1 A̱vu azagbain a 'wa vu ugundo wa̱ Levi a̱ ta̱wa̱ ya Eliyaza ganu na̱ Josuwa ulobo wa̱ Nun nu uba̱ta̱ wa azagbain a 'wa vu gundo va aza a Isra'ila. 2 *Reve a damma le a Shilo e iɗa ya Ka'ana, <<A̱sulazuva a damma ta̱ o una̱ wa Musa a na a ca tsu ilyuci i na tsa̱a̱ da̱nu, oɓolo na̱ ba̱ta̱ va alyuna vi iliyamunga i tsu.>> 3 Adama o ndolo o udammu wa̱ A̱sulazuva a ca ta̱ ugundo wa̱ Levi ilyuci i nda na̱ ba̱ta̱ va alyuna a̱tsuma̱ a agadu e le.

4 Agita o ufaru e iɗa'a za limatan vu umatsun wa̱ Koha u ɗa. Ugundo wa̱ Levi a na o uta̱i o umatsun wa Haruna ganu a̱ tsura̱ ta̱ ilyuci kupa na aza a ta'atsu diga o ugundo wa Yahuza na̱ Saminu na̱ Banyami. 5 A̱vu akapi a limatan o umatsun wa̱ Koha a̱ tsura̱ akunda e le diga a matsun vu ugundo wa Ifiramu na̱ Dan nu uɓatsulai wu ugundo wa Manase ilyuci kupa.

6 A̱vu limatan vu umatsun wa Gashon u ushi akunda e iɗa i le diga a matsun vu ugundo wa Isaka na̱ Asha na̱ Nafutali nu uɓatsulai wu ugundo wa Manase a̱tsuma̱ a Bashan, ilyuci kupa na aza a ta'atsu.

7 Limatan vu umatsun wa Merari u tsura̱ ta̱ ilyuci kupa ne ejere diga o ugundo wa̱ Roben na̱ Gadu na̱ Zebulun.

8 Aza a Isra'ila a ca ta̱ ugundo wa̱ Levi ilyuci i nda na̱ ba̱ta̱ va alyuna le na mazuwa ma agita, cine A̱sulazuva a dammai o una̱ wa Musa.

9 Apa nda ala e ilyuci i na a cayi diga upasu wu ugundo w Yahuza na̱ Saminu, 10 A ca ta̱ umatsun wa Haruna ilyuci i nda aza a umatsun wa̱ Koha vu ugundo wa̱ Levi u ɗa adama a na agita o ufaru a̱ riya̱ ta̱ ya̱'a̱ le.

11 A ca le ta̱ Kiriyat Arba, za na a̱yi ɗa Heburon na̱ ba̱ta̱ va alyuna na ri uka̱nda̱ruwu na̱ a̱yi a̱tsuma̱ e iɗa ya agaɗi ya Yahuda. Arba ɗa akaya a Ana. 12 Amma atsusa na̱ mulyuci n na n ri uka̱nda̱ruwu na̱ lyuci'i a ca ta̱ ɗe Keleb ulobo wa̱ Jefune wo o'wo za va̱ yi.

13 Waru a ca ta̱ umatsun wa Haruna ganu ilyuci i nda oɓolo na̱ ba̱ta̱ va alyuna le: Heburon lyuci mapa'an adama a za na unai vuma nu ucigu shi na̱ Libina 14 na̱ Yati na̱ Eshitemowa 15 na̱ Holon na̱ Debi 16 na̱ Ayin na̱ Juta na̱ Bet Shemesh. A̱bunda̱ e ilyuci i le kuci ɗa a̱tsuma̱ o upasu wu ugundo wa Yahuza na̱ Saminu.

17 Waru a ca le ta̱ diga a̱tsuma̱ o ugundo wa Banyami ilyuci i nda oɓolo na̱ ba̱ta̱ va alyuna le: Gibiyon na̱ Geba, 18 na̱ Anatot na̱ Almon. A̱bunda̱ e ilyuci i le a̱za̱ a̱ na̱shin a ɗa.

19 Ilyuci i na a cayi nan ganu umatsun wa Haruna suru suru ele ɗa kupa na aza a ta'atsu oɓolo na̱ ba̱ta̱ va alyuna le.

20 Akapi o umatsun wa̱ Koha wu ugundo wa̱ Levi a ca le ta̱ ilyuci i nda diga a̱tsuma̱ o ugundo wa Ifiramu oɓolo na̱ ba̱ta̱ va alyuna le: 21 Shekem a̱tsuma̱ e iɗa ya agaɗi ya Ifiramu lyuci mapa'an adama a za na unai vuma na̱ Geza 22 na̱ Kibizayim na̱ Bet Horon. A̱bunda̱ e ilyuci i le a̱za̱ a̱ na̱shin a ɗa.

23 Waru a ca le ta̱ ilyuci i nda diga a̱tsuma̱ o ugundo wa Dan oɓolo na̱ ba̱ta̱ va alyuna le: Eliteke na̱ Gibeton 24 na̱ Ajalon na̱ Gat Rimon. A̱bunda̱ e ilyuci i le a̱za̱ a̱ na̱shin a ɗa.

