1 Reve Josuwa ɗe ali o ugundo wa Roben na̱ ugundo wa Gadu nu uɓatsulai wu ugundo wa Manase, 2 *a̱vu u damma le, <<I yuwan ta̱ ili i na Musa aagbashi a̱ A̱sulazuva a damma nɗu suru, a̱vu waru i yuwan tsutoni na adanshi a̱ va̱ e ili i na n zuwa nɗu suru. 3 I lyawa a̱za̱ a̱ ɗu shi a̱tsuma̱ a mantsa ma nda suru hali a̱ tyo gogo, amma i toni ta̱ ili i na A̱sulazuva A̱sula̱ a̱ ɗu a dammai. 4 Gogo nda a na A̱sulazuva A̱sula̱ a̱ ɗu a cayi a̱za̱ a̱ ɗu wivuwun cine u yuwaan nle nzuwulai, ka̱mba̱i a 'wa ɗu e iɗa i na yo o'woi za ɗu za na Musa aagbashi a̱ A̱sulazuva a ca nɗu asana mavada mo Uɗolu wa̱ Urudu ma̱ ndeɗe.

5 <<Agba i ka̱mbuwa̱ ugbozu lon i toni udammu na̱ wila̱ u na Musa aagbashi a̱ A̱sulazuva a ca nɗu. I ciga A̱sulazuva A̱sula̱ a̱ ɗu reve i yuwan mmalu o ure wa̱ yi suru, waru i kuru ili i na u zuwai suru. A̱vu waru i suraa yi i yuwaan yi a̱ga̱nda̱ no okolo a̱ ɗu suru nu wuma u ɗu suru.>>

6 A̱vu Josuwa zuwaa le aba'un a̱vu u lyawa le a̱ ka̱ra̱, reve a̱ ka̱ra̱ ka̱mba̱ o u'wa.

7 Musa ca ta̱ ɗe uɓatsulai wu ugundo wa Manase iɗa a̱tsuma̱ o upasu wa Bashan reve uɓatsulai u na u buwai Josuwa ca le iɗa upasu wa̱ a̱livu wa̱ Urudu oɓolo na̱ a̱za̱ e le.

Ana Josuwa zuwa nle a̱ ka̱ra̱ o u'wa u zuwaa le ta̱ aba'un. 8 U damma, <<Ka̱mba̱i a 'wa ɗu nu utsuru wa̱ a̱bunda̱, ni iliyamunga ya̱ a̱bunda̱ na̱ azurufa na̱ zinariya na̱ rumushili na̱ rumu ni itana yi otosu ya̱ a̱bunda̱. A̱vu i ne'eshen na̱ a̱za̱ ɗu ili i na i pura̱i uba̱ta̱ wu uvon uba̱ta̱ wu n'yuwatan n ɗu.>>

9 Ɗaɗa ugundo wa̱ Roben na̱ ugundo wa Gadu nu uɓatsulai wu ugundo wa Manase a̱ ka̱mba̱i o u'wa, a lyawai aza a Isra'ila a Shilo za na ri a̱tsuma̱ e iɗa ya Ka'ana, a̱ ka̱mba̱ Giliyadu iɗa i le za na e remei wo o'woi za le cine a̱ A̱sulazuva a dammai o una̱ wa Musa.

10 Reve ana a rawai Gelilo zuzu nu Uɗolu wa̱ Urudu e iɗa ya Ka'ana, ugundo wa̱ Roben na ugundo wa Gadu nu uɓatsulai wu ugundo wa Manase a̱vu suwa ɗe a̱ba̱jini masa'a zuzu na̱ Urudu. 11 Reve akapi aza a Isra'ila a uwwa a na ugundo wa̱ Roben na̱ ugundo wa Gadu nu uɓatsulai wu ugundo wa Manase a suwa ta̱ masa'a ɗe Gelilo zuzu nu Uɗolu wa Urudu o utyo wa Ka'ana e eɓele a aza a Isra'ila na̱ a̱livu. 12 Reve aza a Isra'ila suru o ɓoloto Shilo adama a na a̱ 'ya̱wa̱ a yuwan uvon ne ele.

