1 <<I ciga A̱sulazuva A̱sula̱ a̱ ɗu, reve i guza̱ ili i na u cigai ni ili i na u dammai, na̱ wila̱ wa̱ yi ni ili i na u zuwai mantsa suru. 2 Ana'an nda i cuwan muwun n ɗu n ɗa me enei ko a uwwai oforo a̱ A̱sulazuva A̱sula̱ a̱ ɗu shi: tsugbain tsa̱ yi, nu ukere wu ucira wa̱ yi nu ukere wa̱ yi wuba̱ruwu, 3 ni iroci i na u yuwain a̱tsuma̱ a Masar, na̱ linga va asalama na u yuwayin Firi'awuna Mogono ma Masar oɓolo ni iɗa ya̱ yi ma̱ɓula̱. 4 A̱ɗu ɗa ye enei ili i na u yuwain na̱ a̱soja a Masar, oɓolo ni ido i le, ni ikeke yi ido i le, na̱ cine A̱sulazuva a zuwai mini ma Mala ma̱ Shili ma lyuwa nle a mantsa ma na a̱ da̱na̱i e itoni i ɗu, na̱ cine A̱sulazuva o kototo nle suru suru. 5 Muwun n ɗu me ene cine u yuwaan nɗu a̱tsumona hali i rawa uba̱ta̱ u nda shi. 6 Waru e ene ili i na u yuwain na̱ Datan na̱ Abiram, olobo a Eliyabu za vu ugundo wa̱ Roben, ana iɗa i kpa̱tu'wa̱i una̱ e memere ma aza a Isra'ila reve u soɗu le, oɓolo na̱ a̱ma̱ci na̱ muwun n le ni ili i na a̱ ri ne ele no ogodo ele ni ili i wuma i na a̱ ri ne ele suru shi. 7 Waru esu a̱ ɗu a ɗa e enei ili i gbagbain i na A̱sulazuva a yuwain biti.>>

8 <<Adama o ndolo, i yuwan tsutoni ni ili i na maa zuwusaa ɗu ana'an suru, tsa̱ra̱ i tsura̱ ucira u na ya̱a̱ 'ya̱wa̱ i usa iɗa i na yaa pasa Urudu adama wo o'wo za ɗu, 9 adama i jima a̱tsuma̱ e iɗa i na A̱sulazuva a kucinayi nkaya n ɗu u ta ca le, oɓolo na̱ muwun mu ugundo n le, iɗa i na yee yeneshe maani ni ishiki. 10 Adama a na iɗa i na i ri a ma'uwaa adama wo o'wo agadu a̱ ɗu u ri tsi iɗa ya Masar uba̱ta̱ u na yu uta̱i shi, uba̱ta̱ u na i tsu cu'wa̱n icu'un reve i reme a̱ tsusun mini tsa̱ a̱rumbu. 11 Amma iɗa i na yaa pasa a̱vu i lyuwa agadu a̱ yi'i, iɗa i ɗa i na i ri na agaɗi na̱ ka̱ri za na iro'i ya zuva yaa casu mini. 12 Iɗa i ɗa i na A̱sulazuva A̱sula̱ a̱ ɗu a̱a̱ ka̱lyuwusa̱. Esu a̱ A̱sulazuva A̱sula̱ a̱ ɗu a̱ ta̱ ya̱'a̱ yi kuci, diga ufaru wa aa'wan a̱ tyo ukosu wa̱ yi.

13 <<Adama o ndolo ni i yuwan tsutoni ni ili i na maa zuwusaa ɗu ana'an ulobonu a na, i ciga A̱sulazuva A̱sula̱ a̱ ɗu reve waru i yuwaan yi a̱ga̱nda̱ no okolo a̱ ta̱ na asuvu a̱ ta̱, 14 a̱vu gba n lyungu ni iro'i e iɗa i ɗu a mantsa ma̱ yi, mini mo ufaru na̱ za wandari adama i ɓoloto ishina i ɗu, na̱ masayan ma sa'avu ma̱ ɗu na̱ mani'in ma̱ ɗu. 15 A̱sulazuva a ta zuwa anlya a kungwa a atsusa a̱ ɗu adama inan i tsura̱ ilyalya, waru i ta lyuwa hali i cuwa̱n.

