1 Musa na̱ mbara ma Isra'ila a damma ta̱ ama, <<Yuwain tsutoni ni ili i na n damma nɗu ana'an nda suru. 2 A mantsa ma na i pasai Urudu a uwa a̱tsuma̱ e iɗa i na A̱sulazuva A̱sula̱ a̱ ɗu aa casu ɗu, i shuwa̱ atali a gbagbain a̱vu i sura le nu uruku. 3 A̱vu i ɗana ɗe idanshi i wila̱ i nda suru mantsa ma na i pasai a uwa a̱tsuma̱ e iɗa i na A̱sulazuva A̱sula̱ a̱ ɗu aa casu ɗu, iɗa i na yee yeneshe maani ni ishiki, cine A̱sulazuva A̱sula̱ a̱ ɗu a yuwayin nkaya nɗu nzuwulai. 4 Reve mantsa ma na i pasai Urudu, i shuwa̱ atali a nda zuva Masasan ma Eba, cine n zuwa nɗu ana'an, a̱vu i sura le nu uruku. 5 I suwaa A̱sulazuva A̱sula̱ a̱ ɗu masa'a ɗe, masa'a ma atali. Agba she i yuwan ulinga na atali a na e she'ein na̱ rumu wan. 6 I suwaa A̱sulazuva A̱sula̱ a̱ ɗu masa'a na atali a na e she'ein shi, reve i yuwaan A̱sulazuva A̱sula̱ a̱ ɗu kucci vu ukula̱tosu ɗe. 7 I casu kucci muwwulai ɗe, i tamasa le ni i yuwin ma̱za̱nga̱ a̱ ma̱ka̱ka̱n ma̱ A̱sulazuva A̱sula̱ a̱ ɗu. 8 A̱vu i ɗana idanshi i wila̱ i nda o uta̱ gbaru a atali a na i shuwa̱i'i.>>

9 A̱vu Musa na̱ nan ganu, aza a na ele ɗa nan Levi, a damma aza a Isra'ila suru, <<Poloi atsuvu, a̱ɗu aza a Isra'ila! Ana'an yo o'wo ta̱ ama a̱ A̱sulazuva A̱sula̱ a̱ ɗu. 10 Yuwain tsutoni na̱ A̱sulazuva A̱sula̱ a̱ ɗu, a̱vu i toni ili i na u zuwai ni ili i na a̱a̱ kuru i na maa casu ɗu ana'an.>>

11 O urana u ndolo u ɗa Musa dammai ama, 12 A mantsa ma na i pasai Urudu, gundo nda e te isawan zuva Masasan ma Gerizim a zuwaa ama aba'un: ugundo wa Saminu na̱ za va Levi na Yahuza na̱ Isaka na̱ Isuhu na̱ Banyami. 13 Gundo nda waru ele ɗa ee isawan zuva Masasan ma Eba a yuwan una̱: Ugundo wa̱ Roben na̱ za va Gadu na̱ Asha na̱ Zebulun na̱ Dan na̱ Nafutali. 14 Nan Levi a̱ ta̱ 'ya̱sa̱n uɗyo u le a damma ama a Isra'ila suru nu uɗyo wu ucira:

15 <<Una̱ u te reme vuma na suru she'ein ko u zuɗa̱i a̱ma̱li ili yi idaba e ekere a̱ A̱sulazuva ulinga wu za yirumishi, a̱vu u shuwa̱ yi usokowu. A̱vu ama suru a̱ usu,<Ami!> >>

16 <<Una̱ u te reme vuma na suru cayi dada va̱ yi ko mma va̱ yi tsugbain shi. Reve ama suru a̱ usu,<Ami!> >>

17 <<Una̱ u te reme vuma na suru tawai urotsu wu utyo wi iɗa u moron ma̱ nden ma̱ yi. Reve ama suru a̱ usu,<Ami!> >>

18 <<Una̱ u te reme vuma na suru pusa̱yin irumba̱ ure. Reve ama suru a̱ usu,<Ami!> >>

19 <<Una̱ u te reme vuma na suru putsayi mocin ko makpa'an ko ma̱runa̱ uge'etosu wa amayun. Reve ama suru a̱ usu,<Ami!> >>

20 <<Una̱ u te reme vuma na suru voyin na̱ ka va dada va̱ yi, adama a na u lyungusa̱ ta̱ a̱ga̱da̱ a dada va̱ yi. Reve ama suru a̱ usu,<Ami!> >>

21 <<Una̱ u te reme vuma na suru voyin na̱ cu'un vu nama suru. Reve ama suru a̱ usu,<Ami!> >>

22 <<Una̱ u te reme vuma na suru voyin na̱ mawun ma̱ a̱na̱wun ma̱ yi mo usheli, usheli wa dada va̱ yi ko usheli wa mma va̱ yi. Reve ama suru a̱ usu,<Ami!> >>

23 <<Una̱ u te reme vuma na suru voyin na̱ a̱na̱wa̱ e le. Reve ama suru a̱ usu,<Ami!> >>

24 <<Una̱ u te reme vuma na suru unai moron ma̱ nden ma̱ yi usokowu. Reve ama suru a̱ usu,<Ami!> >>

25 <<Una̱ u te reme vuma na suru ushiyi utowusu wu una̱ adama wu una vuma na ri nu unusu shi. Reve ama suru a̱ usu,<Ami!> >> 26 <<Una̱ u te reme vuma na suru usuyi idanshi i wila̱ u nda na waa yuwan ulinga ne ele shi. Reve ama suru a̱ usu,<Ami!>✝>>