1 Reve Adoni Zedek mogono ma̱ Urishelima ma uwwai a na Josuwa lyuwa ta̱ lyuci va Ai waru u kototo yi ta̱ suru suru, waru u yuwan ta̱ na̱ Ai na̱ mogono ma̱ yi cine u yuwain na̱ Jeriko na̱ mogono ma̱ yi, na̱ cine aza a Gibiyon a yuwain nzuwulai mu nden n lafiya na̱ Isra'ila, waru a̱ ta̱ nden oɓolo ne ele. 2 Ɗaɗa a̱yi na ama a̱ yi a uwwa wovon lon, adama a na Gibiyon lyuci gbain ɗa tsa̱ lyuci gbain ta̱ na ri na̱ mogono. Waru adama a na u la'a ta̱ Ai mgbain ali a̱ yi suru waru aza a na gurai uvon a ɗa. 3 Ɗaɗa Adoni Zedek mogono ma̱ Urishelima ma̱ lyunguwa̱yi Hoham mogono ma Heburon na̱ Piram mogono ma Jamu na̱ Jafiya mogono ma Lakish na̱ Debi mogono ma Egilon ni ikaka. 4 A̱vu u damma, <<Ta̱wa̱i i kamba mu tsu yuwain uvon na̱ Gibiyon, adama a na u yuwan ta̱ nzuwulai mu nden n lafiya na̱ Josuwa na aza a Isra'ila.>>

5 Reve ngono n ton ma aza a Amoriya nda, mogono ma̱ Urishelima na̱ mogono ma Heburon na̱ mogono ma Jamu na̱ mogono ma Lakish na̱ mogono ma Egilon m ɓoloto a̱za̱ o uvon e le. Reve a̱ 'ya̱wa̱ oɓolo na̱ a̱soja e le a̱vu a̱ ka̱nda̱ruwa̱ Gibiyon e reme uvon na̱ a̱yi.

6 A̱vu ama a Gibiyon a̱ lyunguwa̱ Josuwa o uva̱la̱ta̱ a Gilga, a damma, <<She vu lyawa agbashi a̱ wu wan! Jika̱ vu ta̱wa̱ ya̱'a̱ tsu vu wawa tsu! Vu kamba tsu, adama a na ngono ma aza a Amoriya suru n na n ri nden e iɗa ya agaɗi m ɓolotowo tsu ta̱.>>

7 A̱vu Josuwa 'yon diga Gilga a̱yi na ali o uvon a̱ yi suru, oɓolo na ali a na la'a gurai uvon suru. 8 A̱sulazuva a damma ta̱ Josuwa, <<She vu uwwa wovon u le wan adama a na n ca wu ele ta̱ o ukere wa̱ wu. Ko vuma ta̱ le aa gura isawan a̱ ma̱ka̱ka̱n ma̱ wu shi.>>

9 Ana a asai a mmalu diga Gilga a̱ tyo Gibiyon, a̱vu Josuwa riya̱a̱ le nu uvon babu urevu. 10 Reve A̱sulazuva a zuwa le a̱ ra̱pula̱ a̱ ma̱ka̱ka̱n ma aza a Isra'ila. A̱vu gba aza a Isra'ila a lyuwa le nu uvon u na u ka̱ra̱la̱i a Gibiyon. A̱vu aza a Isra'ila a saɓa le a gawan nu ure wa Bet Horon reve o unusa le o ure upasu wu uyagi hali a̱ tyo a̱ lyuci va Azeka na̱ Makeda. 11 Ele a sumusaa aza a Isra'ila diga Bet Horon o ure wu uzuru wa Azeka, reve A̱sulazuva o ocowo le atayan a gbagbain diga zuva a̱vu a̱ kuwa̱. Aza a na a̱ kuwa̱i adama a atayan a la'a ta̱ aza a na aza a Isra'ila o unai na̱ matsun me pe'eni.

12 O urana u na A̱sulazuva a cayi aza a Amoriya e ekere a aza a Isra'ila, reve Josuwa damma A̱sulazuva a̱ ma̱ka̱ka̱n ma aza a Isra'ila,

<<Urana vi isawan uba̱ta̱ u ta̱ a Gibiyon,

woto waru, o Uka̱ri wa Ajalon.>>

13 Ɗaɗa urana wi isawain uba̱ta̱ u ta̱,

woto waru wi isawan uba̱ta̱ u ta̱,

hali she ana aza a Isra'ila a tsupai a aci a n'yuwatan n le.