16 <<I yuwan ugbozu, na̱ ne ɗa shi okolo a̱ ɗu a̱ ta̱ luma̱ ɗu a̱vu i lyawa itoni ya̱ A̱sulazuva a̱vu i yuwaan musula̱ a̱ga̱nda̱ a̱vu waru i ka̱ɗa̱towa̱ le. 17 Reve gba A̱sulazuva a yuwan upan na̱ a̱ɗu lon, reve u kpa̱to una̱ntsu wa zuva adama u ca iro'i wan waru iɗa yaa matsan ili shi, i to koto babu usa̱n e iɗa i sa'ani i na A̱sulazuva aa casu ɗu. 18 I zuwa idanshi i va̱ i nda o okolo a̱ ɗu na a asuvu a̱ ɗu, yi nla̱ le o o'wo iroci e ekere a̱ ɗu, yi nla̱ le e icin i ɗu. 19 I rito muwun n ɗu ele, i yuwusan adanshi e le ni i ri nden o u'wa ko ni ri a mmalu o ure, ko nni i von ko nni i 'yon. 20 Waru i ɗana le a̱ na̱ntsu vu kobu ɗu na̱ a̱ na̱ntsu vu u'uwata wu ukari u lyuci u ɗu, 21 adama wuma u ɗu na̱ wuma u muwun n ɗu u jima a̱tsuma̱ e iɗa i na A̱sulazuva a yuwayin nkaya n ɗu akucunu, u ta ca le na̱ zuva buwa zuva vu uvaɗi.

22 <<Ni i yuwan tsutoni ni ili i na n zuwaa nɗu ulobonu suru a na, i ciga A̱sulazuva A̱sula̱ a̱ ɗu, i yuwan mmalu a̱tsuma̱ o ure wa̱ yi suru, reve i suraa yi. 23 Ni i yuwan tsundolo, A̱sulazuva o to lo n'yuwatan n ɗu suru elime a̱ ɗu, waru i ta gura lo nɗa m gbagbain n na n la'a nɗu a̱bunda̱ nu ucira. 24 Uba̱ta̱ u na apata a ana a̱ ɗu a dasai suru u to o'wo uba̱ta̱ u ɗu. Utyo u ɗu u to o'wo diga a̱tsumona a̱ tyo Lebanon, waru diga o Uɗolu wa̱ Yufiriti asana a̱ tyo a Mala ma Gbain. 25 Babu vuma na aa gura isawan a̱ ma̱ka̱ka̱n ma̱ ɗu. A̱sulazuva A̱sula̱ a̱ ɗu a ta zuwa uba̱ta̱ u na apata a ana a̱ ɗu suru a dasai a da'wan a uwwa wovon u ɗu, cine u yuwaan nɗu akucunu.>>

26 <<Ka̱lyuwa̱i, n ta zuwusa aba'un ko una̱ a̱ ma̱ka̱ka̱n ma̱ ɗu ana'an. 27 I ta̱ tsura̱ aba'un ni i yuwan tsutoni na̱ wila̱ wa̱ A̱sulazuva A̱sula̱ a̱ ɗu a na maa casu ɗu ana'an. 28 Una̱ u ta̱ kuru ɗu ni i 'yuwan a yuwan tsutoni na̱ wila̱ wa̱ A̱sulazuva A̱sula̱ a̱ ɗu reve i vadalaa ure wa̱ yi ucina̱ u na maa casu ɗu ana'an reve i toni musula̱ n ro, aza a na koto i revei shi. 29 Na̱ A̱sulazuva A̱sula̱ a̱ ɗu a̱ ta̱wa̱to ɗu a̱tsuma̱ e iɗa i na yaa uwa wo o'wo agadu a̱ ɗu, i yuwan adanshi a aba'u'un ɗe zuva Masasan ma Gerizim, waru i yuwan adanshi o una̱'a̱ a Masasan ma Eba. 30 Cine i revei, a̱ba̱jini a̱ba̱jini a nsasan n ndolo a̱ ta̱ mavada ma̱ Urudu, a̱livu o ure a̱ tyo upasu u na urana u tsu riya̱, zuzu na̱ ɗanga gbagbain va More a̱tsuma̱ e iɗa ya aza a Ka'ana, aza a na a̱ ri na̱ nden a̱tsuma̱ a Araba, upasu wa Gilga. 31 I ta pasa Uɗolu wa̱ Urudu adama i usa iɗa i na A̱sulazuva A̱sula̱ a̱ ɗu aa casu ɗu. Mantsa ma na wo o'woi agadu a̱ ɗu a̱vu i da̱nu a̱tsuma̱ a̱ yi, 32 i reve, i yuwan ta̱ tsutoni ni ili i na a zuwai suru na̱ wila̱ u na a zuwai a̱ ma̱ka̱ka̱n ma̱ ɗu ana'an.>>