho na̱ yisaali!>> 11 Reve u zuwa a tanu Akpati a Nzuwulai a̱ A̱sulazuva a̱ ka̱nda̱ruwa̱ lyuci'i uta̱. Reve a̱ ka̱mba̱ o uva̱la̱ta̱ a̱vu a asa ɗe.

12 A̱vu Josuwa 'yon nu usana usana, reve nan ganu a tanu Akpati'i. 13 Reve nan ganu e cindere a na a̱ ri na avana e cindere a̱ a̱giri'i a uwa elime, a mmalu elime a Akpati a̱ A̱sulazuva'a e ivulusa̱ avana'a. Reve a̱za̱ e itana yu uvon a uwa elime e le, a̱za̱ e ipiri waru a̱ kuru a̱ca̱pa̱ a Akpati'i, avana waru e mesun babu lyawa. 14 Reve o urana we ire waru a̱ ka̱nda̱ruwa̱ lyuci'i uta̱. Reve a̱ ka̱mba̱ o uva̱la̱ta̱. Ne ɗa yuwain hali rana ta̱li.

15 O urana we cindere, reve aza a Isra'ila a̱ 'yon na̱ wasasa, reve a̱ ka̱nda̱ruwa̱ lyuci'i cine a tsu yuwusan. She de o urana u ndolo reve a̱ ka̱nda̱ruwa̱ yi ucindere. 16 O uka̱nda̱ruwu we cindere, nan ganu azama e ivula̱ avana, a̱vu Josuwa damma ama'a, <<Ɓoshoyi na̱ yisaali! Adama a na A̱sulazuva a ca ɗu ta̱ ɗe lyuci'i! 17 I ciga i 'yuwan i kototo yi suru suru oɓolo ni ili i na i ri pe a̱tsuma̱ a̱ yi, tsa̱ra̱ i roco gogo za va̱ A̱sulazuva a ɗa. Rahapu aashakala goon ɗa na aza a na a̱ ri o u'wa wa̱ yi a lyawa adama a na u soko ta̱ aza na tsu lyunguyi matawa mo utyo me iɗa'a. 18 Amma i takatsuwa e ili i na a tawai adama o ukototosu, adama i ta̱wa̱a̱ aciya̱ɗu nu ukototosu wan, ni i tara ko ili i ta̱ pe. Na̱ ne ɗa shi i ta zuwa oɓolo'o wo o'wo ili i na oo kototo, i ta̱wa̱a̱ ama a Isra'ila suru na addama. 19 Azurufa na̱ zinariya suru, ni ili i na a yuwain na̱ rumushili suru ni irumu, ili ya akiza i ɗa e ekere a̱ A̱sulazuva, e te tyo o uzuwata wa̱ A̱sulazuva.>> 20 *Ana ama'a a uwwai mesun ma avana, reve o ɓosho na̱ yisaali ya̱ a̱bunda̱. Babu usa̱n ɗaɗa ukari wa̱ Jeriko u riya̱i suru suru, reve aza a Isra'ila suru a gawan a uwa pe a̱tsuma̱ a̱ lyuci mejege, reve a lyuwa yi nu uvon. 21 O kototo ta̱ ili i na i ri pe a̱tsuma̱ a̱ lyuci'i suru na̱ matsun me pe'eni oɓolo na: ali na̱ a̱ma̱ci, mbara na̱ muwun, oɓolo ni inan ni ikyon na̱ nloli.

22 Amma ama e re a na a tawai utyo wi iɗa'a, Josuwa damma le ta̱, <<Uwai o u'wa wa aashakala'a yu uta̱a̱ ka'a pe na aza a na a̱ ri a̱za̱ a̱ yi suru cine i kucinaa niyi.>> 23 Ɗaɗa olobo aza a na a tawai utyo wi iɗa'a a uwai a̱vu o uta̱a̱ Rahapu na̱ dada va̱ yi na̱ mma va̱ yi na̱ muwun ma̱ a̱na̱wun ma̱ yi na aza a na a̱ ri a̱za̱ a̱ yi suru. Reve o uta̱a̱ mmaci ma̱ yi suru reve a zuwa le a alanga o uva̱la̱ta̱ wa aza a Isra'ila. 24 Reve a̱ kula̱to lyuci'i ni ili i na i ri pe suru, agba a̱ kula̱to ili i na a yuwain na̱ azurufa na̱ zinariya na̱ rumushili, na̱ irumu shi. A zuwa le ta̱ a aasula o uzuwata wa̱ A̱sulazuva. 25 *Josuwa wawa ta̱ aashakala o ndolo Rahapu, na̱ a̱za̱ o u'wa a̱ yi, na aza a na a̱ ri oɓolo na̱ a̱yi, adama a na Rahapu soko ta̱ ama a na a̱ lyunguyi a tawa utyo wa̱ Jeriko, waru u ta̱ nden oɓolo na aza a Isra'ila hali na ana'an.

26 *A mantsa'a a̱vu Josuwa damma ama akucunu a nda,

<<Una̱ diga e ekere a̱ A̱sulazuva u te reme

vuma na suru yuwain mpolo n na waa suwisa lyuci va̱ Jeriko.

U ta vara ikyun yu usa'a o una̱ u wuma

u mawun mo ufaru mo ulobo ma̱ yi,

reve u koso una̱ntsu o una̱ u wuma u

mokosoto mo ulobo ma̱ yi.>>

27 A̱sulazuva o to oɓolo na̱ Josuwa, reve e reve na̱ a̱yi a̱tsuma̱ e iɗa'a suru.