1 <<Reve tsu vadala tsu ka̱ra̱ a gawan a̱ tyo upasu wa Bashan. A̱vu Og mogono ma Bashan na̱ a̱soja a̱ yi suru o uta̱ adama a yuwan uvon na̱ a̱tsu a̱ lyuci va Edirai. 2 Reve A̱sulazuva a damma mu, <She vu uwwa wovon wa̱ yi wan, n ca wu a̱yi ta̱ ɗe e ekere a̱ wu na̱ a̱soja a̱ yi suru ni iɗa ya̱ yi. Vu yuwan na̱ a̱yi cine vu yuwain na̱ Sihon mogono ma aza a Amoriya, za na yuwain tsugono tsa Heshibon.>

3 <<Ne ɗa A̱sulazuva A̱sula̱ a̱ tsu a ca ntsu fo Og mogono ma Bashan na̱ a̱soja a̱ yi suru e ekere a̱ tsu. Reve tsu kototo le tsu lyawa ko vuma ta̱ la'a shi. 4 A mantsa'a reve tsu lyuwa ilyuci i gbagbain ya̱ yi suru. Ko lyuci ta̱ tsu lyawa babu usa e ekere e le shi, ilyuci kupota̱li, nu upasu wi iɗa wa Argo suru uba̱ta̱ u tsugono tsa Og mogono a̱tsuma̱ a Bashan. 5 Ilyuci i nda suru a̱ shi ta̱ na̱ kari vu uga'an na̱ na̱ntsu vu ɗanga memere waru a̱ shi ta̱ na̱ mulyuci ma̱ a̱bunda̱ n na n ri na̱ kari shi. 6 Tsu kototo le ta̱ suru suru cine tsu yuwain na̱ Sihon mogono ma Heshibon. Tsu kototo ta̱ lyuci gbain suru, na ali na̱ a̱ma̱ci oɓolo na̱ muwun. 7 Amma iliyamunga nu utsuru wi ilyuci i na tsu lyuwai suru tso o'woto le ta̱ a̱za̱ a̱ tsu.

8 <<A mantsa'a ne ɗa tsu usai iɗa e ekere o ngono n re ma aza a Amoriya iɗa i na i ri asana a̱ Urudu, diga o Uɗolu wa Anon hali a̱ tyo a Masasan ma Hamon. 9 Aza a Sidon a̱ tsu ɗe ta̱ Hamon Siriyon, amma aza a Amoriya a̱ tsu ɗe yi ta̱ Seni. 10 Tsu lyuwa ta̱ ilyuci yu upasu wa agaɗi suru, nu upasu wa Giliyadu suru, nu upasu wa Bashan suru hali a̱ tyo Saleka na̱ Edirai, aza a na a̱ ri upasu u tsugono tso mogono Og a̱tsuma̱ a Bashan. 11 Og mogono ma Bashan ma ɗa goon ma la'ai o ugundo wa aza a Refaya. A̱ga̱da̱ a̱ yi a yuwan yi ta̱ ni irumu waru uga'an wa̱ yi u la'a ta̱ ana kupa na aza a ta'atsu, washin wa̱ yi ana a̱ ta̱li. U ta̱ ɗe a̱tsuma̱ a Raba va aza a Amon hali na ana'an.>>

12 <<A mantsa ma na tsu usai iɗa'a n ca ta̱ ugundo wa̱ Roben na̱ Gadu upasu wu ugana wa Arowa za na ri a̱ nge'en mu Uɗolu wa Anon, oɓolo nu uɓatsulai wi iɗa ya agaɗi wa Giliyadu ni ilyuci ya̱ yi. 13 Akapi e iɗa ya Giliyadu oɓolo na̱ Bashan suru, uba̱ta̱ u tsugono tso Og, upasu wi iɗa ya Argo suru, n ca ta̱ uɓatsulai wu ugundo wa Manase a̱yi. Upasu wa Argo u ndolo suru a̱tsuma̱ a Bashan a̱ shi ta̱ a̱ tsu ɗe yi iɗa ya aza a Refaya. 14 Jayi, za vu ugundo wa Manase u tara ta̱ upasu wa Argo suru diga o utyo wa aza a Geshu na aza a Ma'aka, a̱ shi ta̱ a̱ tsu ɗe yi na ala a̱ yi. A̱yi ɗa i zuwai hali na ana'an nda a̱ tsu ɗe Bashan, Havot Jayi. 15 Reve n ca Maki Giliyadu. 16 Reve n ca ugundo wa̱ Roben na̱ Gadu upasu u na u tarai diga Giliyadu a̱ cipa̱ a̱ tyo o uɗolu wa Anon, memere mo uka̱ri'i a̱yi ɗa utyo hali o utula̱i nu Uɗolu wa Jabo utyo wa aza a Amon. 17 Waru n ca le ta̱ Araba, Urudu a̱yi ɗa utyo wa̱ yi diga a Mala ma̱ Ga̱lili hali a̱ tyo a Mala ma Araba, Mala ma Akpaɗi, za̱la̱ vu uzuru wa Pisiga.