A̱yi nda u ta̱ pe uɗanu a Aatagada a Yasha. Urana wi isawan ta̱ e memere ma zuva agba u riya̱ go'o shi, u ta rawa urana u ta̱. 14 Ko urana wu lo tsa̱ yi shi kafu urana u nda ko hali na ana'an, ana A̱sulazuva a uwwai adanshi a vuma. Na amayun A̱sulazuva a yuwan ta̱ uvon o una̱ wa aza a Isra'ila!

15 Ana ili i nda i kotoi, a̱vu Josuwa oɓolo na aza a Isra'ila suru a̱ ka̱mba̱ o uva̱la̱ta̱ u le a Gilga.

16 A mantsa mo uvo'on ngono n ton n nda n suma ta̱ a pa'an a̱ a̱a̱ba̱nu a Makeda. 17 A̱vu a damma Josuwa a cina ta̱ ngono n to'on upa'un a̱ a̱a̱ba̱nu a Makeda. 18 Reve Josuwa damma, <<Gandaluwai atali a gbagbain i ɓa̱ru una̱ wa̱ a̱a̱ba̱nu'u, a̱vu i zuwa ama e piri le. 19 Amma she akapi a̱ ɗu yi isawan ɗe wan! I saɓa n'yuwatan n ɗu, i riya̱a̱ le nu uvon na̱ a̱ca̱pa̱. She i lyawa le a uwa e ilyuci i le wan, adama a na A̱sulazuva A̱sula̱ a̱ ɗu a ca ɗu ta̱ ɗe ele e ekere a̱ ɗu.>> 20 Ne ɗa Josuwa na aza a Isra'ila o kototo nle she damma o kototo le ta̱ suru, amma ama wa'a na la'ai a rawa ta̱ ilyuci yi kari le. 21 Reve ali o uvo'on suru a̱ ka̱mba̱ gbaga uba̱ta̱ wa̱ Josuwa o uva̱la̱ta̱ a Makeda. Ko vuma ta̱ kawan zami a aza a Isra'ila una̱ shi.

22 A̱vu Josuwa damma, <<Kpa̱tu'wa̱i una̱ wa̱ a̱a̱ba̱nu'u, reve yu uta̱a̱ pe ngono n ton ndolo'o a̱ ta̱wa̱ ya̱'a̱ va̱.>> 23 Reve a yuwan ne, o uta̱a̱ ngono n to'on a̱ a̱a̱ba̱nu a̱ ta̱wa̱ ne ele ya̱'a̱ yi, mogono ma̱ Urishelima na̱ mogono ma Heburon na̱ mogono ma Jamu na̱ mogono ma Lakish oɓolo na̱ mogono ma Egilon. 24 Reve ana o uta̱a̱ nle a̱ ta̱wa̱i ne ele ya̱ Josuwa, a̱vu u ɓoloto ali a Isra'ila suru, a̱vu u damma azagbain a ali o uvon a na a̱ 'ya̱wa̱i oɓolo na̱ a̱yi, <<Ta̱wa̱i zuzu, i dasa yinlu yi ngono n nda.>> Ɗaɗa a rawai zuzu a̱vu a dasa yinlu i le. 25 A̱vu Josuwa damma le, <<She yu uwwa wovon wan, waru she okolo a kuɗa wan. I kapanu yi isawan nu ucira, adama a na ne ɗa A̱sulazuva aa yuwan na̱ n'yuwatan n na yaa yuwan uvon ne ele suru.>> 26 Reve Josuwa una ngono'o, a̱vu u sa̱ga̱do le zuva vu ɗanga ton. Reve a̱ liva̱ lo usa̱ga̱da̱wu hali ulivu.

27 Amma a mantsa ma na urana wa zama ma̱riya̱a̱, a̱vu Josuwa zuwa a̱ cipa̱to le diga a ɗanga'a a̱vu a vari le a̱ a̱a̱ba̱nu a na a̱ shi a pa'ain. Reve a̱ ɓa̱ru una̱ wa̱ a̱a̱ba̱nu'u na atali a gbagbain, waru hali na ana'an a̱ ta̱ lo.