25 Diga o uɓatsulai wu ugundo wa Manase a ca le ta̱ ilyuci i nda oɓolo na̱ ba̱ta̱ va alyuna le: Ta'ana na̱ Gat Rimon. A̱bunda̱ e ilyuci i le ejere a ɗa. 26 Ilyuci kupa i nda na̱ ba̱ta̱ va alyuna le suru a ca ta̱ akapi o umatsun wa̱ Koha.

27 Reve a ca limatan vu umatsun wa Gashon vu ugundo wa̱ Levi, diga a̱tsuma̱ o uɓatsulai wu ugundo wa Manase ilyuci i nda oɓolo na̱ ba̱ta̱ va alyuna le: Golan a̱tsuma̱ a Bashan lyuci mapa'an adama a za na unai vuma na̱ Be Eshtera. A̱bunda̱ e ilyuci i le ejere a ɗa.

28 Diga a̱tsuma̱ o ugundo wa Isaka a ca le ta̱ ilyuci i nda oɓolo na̱ ba̱ta̱ va alyuna le: Kishiyon na̱ Dabera 29 na̱ Jamu na̱ En Ganim. A̱bunda̱ e ilyuci i le a̱za̱ a̱ na̱shin a ɗa.

30 Diga a̱tsuma̱ o ugundo wa Asha a ca le ta̱ ilyuci i nda oɓolo na̱ ba̱ta̱ va alyuna le: Misha na̱ Abadon 31 na̱ Helka na̱ Reho. A̱bunda̱ e ilyuci i le a̱za̱ a̱ na̱shin a ɗa. 32 Diga a̱tsuma̱ o ugundo wa Nafutali a ca le ta̱ ilyuci i nda oɓolo na̱ ba̱ta̱ va alyuna le: Kedesh a̱tsuma̱ a̱ Ga̱lili lyuci mapa'an adama a za na unai vuma na̱ Hamot Do na̱ Katan. A̱bunda̱ e ilyuci i le aza a ta'atsu a ɗa.

33 Ilyuci i limatan vu umatsun wa Gashon suru suru ele ɗa kupa na aza a ta'atsu oɓolo na̱ ba̱ta̱ va alyuna le.

34 Diga a̱tsuma̱ o ugundo wa̱ Zebulun a ca ta̱ limatan vu umatsun wa Merari, aza a na ele ɗa akapi o ugundo wa̱ Levi ilyuci i nda oɓolo na̱ ba̱ta̱ va alyuna le: Jokineyam na̱ Kata 35 na̱ Dimna na̱ Nahala. A̱bunda̱ e ilyuci i le a̱za̱ a̱ na̱shin a ɗa.

36 Diga a̱tsuma̱ o ugundo wa̱ Roben waru a ca le ta̱ ilyuci i nda na̱ ba̱ta̱ va alyuna le: Beza na̱ Yaza 37 na̱ Kedemo na̱ Mefa'a. A̱bunda̱ e ilyuci i le a̱za̱ a̱ na̱shin a ɗa.

38 Waru diga a̱tsuma̱ o ugundo wa Gadu, a ca le ta̱ ilyuci i nda oɓolo na̱ ba̱ta̱ va alyuna le: Ramot a̱tsuma̱ a Giliyadu lyuci mapa'an adama a za na unai vuma na̱ Mahanayim 39 na̱ Heshibon na̱ Jaza. A̱bunda̱ e ilyuci i le a̱za̱ a̱ na̱shin a ɗa suru suru.

40 Ilyuci i na a cayi limatan vu umatsun wa Merari, akapi o ugundo wa̱ Levi ilyuci kupa ne ejere a ɗa suru suru.

41 Ilyuci vu ugundo wa̱ Levi suru suru a̱tsuma̱ o uba̱ta̱ u na wo o'woi za va aza a Isra'ila ilyuci amunga na̱ kunla̱ ɗa oɓolo na̱ ba̱ta̱ va alyuna le. 42 Lyuci suru a̱tsuma̱ a nda u ta̱ nu uba̱ta̱ wa alyuna wa̱ yi uka̱nda̱ruwu na̱ a̱yi. Ne ɗa ilyuci i nda suru i shi.

43 Ne ɗa A̱sulazuva a cayi aza a Isra'ila iɗa i na u kucinai waa ca nkaya n le suru. Reve a usa yi wo o'wo za le, a̱vu a̱ da̱nu pe. 44 Reve A̱sulazuva a ca le wivuwun upasu biti cine u kucinayi nkaya n le. Ko za ta̱ a̱tsuma̱ a n'yuwatan n le gura isawan a̱ ma̱ka̱ka̱n me ele shi, adama a na A̱sulazuva a zuwa ta̱ n'yuwatan n le suru o ukere u le. 45 Ko adanshi a̱ ta̱ a̱tsuma̱ a nzuwulai mi sa'ani n na A̱sulazuva a yuwayin u'wa wa Isra'ila a̱ riya̱ e iɗa shi, a shiwan ta̱ suru.