Josuwa 23

Adanshi o ukosu a̱ Josuwa ya azagbain

1 Ana a jimai a na A̱sulazuva a cayi Isra’ila wivuwun e ekere a n’yuwatan n le n na n ri uka̱nda̱ruwu ne ele suru, reve waru Josuwa kutsa lon, 2 reve Josuwa ɗe aza a Isra’ila suru, mbara na azagbain na̱ a̱za̱ o uge’etosu na azagbain o uvon, a̱vu u damma le, <<N kutsa ta̱ lon. 3 Agba ye ene ta̱ ili i na A̱sulazuva A̱sula̱ a̱ ɗu a yuwain suru na̱ nɗa n nda suru adama a̱ ɗu, adama a na A̱sulazuva A̱sula̱ a̱ ɗu a ɗa a yuwain uvon o una̱ u ɗu. 4 Cuwain, cine n ne’eshein ugundo u ɗu suru agadu a nɗa n na m buwai suru oɓolo na̱ nɗa n na n lyuwai nu uvon, diga o Uɗolu wa̱ Urudu a̱ tyo a Mala ma Gbain a̱livu. 5 A̱sulazuva A̱sula̱ a̱ ɗu a̱ ta̱ loso le a̱ ma̱ka̱ka̱n ma̱ ɗu. U ta̱ gba̱ra̱ le o uta̱ a̱ ma̱ka̱ka̱n ma̱ ɗu, reve i usa iɗa i le yo o’wo za ɗu cine A̱sulazuva A̱sula̱ a̱ ɗu a yuwain nzuwulai.

6 <<Adama o ndolo i kapanu lon, i ka̱mbuwa̱ ugbozu i yuwan tsutoni ni ili i na suru i ri uɗanu a Aatagada a̱ Wila̱ wa Musa. She i ɓatsa ko usa’ani ko ugula̱ wan. 7 She i yuwan mmalu oɓolo na̱ nɗa n nda n na m buwai oɓolo na̱ a̱ɗu wan. She i ɗe ala a̱ musula̱ n le wan ko gba i kucina ne ele wan. She i yuwaan le a̱ga̱nda̱ ko i ka̱ɗa̱ta̱wa̱ le wan. 8 Agba i suraa A̱sulazuva A̱sula̱ a̱ ɗu cine yaa yuwusan hali a̱ tyo ana’an.

9 <<A̱sulazuva a̱ gba̱ra̱a̱ ɗu ta̱ nɗa m gbagbain mu ucira a̱ ma̱ka̱ka̱n ma̱ ɗu. Hali na ana’an ko za gura isawan a̱ ma̱ka̱ka̱n ma̱ ɗu shi. 10 *23:10 Ka̱lyuwa̱: U.Wl 3:22Vuma ta̱ a̱tsuma̱ a̱ ɗu ta gura zuwa ama ukpakukupa (1,000) a suma adama a na A̱sulazuva A̱sula̱ a̱ ɗu a ta yuwusan uvon o una̱ u ɗu, cine u yuwain nzuwulai. 11 Adama o ndolo i ka̱mbuwa̱ ugbozu lon, i ciga A̱sulazuva A̱sula̱ a̱ ɗu.

12 <<Adama a na nni i ɓatsa a̱vu i ɓolo aci na akapi a ama a na a pasai a na a̱ ri oɓolo na̱ a̱ɗu, a̱vu i reme nzuwulai ne ele hali i reme muwwulai, 13 i reve na amayun a na A̱sulazuva A̱sula̱ a̱ ɗu a̱a̱ gba̱ra̱a̱ ɗu nɗa n nda a̱ ma̱ka̱ka̱n ma̱ ɗu waru shi. Agba o to o’wo ɗu a̱ka̱ri na̱ maza, asuɗu o ucina̱ u ɗu na awanda e esu a̱ ɗu, hali she ni i koto e iɗa i sa’ani i nda i na A̱sulazuva A̱sula̱ a̱ ɗu a ca nɗu.

14 <<Gogo ne tsun nda n ta gan na ma̱a̱ kuru ure u na vuma suru o uvaɗi tsu kuru. Agba i reve ta̱ o okolo a̱ ɗu na a wuma u ɗu suru a na ko ili i ta̱ i riya̱ shi a̱tsuma̱ a nzuwulai n sa’ani n na A̱sulazuva A̱sula̱ a̱ ɗu a yuwaan nɗu suru. Nzuwulai’i suru a shiwan ta̱, ko za ta̱ riya̱ shi. 15 Agba cine nzuwulai n sa’ani n na A̱sulazuva A̱sula̱ a̱ ɗu a yuwain nzuwulai suru adama a̱ ɗu a shiwain, ne ɗa A̱sulazuva a̱a̱ ta̱wa̱a̱ ɗu na̱ meleshe ma na u dammai suru, hali she nu u kototo ɗu diga e iɗa i sa’ani i nda i na u ca nɗu. 16 Nni i kuɗa akucunu a̱ A̱sulazuva A̱sula̱ a̱ ɗu a na u zuwa nɗu i kuru, a̱vu i 'ya̱wa̱ i yuwaan musula̱ n ro a̱ga̱nda̱ a̱vu i ka̱ɗa̱ta̱wa̱ le, reve gba upan wa̱ A̱sulazuva u puna̱ a aci a̱ ɗu, reve i koto a̱tsuma̱ e iɗa i sa’ani i na u ca nɗu babu usa̱n.>>