1 Ana Josuwa kutsai lon, A̱sulazuva a damma yi ta̱, <<Vu kutsa ta̱ lon, agba hali n gogo pasu vi iɗa'a na yaa usa a̱ ta̱ lon a̱bunda̱ lon.

2 <<Nda iɗa i na i buwai: upasu wa aza a Filistiya na aza a Geshura suru, 3 diga o Uɗolu wa̱ Shiho upasu wa asana a Masar a̱ tyo upasu wa̱ Ekuron wu ugana, pasu'u suru za va aza a Ka'ana a ɗa. U ɓolo ta̱ iɗa i ton i tsugbain tsa aza a Filistiya aza a na a yuwusan tsugbain tsa Gaza na̱ Ashido na̱ Ashikelon na̱ Gat na̱ Ekuron. Iɗa ya aza a Aviya 4 upasu wu uyagi koto a lyuwa yi nu uvon shi. Upasu wu ugana koto a̱ shi a lyuwa pasu nda shi, iɗa ya aza a Ka'ana suru diga a̱ lyuci va Ara va aza a Sidon hali a̱ tyo a̱ lyuci va Afe a rawa o utyo wa aza a Amoriya. 5 Waru koto a̱ shi a lyuwa upasu wa aza a Geba, ni iɗa ya Lebanon suru a̱ tyo asana shi, diga Ba'al Gadu e ikyun i Masasan ma Hamon hali a̱ tyo Lebo Hamat.

6 <<*Adama a aza a na a̱ ri na̱ nden a nsasan diga Lebanon a̱ tyo Misrefot Mayim, suru aza a Sidon, a̱mu na aciya̱va̱ n ta̱ lo le a̱ ma̱ka̱ka̱n ma aza a Isra'ila. Vu reve vu ne'esheen ta̱ aza a Isra'ila iɗa i nda wo o'wo agadu e le cine n damma nuwu. 7 Vu ne'esheen gundo kuci nu uɓatsulai wu ugundo wa Manase agadu.>>

8 *Uɓatsulai wu ugundo wa Manase u na u buwai nu ugundo wa̱ Roben nu ugundo wa Gadu a̱ ushi ta̱ ɗe akunda a agadu za na ri upasu wa asana wu Uɗolu wa̱ Urudu cine Musa aagbashi a̱ A̱sulazuva e ne'esheen nle.

9 Utyo wi iɗa'a u saɓa ta̱ diga a̱ lyuci va Arowa za na ri a̱ nge'en mu Uɗolu wa Anon, diga a̱ lyuci na ri e memere mo uka̱ri'i, reve o ɓolo nu upasu wa agalaci wa agaɗi vi ilyuci va Medeba a̱ tyo Dibon suru. 10 Waru u ɓolo ta̱ na̱ ilyuci i mogono Sihon suru va aza a Amoriya za na da̱na̱i o tsugono tsa Heshibon, hali a̱ tyo o utyo wa aza a Amon. 11 Waru u ɓolo ta̱ nu upasu wa Giliyadu nu upasu wi iɗa ya Geshu na̱ Ma'aka na̱ Masasan ma Hamon suru, nu upasu wa Bashan suru hali a̱ tyo Saleka. 12 Ele nda a̱ ta̱ a̱tsuma̱ o tsugono tsa Og va Bashan za na yuwain tsugono tsa Ashitaro na̱ Edirai. A̱yi ɗa a̱ nde'en goon za na la'ai a̱tsuma̱ a aza a Refaya. Musa gba u lyuwa le ta̱ nu uvon reve u gba̱ra̱ le. 13 Amma aza Isra'ila a̱ gba̱ra̱ aza a Geshu na aza a Ma'aka shi, adama o ndolo a ɗa a lyuwai elime na̱ nden e memere ma aza a Isra'ila hali na ana'an.

14 *Amma ugundo wa̱ Levi u ɗa goon Musa cayi agadu shi, ana wo o'woi kucci na a yuwain na akina va̱ A̱sulazuva A̱sula̱ aza Isra'ila agadu e le a ɗa, cine A̱sulazuva a yuwaan nle nzuwulai.