13 Ɗaɗa aza a Isra'ila a̱ lyunguyi Finiha ganu ulobo wa Eliyaza uba̱ta̱ wu ugundo wa̱ Roben na̱ ugundo wa Gadu nu uɓatsulai wu ugundo wa Manase e iɗa ya Giliyadu. 14 Azagbain kupa a̱ 'ya̱wa̱ ta̱ oɓolo na̱ a̱yi, vuma ta̱ diga a̱tsuma̱ o ugundo suru wa aza a Isra'ila, zagbain vu u'wa a̱tsuma̱ a matsun va aza a Isra'ila.

15 Reve a̱ ta̱wa̱ uba̱ta̱ wu ugundo wa̱ Roben na̱ ugundo wa Gadu nu uɓatsulai wu ugundo wa Manase e iɗa ya Giliyadu, avu a damma le,

16 <<Apa nda ili i na oɓolo a ama a̱ A̱sulazuva suru a dammai, <Cu'un vu ulambu wa̱ a̱ɓula̱ ne ɗa i yuwayin A̱sula̱ a Isra'ila? Adama a̱ nye i vadalayi A̱sulazuva ucina̱ a̱vu i suwaa aciya̱ɗu masa'a ana'an a̱tsuma̱ a na i 'ya̱sa̱n ni yi aci? 17 Unusu u na tsu yuwain a Peyo u rawa tsu shi? Hali na ana'an koto tsu ka̱mba̱to aciya̱tsu cece o unusu'u shi ko a na adama a̱ yi a ɗa mɓa̱la̱ n remei oɓolo a ama a̱ A̱sulazuva! 18 A̱vu a̱ɗu ɗa nda gogo i vadalayi A̱sulazuva ucina̱. Ni i 'ya̱sa̱a̱n A̱sulazuva aci ana'an, nfa'an u ta yuwan upan no iɓolo ya aza a Isra'ila suru. 19 Ni iɗa i na wo o'woi za ɗu wo o'wo idaba, i pasa a̱ ta̱wa̱ e iɗa ya̱ A̱sulazuva, uba̱ta̱ u na Oogodo o Ucuwusan a̱ A̱sulazuva a̱ ri i ne'eshen iɗa'a oɓolo na̱ a̱tsu. Amma she i yuwaan A̱sulazuva aciyogbamu wan ko i yuwaan tsu aciyogbamu wan na i suwayi aciya̱ɗu masa'a o una̱ u masa'a ma̱ A̱sulazuva A̱sula̱ a̱ tsu. 20 *Ana Akan ulobo wa Zera u yuwain ulambu wa̱ a̱ɓula̱ e ili i na a tawai adama o ukototosu, upan wa̱ A̱sulazuva u riya̱ a aci e iɓolo ya aza a Isra'ila suru shi? A̱yi ɗa u kuwa̱i a̱ nde'en adama o unusu wa̱ yi shi.> >>

21 Reve ugundo wa̱ Roben nu ugundo wa Gadu nu uɓatsulai wu ugundo wa Manase a̱ usu azagbain vu u'wa a̱tsuma̱ a matsun va aza a Isra'ila,

22 <<Za vu Ucira A̱sula̱, A̱sulazuva! Za vu Ucira A̱sula̱, A̱sulazuva! U reve ta̱ ili i na i zuwai tsu yuwain ne, waru lyawa Isra'ila na aciya̱yi u reve! Na̱ a̱yi nda aciyogbamu a ɗa ko ulambu wa̱ a̱ɓula̱ e ekere a̱ A̱sulazuva she i lyawa tsu wuma ana'an wan. 23 Na̱ masuwa ma masa'a adama tsu vadalayi A̱sulazuva ucina u ɗa ko tsu yuwan ta̱ ne adama tsu ca ɗe kucci vu ukula̱tosu ko za vi ishina ko za muwwulai, lyawa A̱sulazuva na aciya̱yi u paɗaa tsu ugana.

