1 Ana usana u tawai, reve Josuwa na ama a Isra'ila suru a̱ 'yon na̱ wasasa, reve a lyawa Shitim, reve a̱ ka̱ra̱ a̱ 'ya̱wa̱ o Uɗolu wa̱ Urudu, uba̱ta̱ u na a̱ va̱la̱i kafu a pasa uɗolu'u. 2 Ana a yuwain ayin a ta'atsu, reve azagbain a̱ uwa o uva̱la̱ta̱'a̱. 3 Reve a damma ama, <<A mantsa ma na ye enei Akpati a Nzuwulai a̱ A̱sulazuva A̱sula̱ a̱ ɗu na̱ nan ganu o ugundo wa̱ Levi utanuwu na̱ a̱yi, reve i 'yon uba̱ta̱ u na i ri a̱vu i kuru yi. 4 Ɗaɗa ye reve ure u na ya̱a̱ kuru, adama a na koto i kuru ure u nda shi. Amma i lyawa abala e memere ma̱ ɗu na̱ a̱yi a na aa rawa uɓatsulai u mili ta̱. She i rawa zuzu na̱ a̱yi wan.>>

5 Reve Josuwa damma ama'a, <<Ka̱mba̱toi aciya̱ɗu yo o'wo na akiza, adama a na nfa'an A̱sulazuva a ta yuwan ili ya asalama a̱tsuma̱ a̱ ɗu.>> 6 Reve Josuwa damma nan ganu, <<Tanuyi Akpati a Nzuwulai, a̱vu i ka̱ra̱ elime a ama.>> Ɗaɗa a tanu niyi reve a̱ ka̱ra̱ elime a ama'a.

7 Reve A̱sulazuva a damma Josuwa, <<Ili i na maa yuwan ana'an u ta fara a casu wu tsugbain e ekere a aza a Isra'ila, ne ɗa ama ee reve n to oɓolo na̱ a̱vu cine n da̱na̱i na̱ Musa. 8 Damma nan ganu a na a tanuyi Akpati a Nzuwulai, <Ni i rawa a̱ nge'en mu Uɗolu wa̱ Urudu, reve yi isawan a̱tsuma̱ a̱ mini.> >>

9 Reve Josuwa damma aza a Isra'ila, <<Ta̱wa̱i pa nda yu uwwa adanshi a̱ A̱sulazuva A̱sula̱ a̱ ɗu.>> 10 Reve Josuwa lyuwa elime u damma, <<Ne ɗa yee reve a na A̱sula̱ a wuma a̱ ri oɓolo na̱ a̱ɗu, waru na amayun u to lo aza a Ka'ana na aza a Hitiya na aza a Hiviya na aza a Periziya na aza a Girigashiya na aza a Amoriya na aza a Jebusiya. 11 Uwwai nda, Akpati a Nzuwulai a Zagbain vu uvaɗi suru a ta wala elime a̱ ɗu a uwa Uɗolu wa̱ Urudu. 12 Adama o ndolo gogo, ɗangulai ama kupa ne ejere o gundo va aza a Isra'ila, o ugundo suru vuma ta̱. 13 Reve a mantsa ma na apata a ana a nan ganu a na a tanuyi Akpati a Nzuwulai a A̱sulazuva Zagbain vu uvaɗi suru a̱ ju'wa̱in mini ma̱ Urudu, mini ma na mee yeneshe a̱ cipa̱ u to koɗuloi reve u ɓoloto u yuwan aganga uba̱ta̱ u ta̱.>>

14 Ana aza a Isra'ila a̱ pura̱i diga a̱ va̱la̱ta̱ le adama a pasa Uɗolu wa̱ Urudu, reve nan ganu a na a̱ ri utanuwu na Akpati a Nzuwulai'i a wala elime e le. 15 Mini'i u shi ta̱ u shiwan hali a̱ nge'en cine u tsu yuwan a mantsa ma wandari mantsa mo ugasa. Suru na̱ ne ana nan ganu gba o otoshi ana e le a̱tsuma̱ a̱ mini'i, 16 reve mini ma na mee yeneshe ma̱ gulu a̱vu u ɓoloto u yuwan aganga uba̱ta̱ u ta̱ gon alanga a̱ lyuci na a̱ tsu ɗe Ada̱mu za na ri zuzu na̱ Zaretan, mini ma na gba ma̱a̱ zurusu a Mala ma Araba, za na a̱yi ɗa Mala ma Akpaɗi u koɗo ta̱ suru suru. Ne ɗa ama a pasai a̱ nka̱la̱la̱i na̱ Jeriko. 17 Reve nan ganu a na a tanuyi Akpati a Nzuwulai a̱ A̱sulazuva e isawan nu ucira e iɗa yu u'yewu e memere mo Uɗolu wa̱ Urudu. Aza a Isra'ila gba suru a pasa ta̱ e iɗa yu u'yewu hali she ana o kotoi mapasa.