15 A̱yi nda a̱yi ɗa ili i na Musa cayi ugundo wa̱ Roben, umatsun umatsun.

16 Upasu wi iɗa'a u fara ta̱ diga a̱ lyuci va Arowa za na ri a̱ nge'en mu Uɗolu wa Anon, na̱ lyuci na ri e memere mo uka̱ri'i, waru nu upasu wa agalaci wa agaɗi e ilyuci va Medeba suru, 17 a̱ tyo Heshibon na̱ ilyuci i na i ri upasu wa agalaci wa agaɗi suru, oɓolo na̱ Dibon na̱ Bamo Ba'al na̱ Bet Ba'almeyon 18 na̱ Yaza na̱ Kedemo na̱ Mefa'a 19 na̱ Kiriyatayim na̱ Sibima na̱ Zere Shaha aagaɗi a na a̱ ri o uka̱ri 20 na̱ Bet Peyo ni ikyun i Masasan ma Pisiga na̱ Bet Jeshimo. 21 Ele nda suru ilyuci i ɗa i na i ri upasu wa agalaci wa agaɗi. Utyo wa̱ Roben waru u ɓolo ta̱ na̱ tsugono tsa Sihon mogono ma aza a Amoriya, za na yuwain tsugono a Heshibon. Musa lyuwa yi ta̱ nu uvon hali na azagbain a Midiya. Ele ɗa Ivi na̱ Rekem na̱ Zur na̱ Hur na̱ Reba. Suru nle a yuwan ta̱ tsugono tsi iɗa'a za̱la̱ mogono ma gbain ma Sihon. 22 Babu na aza a na o unai uba̱ta̱ o uvon, aza Isra'ila a paɗa ta̱ Balam ulobo wa̱ Beyo za yindi na̱ matsun na̱ pe'eni. 23 Utyo wu upasu wu ugundo wa̱ Roben a̱yi ɗa Uɗolu wa̱ Urudu. Ilyuci i nda na̱ mulyuci n le ɗa a cayi ugundo wa̱ Roben agadu e le, umatsun umatsun.

24 A̱yi nda a̱yi ɗa ili i na Musa cayi ugundo wa Gadu, umatsun umatsun.

25 Utyo wi iɗa i le u ɓolo ta̱ na̱ Jaza, ni ilyuci ya Giliyadu suru, na akapi o upasu wa Amon hali a̱ tyo Arowa, za na ri zuzu na̱ Raba. 26 Utyo wi iɗa i le u ka̱ra̱ ta̱ a̱ tyo diga a̱ lyuci va Heshibon a̱ tyo Ramat Mizfa na̱ Betonim, na̱ diga a̱ lyuci va Mahanayim a̱ tyo utyo wa Debi. 27 Waru utyo wi iɗa i le u ɓolo ta̱ na̱ a̱tsuma̱ o Uka̱ri wu Uɗolu wa̱ Urudu, lyuci va Bet Haram na̱ Bet Nimra, na̱ Suko na̱ Zafon na̱ akapi o tsugono tsa Sihon mogono ma Heshibon. Uɗolu wa̱ Urudu wo o'wo ta̱ utyo wu upasu u le wi iɗa'a wa̱ a̱livu, u saɓa ta̱ ugana hali a̱ tyo o utyo u Mala ma̱ Ga̱lili. 28 Ilyuci i nda na̱ mulyuci n le, ele ɗa a cayi o ugundo wa Gadu o una̱ wa agadu e le, umatsun umatsun.

29 A̱yi nda a̱yi ɗa ili i na Musa cayi uɓatsulai wu ugundo wa Manase, umatsun umatsun.

30 Utyo wi iɗa i le u fara ta̱ diga Mahanayim a̱vu u ɓolo nu upasu wa Bashan suru, suru tsugono tsa Og mogono ma Bashan, na̱ suru mulyuci ma Jayi kupota̱li aza a na a̱ ri Bashan. 31 Waru utyo'o u ɓolo ta̱ na̱ uɓatsulai wu upasu wa Giliyadu, na̱ Ashitaro, na̱ Edirai, a na ilyuci i gbagbain i tsugono tsa Og va Bashan. Ele nda suru ele ɗa a cayi umatsun wa Maki ulobo wa Manase umatsun umatsun.

32 A̱yi nda ɗa akunda agadu e iɗa i na Musa ne'eshein mantsa ma na u da̱na̱i a agalaci a̱ Mowa asana nu Uɗolu wa̱ Urudu a̱ nka̱la̱la̱i na̱ Jeriko. 33 *Amma Musa ca ugundo wa̱ Levi agadu e iɗa shi, adama a na A̱sulazuva A̱sula̱ a Isra'ila, a̱yi ɗa akunda agadu e le, cine u yuwaan nle nzuwulai.