24 <<O'o, Tsu yuwan yi ta̱ o wovon u na urana u ro elime ta̱wa̱ muwun n ɗu n damma muwun n tsu, <Nye i bura nɗu na̱ A̱sulazuva A̱sula̱ a Isra'ila? 25 A̱sulazuva a zuwa ta̱ ɗe Uɗolu wa̱ Urudu o o'wo utyo u tsu na̱ a̱ɗu, a̱ɗu ugundo wa̱ Roben na̱ ugundo wa Gadu! I ri nu upasu uba̱ta̱ wa̱ A̱sulazuva shi.> Ne ɗa muwun n ɗu maa zuwa muwun n tsu n lyawa a uwwusa wovon wa̱ A̱sulazuva.

26 <<Adama o ndolo a ɗa tsu dammai, <Lyawai tsu suwai masa'a, agba adama a̱ kucci vu ukula̱tosu ko adama a̱ kucci ro shi.> 27 Amma wo o'wo urotsu uba̱ta̱ u tsu na̱ a̱ɗu, nu uba̱ta̱ u limatan va̱ a̱ca̱pa̱ a̱ tsu waru, na tsu yuwan ta̱ a̱ga̱nda̱ a̱ A̱sulazuva a̱ a̱'isa̱ a̱ yi na̱ kucci vu ukula̱tosu na̱ kucci muwwulai na̱ kucci ro. Tsu yuwan ta̱ ne ta̱wa̱ muwun n ɗu n damma muwun n tsu ɗe a mantsa ma na ma̱a̱ ta̱wa̱, <I ri na akunda uba̱ta̱ wa̱ A̱sulazuva shi.> >>

28 << Reve tsu damma, <Na̱ hali aa damma tsu ne ko limatan tsu va̱ a̱ca̱pa̱ ɗe elime, tsu ta damma, apa uzuɗu u masa'a ma̱ A̱sulazuva za na nkaya n tsu n yuwain, adama a̱ kucci vu ukula̱tosu shi, waru na adama a̱ kucci ro shi, amma wo o'wo urotsu e ekere a̱ a̱tsu na̱ a̱ɗu.> >>

29 <<A̱sula̱ a para a na tsaa yuwaan A̱sulazuva aciyogbamu reve tsu vadalayi ucina̱ na tsa suwai masa'a adama a̱ kucci vu ukula̱tosu na̱ za vi ishina na̱ kucci ro o una̱ u masa'a ma̱ A̱sulazuva A̱sula̱ a̱ tsu a na a̱ ri elime o Oogodo o Uga'asusan.>>

30 Ana Finiha ganu na azagbain a ama, azagbain vu matsun va aza a Isra'ila, a uwwai ili i na ugundo wa̱ Roben na̱ ugundo wa Gadu nu uɓatsulai wu ugundo wa Manase a dammai, a uwwa ta̱ uyo'o. 31 Reve Finiha ganu ulobo wa Eliyaza damma ugundo wa̱ Roben na̱ ugundo wa Gadu nu uɓatsulai wu ugundo wa Manase, <<Ana'an tsu reve ta̱ a na A̱sulazuva a̱ ri e memere ma̱ tsu adama a na i yuwaan yi ulambu wa̱ a̱ɓula̱ shi. I wawa ta̱ ama a Isra'ila e ekere a̱ A̱sulazuva.>>

32 Reve Finiha ganu ulobo wa Eliyaza na azagbai'in a lyawa ugundo wa̱ Roben na̱ ugundo wa Gadu e iɗa ya Giliyadu reve a̱ ka̱mba̱ e iɗa ya Ka'ana uba̱ta̱ wa aza a Isra'ila, reve a̱ ka̱mbuwa̱ le adanshi'i.

33 Adanshi'i u yo'ono ta̱ aza a Isra'ila. Reve aza a Isra'ila a cuwa A̱sula̱, a̱ da̱shi waru yuwan adanshi adama o uvon ne ele o kototo iɗa i na ugundo wa̱ Roben na̱ ugundo wa Gadu, a̱ ri na̱ nden shi.

34 Reve ugundo wa̱ Roben na̱ ugundo wa Gadu e ɗe masa'a'a Urotsu, adama a na adamma ta̱ <<Masa'a ma nda urotsu u ɗa e memere ma̱ tsu a na A̱sulazuva a̱yi ɗa A̱sula̱.>>