1 Ana aza a Isra'ila suru o kotoi mapasa ma̱ Urudu, reve A̱sulazuva a damma Josuwa, 2 <<Ɗangula ama kupa ne ejere a̱tsuma̱ a ama, ugundo suru vuma ta̱. 3 Reve vu damma le a tara atali kupa ne ejere diga e memere mo Uɗolu wa̱ Urudu, uba̱ta̱ u na nan ganu e isawain nu ucira. Reve a tara le, a̱vu a zuwa le uba̱ta̱ u na yaa cu'wan na ayin a ana'an.>>

4 Ɗaɗa Josuwa ɗeyi ama kupa ne ejere, aza a na u ɗangwai diga a̱tsuma̱ a aza a Isra'ila, vuma ta̱ o ugundo suru. 5 Reve u damma le, <<Walai i ka̱ra̱ Akpati a Nzuwulai a̱ A̱sulazuva A̱sula̱ a̱ ɗu a̱ tyo e memere ma̱ Urudu. Vuma suru a̱tsuma̱ a̱ ɗu u tanu aatali a̱ ta̱ e ilyungu ya̱ yi o una̱ wa̱ a̱bunda̱ vu gundo va aza a Isra'ila. 6 O o'wo iroci ya̱'a̱ ɗu. U ta gura o'wo ɗe elime muwun n ɗu n ta̱ ta̱wa̱ me ece ɗu, <Nye i ɗa ucuɗuwu wa atali a nda?> 7 I damma le a na, mini ma̱ Urudu mo koɗuloi ta̱ a mantsa ma na Akpati a Nzuwulai a̱ A̱sulazuva ma pasalai Uɗolu wa̱ Urudu. Atali a nda o to o'wo ili yu ucuwusan e ekere a aza a Isra'ila babu ukotu.>>

8 Reve aza a Isra'ila a yuwan cine Josuwa damma nle. A tara atali kupa ne ejere e memere mo Uɗolu wa̱ Urudu o una̱ wa̱ a̱bunda̱ vu gundo va aza a Isra'ila, cine A̱sulazuva a dammai Josuwa. Reve a tanu le a̱ tyo uba̱ta̱ u na a̱ va̱la̱i. Reve a zuwa le lo. 9 Reve Josuwa shuwa̱ atali kupa ne ejere o ro e memere ma̱ Urudu uba̱ta̱ u na nan ganu a na a tanuyi Akpati a Nzuwulai'i a̱ shi e isawain, waru atali'i a̱ ta̱ lo hali na ana'an. 10 Nan ganu na a tanuyi Akpati'i e isawan ta̱ e memere ma̱ Urudu'u hali she ana ama o kotoi ili i na A̱sulazuva a dammai Josuwa u damma ama biti, cine Musa dammai Josuwa.

Reve ama a̱ jika̱ a pasalai. 11 Reve ana ama o kotoshi mapasa, a̱vu Akpati a̱ A̱sulazuva na̱ nan ganu a pasa a̱ ma̱ka̱ka̱n ma ama. 12 Reve ugundo wa̱ Roben nu ugundo wa Gadu nu uɓatsulai wu ugundo wa Manase a pasalai ufoɓu ni itana yu uvon a̱ ma̱ka̱ka̱n ma aza a Isra'ila, cine Musa damma nle. 13 A ta rawa ama ukpakukupa amunga (40,000) ufoɓu adama o uvon a̱ ka̱ra̱la̱i a̱ ma̱ka̱ka̱n ma̱ A̱sulazuva a̱ tyo a agalaci a̱ Jeriko. 14 O urana u ndolo A̱sulazuva a ca ta̱ Josuwa tsugbain e ekere a aza a Isra'ila suru. Reve e reme a casu yi tsugbain a rana wuma va̱ yi suru cine a casuyi Musa.

15 Reve A̱sulazuva a damma Josuwa, 16 <<Damma nan ganu a na a̱ ri utanuwu na Akpati a Nzuwulai'i o uta̱ o Uɗolu wa̱ Urudu.>>

17 Reve Josuwa damma nan ganu'u, <<Uta̱i diga pe Urudu'u.>> 18 Reve nan ganu a na a̱ ri utanuwu na Akpati a Nzuwulai a̱ A̱sulazuva o uta̱ pe e memere ma̱ Urudu. Ana e le a dasa iɗa yu u'yewu, reve mini ma̱ Urudu ma̱ ka̱mba̱ cine u shi. A̱vu u shiwan hali a̱ nge'en cine u shi.

19 O urana wa kupa u woto wu ufaru u ɗa ama'a o uta̱i Urudu, reve a̱ va̱la̱ Gilga upasu wa asana wa̱ a̱tyo a̱ Jeriko. 20 Reve Josuwa shuwa̱ atali kupa ne ejere a na a tarai diga pe Urudu'u Gilga. 21 Reve u damma ama a Isra'ila, <<U ta gura o'wo ɗe elime muwun n ɗu n ta̱ ta̱wa̱ me ece ɗu mbara n le, <Nye i ɗa ucuɗuwu wa atali a nda?> 22 I damma le, <Aza a Isra'ila a pasa ta̱ Urudu e iɗa yu u'yewu.> 23 Adama a na A̱sulazuva A̱sula̱ a̱ ɗu a ukwatoyin mini ma̱ Urudu adama a̱ ɗu hali she ana i pasai, A̱sulazuva A̱sula̱ a̱ ɗu a yuwan ta̱ na̱ Urudu cine u shi u yuwain na̱ Mala ma̱ Shili, za na wu ukwatoyin adama a̱ tsu hali she na tsu pasai. 24 U yuwan ta̱ ne tsa̱ra̱ ama o uvaɗi suru e reve a na ukere wa̱ A̱sulazuva u ri nu ucira, waru adama yu uwwa wovon wa̱ A̱sulazuva A̱sula̱ a̱ ɗu hali hali hali.>>