1 Ana ngono n na n ri upasu wa̱ a̱livu wu Uɗolu wa̱ Urudu suru mu uwwai ili i na i farai, ngono mi iɗa ya agaɗi ne e iɗa i mugaɗi na̱ a̱za̱ o upasu wu nge'en m Mala ma Gbain hali a̱ tyo a nsasan ma Lebanon (ngono ma aza a Hitiya na aza a Amoriya na aza a Ka'ana na aza Periziya na aza a Hiviya na aza a Jebusiya), 2 a̱vu o ɓolo aci o ɓoloto adama a yuwan uvon na̱ Josuwa na aza a Isra'ila.

3 Amma ana ama a Gibiyon a uwwai ili i na Josuwa yuwain na̱ Jeriko na̱ Ai, 4 a̱vu o foɓo ugbozu u na a̱a̱ luma̱ le. Reve o foɓo ilyalya a̱vu a zami akuci e ibuhu a tanuwan nloli n le na akuci e itsa̱n vu kwan masayan ma̱ ina̱bi ma na ma kutsai wukaru nu wuzulu. 5 Reve o oto akashi a atan a na a̱ ri uleɓenuwu a ana e le na akuci a̱ a̱tugu. Ilyalya ya alya i na a tarai suru e 'yewe a̱vu a̱ pa̱luwa̱. 6 Reve a̱ 'ya̱wa̱ ya̱ Josuwa o uva̱la̱ta̱ a Gilga a̱vu a damma yi na ama a Isra'ila, <<Tsu uta̱ ta̱ e iɗa ya alanga, tsu ciga ɗu ta̱ i yuwan nzuwulai na̱ a̱tsu.>>

7 Amma a̱vu aza a Isra'ila a damma aza a Gibiyon aza a na ele ɗa aza a Hiviya, << U ta gura o'wo i ta̱ nden zuzu na̱ a̱tsu, cine tsa ɗa tsaa yuwan nzuwulai na̱ a̱ɗu?>>

8 A̱vu a damma Josuwa, <<A̱tsu agbashi a̱ ɗu a ɗa.>>

A̱vu Josuwa ece le, <<Nan zane ɗa a̱ɗu, waru te yu uta̱i?>>

9 A̱vu a damma yi, <<Aagbashi a̱ wu o uta̱ ta̱ e iɗa ya alanga lon adama a ala a̱ A̱sulazuva A̱sula̱ a̱ wu. Adama a na tsu uwwa ta̱ alabari a̱ yi ni ili i na suru u yuwain a̱tsuma̱ a Masar, 10 *ni ili i na suru u yuwain na̱ ngono n re ma aza a Amoriya aza a na a̱ shi asana nu Uɗolu wa̱ Urudu, Sihon mogono ma Heshibon na̱ Og mogono ma Bashan za na shi a Ashitaro. 11 Ɗaɗa mbara n tsu na ama a na a̱ ri nden e iɗa i tsu suru a damma ntsu, <Tarai ilyalya e ekere a̱ ɗu adama a mmalu, i 'ya̱wa̱ i cina aza a Isra'ila a̱vu i damma le, <<A̱tsu agbashi a̱ ɗu a ɗa, tsu ciga ɗu ta̱ i yuwan nzuwulai na̱ a̱tsu.>>> 12 Ilyalya i tsu i nda i shi ta̱ usuɗuwu ana tsu tara nle a 'wa tsu urana u na tsu uta̱i a̱ ta̱wa̱ ya̱'a̱ ɗu. Ka̱lyuwa̱, agba a̱yi ɗa nda gogo u 'yewei hali u pa̱luwa̱. 13 Itsa̱n vu kwan masayan ma̱ ina̱bi ma nda a̱ shi ta̱ usa'avu ana tsu shiton nle, gogo gba ele ɗa nda a karai. Waru a̱tugu a nda na atan a nda a kutsa ta̱ adama a mmalu ma alanga lon.>>

14 Reve aza a Isra'ila e kene a̱tsuma̱ e ilyalya'a agba e ece A̱sulazuva shi. 15 A̱vu Josuwa yuwan nzuwulai mu nden n lafiya ne ele, a̱vu u taraa le akucunu, u ta lyawa le wuma. Reve azagbain o oɓolo a ama a kucinaa le.