28 O urana u ndolo'o waru Josuwa kototoi lyuci va Makeda. Wu una ta̱ za na ri pe suru hali na̱ mogono na̱ matsun me pe'eni, a̱vu u kototo vuma suru. U lyawa ko za pasa shi. A̱vu wu una mogono ma Makeda cine wu unai mogono ma̱ Jeriko.

29 Reve Josuwa na ali o uvon a̱ yi suru o uta̱ diga Makeda a̱ tyo Libina a̱vu a yuwan uvon na̱ a̱yi. 30 Reve gba A̱sulazuva a ca lyuci'i fo na̱ mogono ma̱ yi e ekere a aza a Isra'ila. Reve Josuwa kototo vuma na ri pe suru na̱ matsun me pe'eni. U lyawa ko za pasa shi. A̱vu wu una mogono ma̱ yi cine wu unai mogono ma̱ Jeriko.

31 Reve Josuwa oɓolo na ali o uvon a̱ yi suru o uta̱ diga Libina a̱ ka̱ra̱ a̱ tyo Lakish. A̱vu a̱ ka̱nda̱ruwa̱ yi a yuwan uvon na̱ a̱yi. 32 Reve A̱sulazuva a ca Lakish e ekere a Isra'ila. A̱vu Josuwa lyuwa yi o urana we ire, reve u kototo yi na̱ matsun me pe'eni na̱ vuma na ri pe suru, cine u yuwain na̱ Libina. 33 Ɗaɗa Horam mogono ma Geza ma̱ ta̱wa̱i adama u kamba Lakish. A̱vu Josuwa lyuwa yi na̱ a̱soja a̱ yi, u lyawa ko za pasa shi.

34 Reve Josuwa oɓolo na ali o uvon a̱ yi suru o uta̱ diga Lakish a̱ tyo Egilon. Reve a̱ ka̱nda̱ruwa̱ yi a yuwan uvon na̱ a̱yi. 35 Reve a lyuwa yi o urana u ndolo, reve o kototo yi na̱ matsun me pe'eni. A̱vu o kototo vuma na ri pe suru o urana u ndolo, cine a yuwain na̱ Lakish.

36 Reve Josuwa oɓolo na ali o uvon a̱ yi suru o uta̱ diga Egilon a̱ tyo Heburon. Reve a̱ riya̱a̱ yi nu uvon. 37 A̱vu a lyuwa yi na̱ matsun me pe'eni na̱ mogono ma̱ yi na̱ mulyuci n na n ri uka̱nda̱ruwu na̱ a̱yi suru, na̱ vuma na ri pe suru. O kototo ta̱ lyuci'i suru suru, cine a yuwain na̱ Egilon. A lyawa ko za pasa shi.

38 Reve Josuwa oɓolo na ali o uvon a̱ yi suru a vadala a saɓa a̱ tyo lyuci va Debi a yuwan uvon na̱ a̱yi. 39 Reve a lyuwa yi nu uvon na̱ mogono ma̱ yi, na̱ mulyuci n na n ri uka̱nda̱ruwu na̱ a̱yi suru. O kototo ta̱ vuma na ri pe suru na̱ matsun me pe'eni, a lyawa ko za pasa shi. A yuwan ta̱ na̱ Debi na̱ mogono ma̱ yi cine a yuwain na̱ Heburon na̱ Libina na̱ mogono ma̱ yi.

40 Ne ɗa Josuwa lyuwai pasu vu nɗa'a suru nu uvon, iɗa ya agaɗi nu upasu we Nege ni iɗa i mugaɗi nu upasu wu zuru vu nsasan na̱ ngono n le suru. U lyawa ko vuma ta̱ pasa shi, amma u kototo ta̱ aza a na a̱ ri e ivuwusan suru suru, cine A̱sulazuva A̱sula̱ a Isra'ila a zuwai. 41 A̱vu Josuwa lyuwa le diga Kadesh Baniya hali a̱ tyo Gaza, ni iɗa ya̱ Goshen suru hali a̱ tyo Gibiyon. 42 A̱vu Josuwa lyuwa ngono n nda suru na̱ nɗa n nda suru ukurula̱i adama a na A̱sulazuva A̱sula̱ a Isra'ila a yuwan ta̱ uvon o una̱ wa̱ Isra'ila.

43 A̱vu Josuwa ka̱mba̱ oɓolo na aza a Isra'ila suru o uva̱la̱ta̱ u le a Gilga.