1 Mantsa ma na Musa aagbashi a̱ A̱sulazuva a̱ kuwa̱i, reve A̱sulazuva a yuwaan Josuwa ulobo wa̱ Nun adanshi, za na da̱na̱i kambi va Musa. 2 Reve u damma, <<Aagbashi a̱ va̱ Musa kuwa̱ ta̱. Gogo a̱vu na ama a nda suru foɓoi a na yaa pasa Uɗolu wa̱ Urudu a̱ tyo e iɗa i na maa ca aza a Isra'ila. 3 N ta ca ɗu uba̱ta̱ u na apata a ana a̱ ɗu a dasai suru cine n yuwayin Musa nzuwulai.* 4 Utyo wu upasu u ɗu u te reme diga a̱tsumona a̱ tyo a nsasan n Lebanon, waru diga o Uɗolu u gbain wa̱ Yufiriti upasu wa asana oɓolo ni iɗa ya aza a Hitiya suru a̱ tyo a Mala ma Gbain a̱livu. 5 Ko vuma aa gura isawan a̱ ma̱ka̱ka̱n ma̱ wu shi a rana wuma va̱ wu. Cine n shi na̱ Musa ne ɗa ma̱a̱ da̱na̱ oɓolo na̱ a̱vu, maa lyawa wu ko n vari wu shi. 6 Vu kapanu vi isawan nu ucira! Adama a na a̱vu ɗa vaa tara ama a nda hali a̱ ushi iɗa i na n yuwayin nkaya n le akucunu a na maa ca le.* 7 Vu kapanu vi isawan nu ucira lon. Vu ka̱mbuwa̱ ugbozu vu yuwan tsutoni na̱ wila̱ u na aagbashi a̱ va̱ Musa ca nuwu suru. She vu ɓatsa ko usa'ani ko ugula̱ vu lyawa le wan, adama vu lyuwa aci a̱tsuma̱ e ili i ne vaa yuwan suru. 8 She vu lyawa Aatagada a̱ Wila̱ a nda a kasa nu una̱ wa̱ wu wan. Vu yuwusan majiyan ma̱ yi urana na ayin, adama vu ka̱mbuwa̱ ugbozu vu toni ili i na i ri pe uɗanu a̱tsuma̱ a̱ yi suru. Na̱ vu yuwan ne, vu ta lyuwa elime, reve waru vu lyuwa aci a̱tsuma̱ e ili suru. 9 Vu cuwan n damma wu ta̱ vu kapanu vi isawan nu ucira. She vu uwwa wovon wan, waru she okolo a̱ wu a kuɗa wan, adama a na A̱sulazuva A̱sula̱ a̱ wu u ta̱ da̱na̱ oɓolo na̱ a̱vu a̱tsuma̱ e ili i na vaa yuwan suru.>>

10 Reve Josuwa zuwa azagbain o uvon u damma, 11 <<Uwai o uva̱la̱ta̱ i damma ama, <Foɓoyi aciya̱ɗu ili ya alya, rana ta'atsu ɗa buwai i ta pasa Uɗolu wa̱ Urudu, reve i uwa i usa iɗa i na A̱sulazuva A̱sula̱ a̱ ɗu aa casu ɗu wo o'wo za ɗu.> >>

12 Reve Josuwa damma ugundo wa̱ Roben nu ugundo wa Gadu nu uɓatsulai wu ugundo wa Manase,* 13 <<I cuwan na adanshi a na Musa aagbashi a̱ A̱sulazuva a damma nɗu a na, <A̱sulazuva A̱sula̱ a̱ ɗu a ta casu ɗu wivuwun. U ta ca ɗu iɗa i nda.> 14 A̱ma̱ci a̱ ɗu na̱ muwun n ɗu ni iliyamunga i ɗu e te isawan e iɗa i na Musa ca nɗu asana o Uɗolu wa̱ Urudu. Amma a̱za̱ o uvon a̱ ɗu suru a ta pasa mavada ufoɓu ni itana yu uvon elime a̱ a̱za̱ a̱ ɗu reve i kamba le, 15 hali she mantsa ma na A̱sulazuva aa ca le wivuwun, cine u ca nɗu, waru she ne ele fo a usa iɗa i na A̱sulazuva A̱sula̱ a̱ ɗu aa casu le. A mantsa mo ndolo i ta gura ka̱mba̱ pa e iɗa ya agadu a̱ ɗu yo o'woto yi za ɗu, za na Musa aagbashi a̱ A̱sulazuva a ca nɗu upasalai wu Uɗolu wa̱ Urudu asana.>>

16 Reve a̱ usu Josuwa, <<Ili i na vu zuwa ntsu suru tsu ta yuwan, waru uba̱ta̱ u na suru vu lyungu ntsu tsu ta̱ 'ya̱wa̱. 17 Cine tsu yuwain tsutoni na̱ Musa e ili suru, ne ɗa tsaa yuwaan wu tsutoni. A̱yi de A̱sulazuva A̱sula̱ a̱ wu a̱ da̱na̱ oɓolo na̱ a̱vu, cine u shi na̱ Musa! 18 Za na suru yuwain aciyogbamu e ili i na vu zuwai reve u 'yuwan a̱ kuru adanshi a̱ wu, ili i na suru vu dammai, a̱ to una yi. A̱vu de vu kapanu vi isawan nu ucira!>>