1 <<Apa wila̱ ni ili i na ya̱a̱ kuru ni i ciga i 'yuwan i yuwan tsutoni ne ele a̱tsuma̱ e iɗa i na A̱sulazuva A̱sula̱ a nkaya n ɗu u ca nɗu wo o'wo za ɗu, ni i buwa wuma. 2 I lungusa̱ uba̱ta̱ u na ama a na yoo lo a yuwusaan a̱ma̱li e le a̱ga̱nda̱ suru suru a nsasan mu uga'an oɓolo na agaɗi na̱ za̱la̱ vu uɗanga u kpa̱la̱m suru. 3 Yi ɓoso musa'a n le, yi mura atali a̱ a̱ga̱nda̱ e le, a̱vu i kula̱to a̱shuwutsu a Ashera e le na akina, a̱vu yi gasa musula̱ n le. Tsundolo tsa ɗa yaa tasa ala e le a̱tsuma̱ a̱ ba̱ta̱'a̱.

4 <<Yaa yuwaan A̱sulazuva A̱sula̱ a̱ ɗu a̱ga̱nda̱ cine ele aa yuwusaan musula̱ n le a̱ga̱nda̱ shi. 5 Amma i zami uba̱ta̱ u na A̱sulazuva A̱sula̱ a̱ ɗu aa ɗangwaa ɗu a̱tsuma̱ o gundo ɗu, adama u zuwa Ala a̱ yi uba̱ta̱'a̱, adama a̱ nden ma̱ yi. Uba̱ta̱ u ɗaɗa ya̱a̱ tyo. 6 Ɗe ɗa ya̱a̱ ta̱wa̱a̱ na̱ kucci vu ukula̱tosu ɗu na̱ kucci ɗu, na̱ za ta̱ a̱tsuma̱ a kupa nu une'e u la̱nga̱ u ɗu na̱ kucci na i yuwain akucunu a na yaa ca, na̱ kucci vu ucigu wo okolo a̱ ɗu, nu umatsun wu ufaru wo oɓolo e inan i ɗu ni ikyon na̱ mgbele. 7 Ɗe a̱ ma̱ka̱ka̱n ma̱ A̱sulazuva A̱sula̱ a̱ ɗu, yaa lyuwa a̱vu i yuwan ma̱za̱nga̱, a̱ɗu na̱ a̱ma̱ci na̱ muwun n ɗu, a̱tsuma̱ o ulinga we ekere u na A̱sulazuva A̱sula̱ a̱ ɗu a zuwaa nɗu aba'un a̱tsuma̱ a̱ yi.>>

8 <<She i yuwan cine tsu yuwain pa nda ana'an wan, cine vuma suru aa yuwusan cine u cigai, 9 adama a na koto i rawa uba̱ta̱ u wivuwun shi, waru koto i tara agadu a na A̱sulazuva A̱sula̱ a̱ ɗu aa casu ɗu shi. 10 Amma mantsa ma na i pasai Uɗolu wa̱ Urudu, reve i da̱nu pe a̱tsuma̱ e iɗa i na A̱sulazuva A̱sula̱ a̱ ɗu aa casu ɗu wo o'wo agadu, u ta ca ɗu wivuwun e ekere a n'yuwatan n ɗu suru aza a na a̱ ri uka̱nda̱ruwu na̱ a̱ɗu, hali i tsura̱ nden mu uyo'o. 11 Reve i tara ili i na n damma nɗu suru a̱ tyo uba̱ta̱ u na A̱sulazuva aa ɗangula adama Ala a̱ yi a̱a̱ da̱na̱, ele ɗa: kucci vu ukula̱tosu ɗu na̱ kucci ɗu, za ta̱ a̱tsuma̱ a kupa ɗu nu une'e u la̱nga̱ u ɗu, oɓolo ni ili i sa'ani la̱nga̱ na i ri ne ele i na i kucinayi A̱sulazuva. 12 Uba̱ta̱ u ɗaɗa yaa yuwan ma̱za̱nga̱ a̱ ma̱ka̱ka̱n ma̱ A̱sulazuva A̱sula̱ a̱ ɗu na̱ a̱ɗu na̱ muwun n ɗu olobo ne esheli na agbashi a̱ ɗu a ali na̱ va̱ a̱ma̱ci na̱ nan Levi a na a̱ ri pe a̱tsuma̱ a̱ ɗu, a na a̱ ri na akunda na agadu oɓolo na̱ a̱ɗu shi. 13 Amma i yuwan ugbozu she i ca kucci vu ukula̱tosu u ɗu uba̱ta̱ e iwa̱u wan. 14 I ca le uba̱ta̱ u na A̱sulazuva aa ɗangwa goon a̱tsuma̱ e iɗa i ta̱ vu ugundo u ta̱ vu gundo ɗu, ɗe ɗa yaa yuwan ili i na n damma ɗu suru.>>

