1 Reve ana ngono ma aza a Amoriya suru aza a na a̱ ri upasa wa̱ a̱livu wu Uɗolu wa̱ Urudu, oɓolo na̱ ngono ma aza a Ka'ana mu nge'en m Mala ma Gbain, mu uwwai a na A̱sulazuva a ukwaton ta̱ Urudu adama a aza a Isra'ila hali she na a pasai, reve okolo e le a kuɗa na̱ wovon waru ko za buwa na asuvu a na wa̱a̱ zura̱ aza a Isra'ila waru shi.

2 A mantsa mo ndolo a̱vu A̱sulazuva a damma Josuwa, <<Yuwan mutsun ma aɓaci ma atali a̱vu vu paɗa ali a Isra'ila a na a matsain na̱ a̱ca̱pa̱ uryumbu.>> 3 Ɗaɗa Josuwa yuwain mutsun ma aɓaci ma atali a̱vu u paɗa ali a Isra'ila uryumbu o uba̱ta̱ u na a̱ tsu ɗe Agaɗi a Mapaɗa mo Uryumbu. 4 *Apa nda ili i na i zuwai Josuwa paɗa nle uryumbu, suru ali a na o uta̱i Masar, ali o uvon a̱ kuwa̱ ta̱ a̱tsumona o ure ana a lyawai Masar. 5 Ama a na o uta̱i diga Masar suru a̱ shi ta̱ ɗe a paɗa le uryumbu, amma aza a na a matsain o ure a̱tsumona suru koto a̱ shi a paɗa le shi. 6 Adama a na aza a Isra'ila a yuwan ta̱ mmalu a̱tsumona a'wan amunga, hali ali a na a̱ shi a rawai uvon suru a na o uta̱i a̱tsuma̱ a Masar a̱ kuwa̱, adama a na a yuwain tsutoni na adanshi a̱ A̱sulazuva shi. A̱sulazuva a kucinaa le ta̱ waa lyawa le e ene iɗa i na u kucinayi nkaya n le u ta ca tsu shi, iɗa i na yee yeneshe maani ni ishiki. 7 Muwun n le n ɗa n na n kungwai mo o'woi o una̱ wu mbara n le, Josuwa paɗai uryumbu. Koto a̱ shi a paɗa le uryumbu o ure shi.

8 Reve ana a paɗai ama'a suru uryumbu, a̱vu e isawan uba̱ta̱ u na a̱ ri o uva̱la̱ta̱ hali she na e inai. 9 A̱vu A̱sulazuva a damma Josuwa, <<Ana'an n tawa ta̱ ili yi izo'oshi i na aza a Masar a tara nɗu e ekere a̱ ɗu.>> Ɗaɗa i zuwai e ɗesu uba̱ta̱'a̱ Gilga* hali na ana'an.

10 Ana aza a Isra'ila a̱ da̱na̱i uva̱lu a Gilga, a yuwan ta̱ A̱buki a Mapasa o urana wa kupa na̱ a̱za̱ a̱ na̱shi u woto wu ufaru nu ulivu a agalaci a̱ Jeriko. 11 Ana usana u tawai ana a yuwain a̱buki'i, urana'a gan, reve a lyuwa itana yu uɗuma̱ yi iɗa ya Ka'ana, opopofu a na a̱ ri na̱ wolilo shi ni ishina yu uzuwun. 12 Mana'a u lyawa ta̱ moco o urana u na a fara lyuwai ilyalya yi iɗa'a, agba aza a Isra'ila a̱ da̱shi tsura̱ mana waru shi. Diga a mantsa mo ndolo a̱ 'ya̱wa̱, a̱ ka̱ra̱ ta̱ a lyuwusa ilyalya yi iɗa ya Ka'ana.

13 Urana u ro ana Josuwa rawai zuzu na̱ Jeriko, a̱vu we eneshi vuma mishin elime a̱ yi, na̱ matsun me pe'eni utalu. Reve u 'ya̱wa̱ uba̱ta̱ wa̱ yi, a̱vu we ece yi, <<A̱vu i'utsa̱ i ɗa ko ma'yuwatan?>>

14 Reve vuma'a u usu, <<Ko za ta̱. A̱mu yali ya̱ a̱soja ya̱ A̱sulazuva a ɗa, gogo n ta̱wa̱ ta̱ ya̱'a̱ wu.>> Reve Josuwa von ma̱kpa̱ɓa̱ u ca yi tsugbain, reve u damma, <<A̱mu aagbashi a̱ wu a ɗa. Ikaka i ne i ɗa zagbain va̱ ta̱wa̱a̱ numu aagbashi a̱ yi?>>

15 Reve vuma'a u damma, <<Foɗo atan a̱ wu, adama a na uba̱ta̱ u na vu ri mishin uba̱ta̱ wa akiza u ɗa.>> Reve Josuwa yuwan ne.