1 A ca ta̱ ugundo wa Manase mawun mo ufaru ma̱ Isuhu akunda e iɗa. Maki ɗa mawun mo ufaru ma Manase. Maki gba akaya a Giliyadu a ɗa, za na ushiyi upasu wa Giliyadu na̱ Bashan adama a na aza a Maki a̱ shi ta̱ ali o uvon o ucira. 2 Reve e ne'eshen akapi a akunda ama a Manase a na buwai o umatsun wa Abiyeza na̱ Helek na̱ Asiriyel na̱ Shekem na̱ Hefa na̱ Shemida. Ele nda ele ɗa olobo a Manase ulobo wa̱ Isuhu umatsun umatsun.

3 Zelofeha, ulobo wa Hefa ulobo wa Giliyadu, ulobo wa Maki ulobo wa Manase, u shi na̱ muwun ma ali shi, muwun me esheli n ɗa goon u shi ne ele. Ala a̱ muwun ma̱ esheli'i ele ɗa, Mala na̱ Nowa na̱ Hogula na̱ Milika na̱ Tiriza. 4 *Reve a̱ 'ya̱wa̱ uba̱ta̱ wa Eliyaza ganu, na̱ Josuwa ulobo wa̱ Nun na azagbain, reve a damma, <<A̱sulazuva a damma ta̱ Musa u ca tsu akunda a agadu a̱ tsu, oɓolo na̱ a̱za̱ a̱ tsu a̱ muwun ma ali.>> Ɗaɗa Josuwa ca nle akunda e le oɓolo na̱ muwun ma a̱na̱wun ma dada le, cine A̱sulazuva a dammai. 5 Manase tsura̱ ta̱ akunda kupa babu ni iɗa ya Giliyadu na̱ Bashan aza a na a̱ ri asana nu Uɗolu wa̱ Urudu, 6 adama a na muwun ma̱ esheli mu ugundo wa Manase a̱ ushi ta̱ akunda a agadu oɓolo na̱ limatan muwun ma ali. Reve a ca akapi a limatan va Manase iɗa ya Giliyadu.

7 Utyo wi iɗa ya Manase u reme ta̱ diga e iɗa yu ugana yu ugundo wa Asha a̱ tyo uyagi wa Mikimeta za na ri asana zuzu na̱ Shekem. Utyo'o u saɓa ta̱ a̱ tyo uyagi diga Mikimeta, a̱vu u ɓolo na aza a na a̱ ri na̱ nden En Tapuwa. 8 Iɗa i na i ka̱nda̱ruwa̱i Tapuwa u ta̱ e ekere a Manase, amma lyuci va Tapuwa'a o utyo wa Manase u ta̱ e ekere a ama a Ifiramu. 9 Reve utyo'o u za̱nluwa̱ a̱ tyo uyagi a uwa o Uyene wa Kana. Ilyuci i na i ri upasu wu uyagi wu uyene'e aza a Ifiramu a ɗa, ko na wo o'wo a̱ ta̱ a̱tsuma̱ o upasu wa Manase, amma utyo wi iɗa ya Manase u tu upasu wu ugana a̱ tyo o uyene'e, reve u koso a Mala ma Gbain. 10 Upasu wu uyagi za va Ifiramu ɗa, upasu wu ugana gba, za va Manase ɗa. Iɗa ya Manase u za̱nluwa̱ ta̱ a̱ tyo a mala'a nu utyo wa Asha upasu wu ugana, waru Isaka u ta̱ asana.

11 A̱tsuma̱ a pasu va Isaka na̱ Asha, Manase tsura̱ ta̱ waru Bet Shan na̱ Ibileyam, na̱ nda̱na̱ta̱ mo Do, za na a̱yi ɗa Nafot Do, na̱ En Do na̱ Ta'ana na̱ Megido, na̱ mulyuci n na n ri uka̱nda̱ruwu ne ele. 12 Amma ama a Manase a gura koto ilyuci i nda na̱ nden shi, adama a na aza a Ka'ana a zuwa ta̱ okolo a̱ da̱nu pe a̱tsuma̱ e iɗa'a. 13 Amma mantsa ma na aza a Isra'ila a yuwain ucira lon, reve a zuwa aza a Ka'ana ulinga u tsugbashi nu ucira, agba a̱ gba̱ra̱ le suru suru shi.

14 Limatan va̱ Isuhu a damma ta̱ Josuwa, <<Nye i zuwai vu ca ntsu akunda a̱ ta̱ goon uba̱ta̱ wa agadu a̱ tsu? A̱yi ɗa nda tsu ta̱ na ama a̱bunda̱ waru A̱sulazuva a zuwaa tsu ta̱ aba'un lon.>>

15 Reve Josuwa usu le, <<Ni i ta̱ a̱bunda̱ ne, waru hali ni iɗa ya agaɗi za va Ifiramu ka̱la̱ma̱ ɗu ta̱, ka̱ra̱i a̱ 'ya̱wa̱ a̱rumbu i lapulaa aciya̱ɗu uba̱ta̱ pe a̱tsuma̱ e iɗa ya aza a Periziya ni iɗa ya aza a Refaya.>>

16 Reve limatan va̱ Isuhu a̱ usu, <<Iɗa ya agaɗi i rawa tsu shi. A̱yi ɗa nda aza a Ka'ana a na a̱ ri nden a agalaci suru a̱ ta̱ ni ikeke yi ido a̱za̱ e irumu, suru na aza a na a̱ ri Bet Shan na̱ mulyuci n na n ri uka̱nda̱ruwu na̱ a̱yi na aza a na a̱ ri nden o Uka̱ri wa Yezireyel.>>

17 Reve Josuwa damma ugundo wa̱ Isuhu, Ifiramu na̱ Manase, <<I ta̱ a̱bunda̱ waru nu ucira lon. Ya̱a̱ tsura̱ akunda e iɗa i ta̱ goon shi. 18 Amma iɗa ya agaɗi u to o'wo za ɗu waru, ko na wo o'woi a̱rumbu a ɗa, i lapula yi ulobonu i ushi yi suru. Ko na wo o'woi aza a Ka'ana a̱ ta̱ ni ikeke yi ido yi irumu waru a̱ ta̱ nu ucira, i ta gura gba̱ra̱ le.>>