18 <<Reve n damma ɗu a mantsa'a, a na, <A̱sulazuva A̱sula̱ a̱ ɗu a ca ɗu ta̱ iɗa i nda wo o'wo za ɗu. Ama a̱ ɗu a na a rawai uvon suru, o to foɓo a pasa Uɗolu wa̱ Urudu. A ta uwa elime a̱ a̱za̱ a̱ ɗu aza a Isra'ila, a kamba le. 19 Amma a̱ma̱ci a̱ ɗu na̱ muwun n ɗu ni iliyamunga i ɗu n reve ta̱ i ta̱ ni iliyamunga a̱bunda̱ i lyawa le e ilyuci i gbagbain i na n ca nɗu. 20 Hali she na̱ A̱sulazuva a ca a̱za̱ a̱ ɗu wivuwun cine u ca nɗu, reve na a usa iɗa i na A̱sulazuva A̱sula̱ a̱ ɗu a casu le mavada ma̱ Urudu, za suru a̱tsuma̱ a̱ ɗu gba u ta gura ka̱mba̱ uba̱ta̱ u na n ca nɗu wo o'wo za ɗu.>

21 <<A mantsa'a n damma ta̱ Josuwa, <Ve ene ta̱ ne esu a̱ wu ili i na A̱sulazuva A̱sula̱ a̱ ɗu a yuwain na̱ ngono n re nda suru. Ne ɗa waa yuwan na̱ ngono mu uba̱ta̱ u na yaa pasa a̱ tyo suru. 22 She yu uwwa wovon u le wan; A̱sulazuva A̱sula̱ a̱ ɗu na aciya̱yi u ta yuwan uvon adama a̱ ɗu.>

23 <<A mantsa'a reve m pati A̱sulazuva n damma: 24 <A̱sulazuva Zagbain, vu fara ta̱ o rocosu aagbashi a̱ wu tsugbain tsa̱ wu nu ukere wu ucira wa̱ wu. Ma̱sula̱ ma̱ ne ma ɗa ma̱ ri lo zuva ko o uvaɗi na waa gura yuwan cu'un vi ili nda na̱ linga vu ucira tsa̱ wu? 25 Yuwan ankuri lyawa mu m pasa me ene iɗa i sa'ani i na i ri mavada ma̱ Urudu'u, iɗa ya agaɗi i sa'ani i ndolo na̱ Lebanon.>

26 <<Agba adama a̱ ɗu A̱sulazuva a yuwan ta̱ upan na̱ a̱mu, u poloo mu atsuvu shi. Reve u damma mu, <Wu ntsa ta̱ ne. She vu da̱shi yuwaan mu adanshi adama e ili i nda wan. 27 Kumba zuva vu ncilecile m masasan ma Pisiga, reve vu ka̱lyuwa̱ a̱ tyo a̱livu nu ugana nu uyagi na asana. Vu ka̱lyuwa̱ iɗa'a ne esu a̱ wu ulobonu adama a na vaa pasa Urudu nda shi. 28 Amma vu yuwaan Josuwa adanshi, reve vu gbamato yi asuvu vu ca yi ucira, adama a na a̱yi ɗa waa wala elime a ama a nda a pasa. Waru a̱yi ɗa waa zuwa le a usa iɗa i na vee ene'e wo o'wo za le.> 29 Ɗaɗa tsi isawain o uka̱ri'i a̱ nka̱la̱la̱i na̱ Bet Peyo.>>