1 Apa nda pasu na aza a Isra'ila a̱ ushiyi agadu e iɗa ya Ka'ana, aza a na Eliyaza ganu, na̱ Josuwa ulobo wa̱ Nun na azagbain a 'wa vu gundo va aza a Isra'ila e ne'eshen nle. 2 *Cine A̱sulazuva a dammai o una̱ wa Musa, gundo kucci nda nu uɓatsulai a̱ ushi ta̱ akunda a agadu e le na̱ mazuwa ma agita. 3,4 *Limatan va̱ Isuhu e ne'eshen yi ta̱ ɗe gundo re, ugundo wa Manase na̱ za va Ifiramu. Waru Musa ca ta̱ ɗe ugundo wa̱ Roben agadu o upasu wa asana o Uɗolu wa̱ Urudu nu uɓatsulai wu ugundo wa Manase nu ugundo wa Gadu. Amma u ca ugundo wa̱ Levi ko akunda a̱ ta̱ a agadu oɓolo na aza a Isra'ila e iɗa'a shi, she lyuci na a̱a̱ da̱nu pe goon na̱ ba̱ta̱ va alyuna vi iliyamunga i le ni inama yu 'wa i le. 5 Ne ɗa aza a Isra'ila e ne'eshen iɗa'a cine A̱sulazuva a dammai Musa.

6 *Reve ama a Yahuza a̱ ta̱wa̱ uba̱ta̱ wa̱ Josuwa ɗe Gilga, reve Keleb ulobo wa̱ Jefune vuma va Keniziya damma yi, <<Vu reve ta̱ ili i na A̱sulazuva a dammai Musa, vuma va̱ A̱sula̱ ɗe Kadesh Baniya adama a̱ wu na̱ a̱mu. 7 *A̱mu na a'wan amunga mantsa ma na Musa aagbashi a̱ A̱sulazuva a̱ lyungu numu diga Kadesh Baniya n tawa utyo wi iɗa'a. Reve a̱mu gba n ta̱wa̱a̱ yi nu ucuɗuwu cine me enei o okolo a̱ va̱. 8 Amma a̱za̱ a̱ va̱ a na a̱ 'ya̱wa̱i oɓolo na̱ a̱mu, a zuwa ta̱ okolo a ama a kuɗa na̱ wovon. Agba a̱mu n kuru ta̱ A̱sulazuva A̱sula̱ a̱ va̱ no okolo a̱ ta̱. 9 *Adama o ndolo a ɗa o urana u ndolo Musa kucinaa numu, <Iɗa i na anana a̱ wu a dasai suru u to o'wo agadu a̱ wu, a̱vu na̱ limatan va̱ wu babu ukotu, adama a na vu kuru ta̱ A̱sulazuva A̱sula̱ a̱ va̱ no okolo a̱ ta̱.>

10 <<Adama o ndolo, ka̱lyuwa̱i, cine A̱sulazuva a yuwain nzuwulai, u lyawa mu ta̱ wuma hali a'wan amunga no ozo o ton diga a mantsa ma na u dammai Musa ne, mantsa ma na aza a Isra'ila a̱ shi a mmalu a̱tsumona. Ka̱lyuwa̱i, a̱mu ɗa nda ana'an, a'wan kupakunla̱ no ozo o ton! 11 A̱mu ɗa nda gba hali na ana'an nu ucira tsa mantsa ma na Musa lyungu numu. Ne gba n ta̱ nu ucira hali n gogo u na moo uta̱ n 'ya̱wa̱ uvon na̱ n yuwin linga ro, cine n da̱na̱i nu ufaru. 12 Adama o ndolo, gogo she vu ca mu upasu wi iɗa ya agaɗi i na A̱sulazuva a yuwaan numu nzuwulai o urana u ndolo. A̱vu na aciya̱wu vu uwwa ta̱ a mantsa'a a na nu ufaru aza a Anaku a ɗa a̱ da̱na̱i ɗe, waru ilyuci i le i da̱na̱ ta̱ gbagbain uka̱nda̱ruwu na̱ kari, agba ni ikambi ya̱ A̱sulazuva n ta̱ gba̱ra̱ le cine u dammai.>>

13 Reve Josuwa zuwaa Keleb ulobo wa̱ Jefune aba'un, a̱vu u ca yi Heburon o una̱ wa agadu a̱ yi. 14 Adama o ndolo a ɗa Heburon o'woi za va Keleb ulobo wa̱ Jefune za va Keniziya hali na ana'an, adama a na u kuru ta̱ A̱sulazuva, A̱sula̱ a Isra'ila no okolo a̱ ta̱. 15 A̱ shi ta̱ a̱ tsu ɗe Heburon, Kiriyat Arba, na ala a Arba za na shi la'ai koyan ɗa tsugbain a̱tsuma̱ a aza a Anaku.

Reve gba iɗa'a yi ivuwan nu uvon.