1 Reve Musa 'yon diga a agalaci a̱ Mowa, reve u kumba a gawan Masasan ma Nebo a̱ tyo a̱ ncilecile ma Pisiga za na ri a̱ nka̱la̱la̱i na̱ Jeriko. Reve A̱sulazuva o roco yi iɗa'a suru diga Giliyadu hali a̱ tyo Dan, 2 nu upasu wa Nafutali suru, ni iɗa ya Ifiramu na̱ Manase ni iɗa ya Yahuza suru hali a̱ tyo a̱livu a Mala ma Gbain, 3 na̱ Nege nu upasu'u suru diga o Uka̱ri wa̱ Jeriko, Lyuci Gbain vu Shuwa hali a̱ tyo Zowa. 4 Reve A̱sulazuva a damma yi, <<A̱yi nda a̱yi ɗa iɗa i na n kucinayi Ibrahim ni Ishiyaku na̱ Yakubu, na n dammai, <N ta ca limatan le.> N lyawa wu ta̱ ve ene yi ne esu a̱ wu amma vaa pasa vu uwa pe shi.>>

5 Reve Musa aagbashi a̱ A̱sulazuva a̱ kuwa̱ ɗe a̱tsuma̱ a̱ Mowa cine A̱sulazuva a dammai. 6 Reve A̱sulazuva a̱ ciɗo yi pe a̱tsuma̱ a̱ Mowa, o uka̱ri a̱ nka̱la̱la̱i na̱ Bet Peyo, hali na ana'an ko za lo na revei uba̱ta̱ u na aaso'on u ri shi. 7 Musa da̱na̱ ta̱ na a'wan ukpaku nu ushin (120) ana u kuwa̱i, suru na̱ ne, esu a̱ yi a̱ ɗa̱mba̱ shi, a̱yi waru gba ubuwu nu ucira. 8 Reve aza a Isra'ila a yuwan nden n wirota̱ adama a Musa a agalaci a̱ Mowa, hali rana mata'atsu, hali she na mantsa ma̱ mesun mo kotoi.

9 Josuwa ulobo wa̱ Nun u ta̱ tapu na̱ ruhu vu urevu adama a na Musa kuruwa̱ yi ta̱ ekere. Reve aza a Isra'ila a yuwaan yi tsutoni, a̱vu a yuwan cine A̱sulazuva a dammai Musa.

10 Diga a mantsa'a koto a̱ da̱shi tsura̱ vumava̱sula̱ tsa Musa waru shi za na A̱sulazuva e revei esu ne esu, 11 za na yuwain iroci ya asalama ni ili ya asalama suru i na A̱sulazuva a̱ lyungu niyi u yuwan a̱tsuma̱ a Masar ya Firi'awuna na̱ ya azagbain a̱ yi suru ne e iɗa ya̱ yi suru. 12 Adama a na babu vuma na rocoi linga vu ucira ko u yuwain cu'un vu linga gbagbain wovon na Musa yuwain e esu a aza a Isra'ila suru.