15 <<Amma suru na̱ ne, i ta gura paɗa a̱tsuma̱ e iliyamunga i na i ri ne ele a̱tsuma̱ e ilyuci i ɗu a̱vu i tama cine i cigai biti, a̱tsuma̱ a aba'un a na A̱sulazuva A̱sula̱ a̱ ɗu a ca nɗu. Vuma na ri idaba na̱ za na ri cece u ta gura tama tsu utamu wu nama mere'on ko meshon. 16 Amma she i tama mpasa wan, yoo oco yi e iɗa tsa̱ mini. 17 A̱tsuma̱ e ilyuci i ɗu i ciga i 'yuwan, she i lyuwa za ta̱ a̱tsuma̱ a kupa vi ishina na̱ masayan ma̱ ina̱bi ma sa'avu oɓolo na̱ mani'in, ko umatsun wu ufaru wu nama ko nan ko ikyon, ko kucci ɗu vu ushitosun wa akucunu, ko kucci na i cayi nu ucigu wo okolo, ko ne'en la̱nga̱ na i cayi wan. 18 Amma ele nda i ta tama le a̱ ma̱ka̱ka̱n ma̱ A̱sulazuva A̱sula̱ a̱ ɗu uba̱ta̱ u na A̱sulazuva A̱sula̱ a̱ ɗu aa ɗangwa, na̱ a̱ɗu na̱ muwun n ɗu olobo ne esheli na agbashi a ali a̱ ɗu na̱ va̱ a̱ma̱ci, na̱ nan Levi a na a̱ ri a̱tsuma̱ e ilyuci i ɗu. Waru i yuwan ma̱za̱nga̱ a̱ ma̱ka̱ka̱n ma̱ A̱sulazuva a̱tsuma̱ a linga na i yuwain ne ekere a̱ ɗu suru. 19 I yuwan ugbozu, she yi icina nan Levi wan mantsa ma na i ri pe nden a̱tsuma̱ e iɗa'a suru.>>

20 <<Na̱ A̱sulazuva A̱sula̱ a̱ ɗu a̱ da̱shi iɗa i ɗu mgbain cine u yuwaan ɗu nzuwulai, reve i damma, <N ciga ta̱ n tama inama,> na̱ tsundolo tsa ɗa, i ta gura tama cine i cigai. 21 Nu uba̱ta̱ u na A̱sulazuva A̱sula̱ a̱ ɗu a cigai u zuwa Ala a̱ yi u ri alanga lon na̱ a̱ɗu, i ta gura paɗa nama ro cine u zuwa nɗu i yuwan, ko a̱tsuma̱ e inan ko a̱giri'i, ko waru nga̱ji aza a na A̱sulazuva a ca nɗu. Cine n damma nɗu, I ta gura tama cine i cigai a̱tsuma̱ e ilyuci i ɗu. 22 I ta tama le cine i tsu tama nama mere'on ko nama meshon. Aza a na a̱ ri cece na aza a na a̱ ri idaba suru a ta gura tama inama'a. 23 Amma she i tama mpasa wan, adama a na mpasa'a wuma u ɗa, adama o ndolo she i tama wuma na̱ nama va̱ yi wan. 24 She i tama mpasa wan ko ke'en, yoo oco yi e iɗa tsa̱ mini. 25 She i tama mpasa'a wan, adama i da̱nu lafiya na̱ a̱ɗu na̱ muwun ma̱ a̱ca̱pa̱ n ɗu, adama a na i ta̱ da̱na̱ a yuwusan ili ya̱ a̱ɓula̱ e ekere a̱ A̱sulazuva.>>

26 <<Amma gba ne'e va akiza ɗu na̱ kucci ɗu vu ushitosun wa akucunu i tara i 'ya̱wa̱a̱ uba̱ta̱ u na A̱sulazuva a ɗangwai. 27 I ca kucci vu ukula̱tosu ɗu a masa'a ma̱ A̱sulazuva A̱sula̱ a̱ ɗu, mpasa ni inama'a. I ciga i 'yuwan i tsun mpasa n na i yuwayin kucci'i zuzu na̱ masa'a ma̱ A̱sulazuva A̱sula̱ a̱ ɗu, agba i ta gura tama nama'a. 28 I yuwan ugbozu i yuwan tsutoni ni ili i na n zuwai i na maa casu ɗu, adama ili i wala ɗu mejege kuci, oɓolo na̱ muwun ma̱ a̱ca̱pa̱ n ɗu, adama a na i ta̱ da̱na̱ a yuwusan ili i sa'ani ni ili i mejege e ekere a̱ A̱sulazuva A̱sula̱ a̱ ɗu.

29 <<A̱sulazuva A̱sula̱ a̱ ɗu o to losoo ɗu nɗa aza a na yaa uwa a̱tsuma̱ e le adama i lo le tsa̱ra̱ i tara nɗa n le wo o'wo agadu a̱ ɗu i da̱nu pe. 30 Mantsa ma na o kototo nle a̱ ma̱ka̱ka̱n ma̱ ɗu, i yuwan ugbozu, she o o'wo ɗu maza ma na yaa zami adama i reve adama a̱ musula̱ n le wan a dansa, <Cine tsa ɗa nɗa n nda maa yuwusaan musula̱ n le a̱ga̱nda̱? Tsundolo tsa ɗa fo tsaa yuwan.> 31 I ciga i 'yuwan i yuwaan A̱sulazuva A̱sula̱ a̱ ɗu a̱ga̱nda̱ tse le wan, adama a na cine ele a tsu yuwusaan musula̱ n le a̱ga̱nda̱, a tsu yuwusan ta̱ ili yi idaba koko'o i na A̱sulazuva a 'yuwain. A̱ tsu kula̱to ta̱ olobo ne esheli na aa yuwusan kucci vu ukula̱tosu a̱ tyo a̱ musula̱ n le.

32 <<I reve i yuwan ta̱ tsutoni ni ili i na n damma nɗu suru, she i da̱shi ɗe wan, agba she i jebe wan.>>