16 Amma ana a yuwain rana ta'atsu ana a yuwain nzuwulai mu nden n lafiya ne ele'e, a̱vu a uwwa a na nron mu nden n le n ɗa, a̱ ta̱ nden zuzu ne ele. 17 Reve aza a Isra'ila e reme mmalu, a̱vu a rawa e ilyuci i le o urana wa ta'atsu. Ilyuci i le i ɗa Gibiyon na̱ Kefira na̱ Biyaro na̱ Kiriyat Jeyarim. 18 Agba aza a Isra'ila a yuwan uvon ne ele shi, adama a na azagbain e le a taraa le ta̱ akucunu na̱ A̱sulazuva, A̱sula̱ a Isra'ila. Reve oɓolo a ama'a suru a yuwaan azagbain e le adanshawuya. 19 Amma a̱vu azagbai'in suru a damma ama'a, <<Tsu kucinaa le ta̱ ɗe na̱ A̱sulazuva, A̱sula̱ a Isra'ila, gogo tsu ri na tsa̱a̱ ju'wa̱n le shi. 20 Apa nda ili i na tsaa yuwan ne ele, tsu ta lyawa le a̱ da̱na̱ wuma ta̱wa̱ upan wa̱ A̱sulazuva u riya̱a̱ tsu wan, na̱ tsu kuɗa akucunu a na tsu yuwaan nle.>> 21 A̱vu azagbai'in a dammisa le, <<Lyawa nle wuma, amma o to o'wo aza a mokoɗo ma akpata na aza a na a̱ ri n ronusoo ama suru mini.>> Ne ɗa a kuruyi nzuwulai n na azagbain a yuwaan nle ɗe.

22 Reve Josuwa ɗe aza a Gibiyon a̱vu u damma le, <<Adama a̱ nye yu luma̱ ntsu ana i dammai, <Tsu ta̱ alanga na̱ a̱ɗu lon,> agba na amayun i ta̱ nden oɓolo na̱ a̱tsu? 23 Adama o ndolo a yuwaan ɗu ta̱ una̱, suru nɗu i ta̱ da̱na̱ agbashi kuci, ozo o mokoɗo ma ɗanga no ozo o morono ma̱ mini adama o u'wa wa̱ A̱sula̱ a̱ va̱.>>

24 Reve a̱ usu Josuwa, <<A damma ta̱ agbashi a̱ wu a alanga eteshe a na A̱sulazuva A̱sula̱ a̱ wu a zuwa ta̱ aagbashi a̱ yi Musa u ca wu iɗa'a suru, a̱vu vu kototo a̱za̱ e iɗa'a suru a̱ ma̱ka̱ka̱n ma̱ ɗu. Ɗaɗa tsu uwai wovon u ɗu lon adama a wuma u tsu, ɗaɗa tsu yuwain ili i nda. 25 Gogo tsu to o ukere wa̱ wu. Vu yuwan na̱ a̱tsu ili i na ve enei u lobonoi waru u ri mejege e ekere a̱ wu.>>

26 Reve Josuwa wawa le e ekere a aza a Isra'ila, agba o una le shi. 27 Amma a̱vu Josuwa ka̱mba̱to le ozo o mokoɗo ma ɗanga na aza a na a̱ ri n ronusoo oɓolo a ama mini diga o urana u ndolo na adama a masa'a a̱ A̱sulazuva uba̱ta̱ u na A̱sulazuva aa ɗangwa. Ne ɗa u ri hali a̱ tyo ana'an.