1 Reve iɓolo ya aza a Isra'ila suru o ɓoloto a̱ lyuci va̱ Shilo, a̱vu a̱ shuwa̱ lo Oogodo o Uga'asusan. A lyuwa ta̱ iɗa'a nu uvon, 2 agba gundo cindere va aza a Isra'ila buwa ta̱ aza a na koto shi a cayi agadu e le shi.

3 Ɗaɗa Josuwa dammai aza a Isra'ila, <<Cine tsaa ɗa ya̱a̱ da̱na̱ e ipiri yaa usa iɗa i na A̱sulazuva A̱sula̱ a nkaya n ɗu a ca nɗu shi? 4 Ta̱wa̱yi na ama a ta'atsu o ugundo suru, n ta̱ lyungu le a gara iɗa'a suru. Reve a ɗana ucuɗuwu cine iɗa'a u ri, na̱ cine agadu a za suru oo o'wo a̱vu a̱ ka̱mba̱ ya̱'a̱ va̱. 5 E te ne'eshen yi akunda e cindere. Yahuza ta̱ da̱na̱ uguzu nu upasu wa̱ yi upasu wu uyagi. Gundo va̱ Isuhu waru a̱ ta̱ da̱na̱ uguzu nu upasu u le upasu wu ugana. 6 I ɗana ucuɗuwu cine iɗa'a ya̱a̱ da̱na̱ ba̱ta̱ cindere, a̱vu i ta̱wa̱ na̱ a̱yi ya̱'a̱ va̱. N ta zuwaa ɗu agita pa a̱ ma̱ka̱ka̱n ma̱ A̱sulazuva A̱sula̱ a̱ tsu. 7 Ugundo wa̱ Levi a̱ ri na akunda a̱tsuma̱ a̱ ɗu shi, adama a na a̱ga̱nda̱ a tsuganu tsa̱ A̱sulazuva tsa ɗa agadu e le. Waru ugundo wa Gadu na̱ Roben nu uɓatsulai wu ugundo wa Manase a̱ ushi ta̱ ɗe agadu e le mavada mo Uɗolu wa̱ Urudu upasu wa asana, za na Musa aagbashi a̱ A̱sulazuva a ca nle.>>

8 Ana ama'a a̱ 'yoyin e reme ure adama a gara iɗa'a, a̱vu Josuwa damma le, <<'Ya̱wa̱i i gara iɗa'a i ɗana ucuɗuwu wa̱ yi, a̱vu i ka̱mba̱ ya̱'a̱ va̱. N ta zuwaa ɗu agita pa Shilo a̱ ma̱ka̱ka̱n ma̱ A̱sulazuva.>> 9 Reve ama'a a̱ 'ya̱wa̱ a̱ gara iɗa'a, a̱vu a ɗana ucuɗuwu wa̱ yi a aatagada o ukutsulusu lyuci lyuci ba̱ta̱ cindere. Reve a̱ ka̱mba̱ ya̱ Josuwa o uva̱la̱ta̱ a Shilo. 10 Reve gba Josuwa zuwaa le agita a̱ ma̱ka̱ka̱n ma̱ A̱sulazuva. Lo ɗa gba wu ne'eshein aza a Isra'ila iɗa'a gundo gundo.

11 Agita o ufaru e iɗa'a za vu ugundo wa Banyami u ɗa umatsun umatsun. U reme ta̱ e memere mo upasu u na a cayi ugundo wa Yahuza na̱ gundo va̱ Isuhu.

12 Utyo wu ugana u teme ta̱ diga o Uɗolu wa̱ Urudu. Reve u reme a̱ tyo uzuru wu ugana wa̱ Jeriko, a̱vu wu utula̱i a gawan e iɗa ya agaɗi a a̱livu. A̱vu wu uta̱ na̱ a̱tsumona a Bet Aven. 13 Reve utyo'o u reme a̱ tyo uyagi o uzuru wa̱ Luz za na a̱yi ɗa Betel, reve u zura̱ a̱ tyo Atarot Ada a masasan mo upasu wu uyagi wa Bet Horon va̱ Za̱la̱.

14 Reve utyo'o u saɓa upasu u ro, u vadala upasu wu uyagi diga upasu wa̱ a̱livu a masasan ma na ma̱ ri zuzu na̱ Bet Horon. A̱vu u koso Kiriyat Ba'al za na a̱yi ɗa Kiriyat Jeyarim, lyuci va aza a Yahuza. A̱yi ɗa utyo wa̱ a̱livu.

15 Utyo wu uyagi waru u teme ta̱ diga e ilyuci ya Kiriyat Jeyarim. Reve diga lo a̱livu'u utyo'o u reme a̱ tyo asana a̱ lyusu mini va Nefitowa. 16 Reve utyo'o u ka̱ra̱ a̱ cipa̱ a̱ tyo e ikyun ya agaɗi a na ri a̱ nka̱la̱la̱i nu Uka̱ri wa Ben Hinom za na ri o ukosu wu ugana wu Uka̱ri wa aza a Refaya. Reve waru u lyuwa elime a̱ cipa̱ a̱ tyo o Uka̱ri wa Hinom, o uzuru wu upasu wu uyagi u lyuci va aza a Jebusiya, a̱vu u zura̱ a̱ tyo En Roge. 17 Reve u konzo nu upasu wu ugana a̱ tyo En Shemesh, a̱vu u lyuwa elime a̱ tyo Gelilo za na ri a̱ nka̱la̱la̱i a gawan nu ure wa Adumim. A̱vu u zura̱ a̱ tyo a Aatali a Bohan ulobo wa̱ Roben. 18 Reve wu urulai a̱ tyo ugana o uzuru wa Bet Araba, a̱vu u cipa̱ a̱ tyo o Uka̱ri wa Araba. 19 Reve utyo'o u ka̱ra̱ a̱ tyo upasu wu ugana wa Bet Hogla. A̱vu u koso upasu wu ugana wu nge'en u Mala ma Akpaɗi o ukosu wu Uɗolu wa̱ Urudu nu uyagi. A̱yi nda a̱yi ɗa utyo wu uyagi.

20 Uɗolu wa̱ Urudu a̱yi ɗa utyo wa asana.

A̱yi ɗa utyo wa agadu o ugundo wa Banyami umatsun umatsun upasu suru.

21 Ugundo wa Banyami umatsun umatsun ele ɗa a̱ shi ni ilyuci i nda: Jeriko na̱ Bet Hogla na̱ Emek Kezi 22 na̱ Bet Araba na̱ Zemarayim na̱ Betel 23 na̱ Avim na̱ Para na̱ Ofura 24 na̱ Kefa Amoni na̱ Ofini na̱ Geba. A̱bunda̱ e ilyuci i le na̱ mulyuci n le kupa ne ejere a ɗa.

25 O ɓolo ta̱ waru na̱ Gibiyon na̱ Rama na̱ Biyaro 26 na̱ Mizfa na̱ Kefira na̱ Moza 27 na̱ Rekem na̱ Iripeye na̱ Tarala 28 na̱ Zela Hayele na̱ lyuci va aza a Jebusiya a̱yi ɗa Urishelima, na̱ Gibiya na̱ Kiriyat Jeyarim. A̱bunda̱ e ilyuci i le na̱ mulyuci n le kupa na̱ a̱za̱ a̱ na̱shin a ɗa.

A̱yi nda a̱yi ɗa agadu o ugundo wa Banyami umatsun umatsun.