1 Reve Josuwa ulobo wa̱ Nun u lyungu aza a matawa mo utyo me iɗa e re usokowu diga Shitim, u damma, <<'Ya̱wa̱i i tawa utyo wi iɗa ya Ka'ana, waru i ka̱lyuwa̱ lyuci va̱ Jeriko la̱nga̱.>> Ana a̱ 'ya̱wa̱i a̱vu a cu'wan o u'wa wa aashakala a na a̱ tsu ɗe Rahapu.* 2 Reve a damma mogono ma̱ Jeriko, <<Mogono, ama a Isra'ila o ro a̱ ta̱wa̱ ta̱ pa na ayin a nda tsa̱ra̱ a tawa utyo wi iɗa'a.>> 3 Reve mogono'o ma̱ lyunguwa̱ Rahapu ikaka i nda, <<Uta̱a̱ ama a na a̱ ta̱wa̱i o u'wa wa̱ wu. A̱ lyungu le ta̱ tsa̱ra̱ a̱ ta̱wa̱ a tawa utyo wi iɗa'a suru.>>

4 Agba ka'a u tara ta̱ ɗe ama e re'e a̱vu u soko le. Reve u damma, <<Amayun a ɗa, a̱ ta̱wa̱ ta̱ pa, agba n reve uba̱ta̱ u na o uta̱i shi. 5 Nu ulivu, yashi i na a̱ tsu ɓa̱ru una̱ntsu u lyuci, ɗaɗa a̱ ka̱ra̱i. N reve ure u na a̱ kuruyi shi. Amma ni i jika̱ i kuru le, i ta gura cina le.>> 6 Agba ka'a u tara ta̱ ɗe ama'a a̱ tyo zuva vu ukwa̱'a̱, a̱vu wu pala le na agaruma a na u bazai. 7 Reve ama'a o uta̱ adama a zami a̱za̱ o uka̱lyuwusa̱ wi iɗa'a o ure a̱ tyo o Uɗolu wa̱ Urudu hali a rawa o upasata. Ana ama'a a̱ ka̱ra̱i reve a̱ ɓa̱rushi una̱ntsu.

8 Agba kafu aza a matawa mo utyo wi iɗa'a o von, a̱vu Rahapu kumba ɗe zuva vu ukwa̱'a̱. 9 Reve u damma le, <<N reve ta̱ a na A̱sulazuva a cayi ɗe ama a̱ ɗu iɗa i nda. Waru wovon u ɗu u reme tsu ta̱ lon, waru aza a na a̱ ri nden e iɗa i nda e te meje'en ma̱ lipu adama o wovon u ɗu. 10 Tsu uwwa ta̱ cine A̱sulazuva a ukwatoyin Mala ma̱ Shili ana yu uta̱i Masar. Waru tsu reve ta̱ cine i yuwain na̱ Sihon na̱ Og, ngono n re ma aza a Amoriya a asana o Uɗolu wa̱ Urudu, aza a na i kototoi suru suru.* 11 Ana tsu uwwai ne, okolo a̱ tsu a kuɗa ta̱ na̱ wovon. A̱vu okolo a za suru a da'wan adama a̱ ɗu, adama a na A̱sulazuva A̱sula̱ a̱ ɗu a̱yi ɗa A̱sula̱ ɗe zuva no o uvaɗi pa za̱la̱. 12 Gogo kucinaa numu na̱ A̱sulazuva a na i to roco mu isa'ani ya amayun na̱ a̱za̱ o u'wa a̱ tsu cine n roco nɗu. Ca numu iroci i na ma̱a̱ usu na̱ a̱ɗu. 13 Kucinaa numu a na yoo una dada na̱ mma va̱ shi, waru yoo una muwun ma̱ a̱na̱wun n va̱ ali na̱ a̱ma̱ci na aza a na a̱ ri a̱za̱ e le shi suru. She i lyawa o una tsu wan!>>

14 Reve ama'a a̱ usu yi, <<Tsu ca ta̱ wuma u tsu o una̱ u wuma u ɗu! Ni i pa̱lu'wa̱ tsu a alanga e eteshe shi, tsu to roco wu isa'ani ya amayun na̱ a̱ɓula̱ na̱ A̱sulazuva a ca tsu iɗa'a.>>

15 Rahapu da̱na̱ ta̱ o u'wa u na a suwai zuva uɓolu nu ukari u lyuci'i, ɗaɗa u yuwain ulinga na amunga reve wu telyuwetyo ama'a nu usowoto wu upepu. 16 Reve u damma le, <<Walai a̱ tyo e iɗa ya agaɗi adama a̱za̱ e izami'i a cina ɗu wan. Reve i pa'an ɗe rana ta'atsu hali she na̱ a̱za̱ e izami'i a̱ ka̱mba̱. Reve na̱ a̱ca̱pa̱ i reme ure u ɗu.>>

17 Kafu ama'a a̱ ka̱ra̱ reve a damma yi, <<Tsu to uta̱ a akucunu a nda a na vu zuwa ntsu tsu kucinai na̱ vu yuwan ili i na tsu damma nuwu shi. 18 Vu nla̱ amunga o uɗavu a̱ shili a nda o usowoto wu upepu u na vu telyuwetyo ntsu goon a mantsa ma na tsu uwai iɗa'a. Waru vu ɓoloto dada na̱ mma va̱ wu na̱ muwun ma̱ a̱na̱wun ma̱ wu, na ama o u'wa wa dada va̱ wu suru o u'wa wa̱ wu. 19 Za na suru uta̱i o u'wa wa̱ wu a̱ tyo a alanga, mpasa ma̱ yi n ta̱ da̱na̱ a aci a̱ yi, tsa̱a̱ da̱na̱ nu unusu shi. Amma za na suru amatoyin za na ri pe o u'wa wa̱ wu, mpasa ma̱ yi n ta̱ kuru tsu. 20 Amma na̱ vu pa̱lu'wa̱ ili i na i ta̱wa̱to ntsu, tsu to uta̱ a akucunu a na vu zuwa ntsu tsu kucinai.>> 21 Reve Rahapu damma, <<Lyawa wo o'wo cine i dammai.>> Reve u lyawa le a̱ ka̱ra̱. Reve wu nla̱ amunga a̱ shili'i o usowoto wu upepu'u.

22 Reve a̱ ka̱ra̱ a̱ tyo e iɗa ya agaɗi, a̱vu a pa'an ɗe hali rana ta'atsu, hali she ana a̱za̱ e itoni'i a̱ bunga̱i uba̱ta̱ suru agba e ene le shi. Reve a̱ ka̱mba̱ a̱ tsura̱ e ene le shi. 23 Reve ama e re'e e reme ure a̱ ka̱mba̱. A̱ cipa̱ ta̱ a agaɗi'i a̱vu a pasa uɗolu'u. Reve a̱ ta̱wa̱ ya̱ Josuwa ulobo wa̱ Nun. A̱vu a̱ ka̱mbuwa̱ yi ili i na i farai suru. 24 Reve a damma Josuwa, <<Amayun A̱sulazuva a ca tsu ta̱ iɗa'a suru e ekere a̱ tsu. Ama e iɗa'a suru e te meje'en ma̱ lipu adama o wovon u tsu.>>