1 <<Yashi i na ili i nda suru i cina nɗu na n zuwai elime a̱ ɗu aba'un nu una̱, ni i zuwa le o okolo a̱ ɗu uba̱ta̱ u na i ri suru a̱tsuma̱ a nɗa n na A̱sulazuva A̱sula̱ a̱ ɗu e bete'we nɗu a̱ tyo, 2 na̱ a̱ɗu na̱ muwun n ɗu i ka̱mba̱ uba̱ta̱ wa̱ A̱sulazuva A̱sula̱ a̱ ɗu a̱vu i yuwan tsutoni na̱ a̱yi no okolo a̱ ta̱ na asuvu a̱ ɗu suru cine n damma nɗu ana'an, 3 A̱sulazuva A̱sula̱ a̱ ɗu a̱ ta̱ ka̱mbuwa̱a̱ ɗu aba'un a̱ ɗu, a̱vu we ene iliyali i ɗu. Reve u ɓolotowiso ɗu diga a nɗa n na u shi u bete'we nɗu a̱ tyo. 4 Ko na̱ a̱ shi e bete'we ɗu a̱ 'ya̱wa̱ tsugbashi o ukosu wu uvaɗi, diga ɗe A̱sulazuva A̱sula̱ a̱ ɗu o to ɓoloto ɗu a̱vu u ka̱mba̱to ɗu. 5 U ta̱ ka̱mba̱to ɗu e iɗa yi nkaya n ɗu, u to o'wo ɗu agadu. U ta zuwa ɗu i yuwan aba'un waru i bala a̱bunda̱ i la'a nkaya n ɗu. 6 A̱sulazuva A̱sula̱ a̱ ɗu a ta zuwa okolo a̱ ɗu no okolo a̱ muwun n ɗu a̱ ka̱mba̱ pete, tsa̱ra̱ i ciga yi no okolo a̱ ɗu suru na asuvu a̱ ɗu suru, a̱vu i da̱na̱ wuma. 7 A̱sulazuva A̱sula̱ a̱ ɗu a ta yuwaan n'yuwatan n ɗu aza a na a 'yuwan nɗu waru a ca nɗu a̱tsuma̱lima̱ una̱ u nda suru. 8 Waru i ta yuwaan A̱sulazuva tsutoni a̱vu i toni ili i na u dammai suru i na maa casu ɗu ana'an. 9 A̱sulazuva A̱sula̱ a̱ ɗu a ta zuwa ɗu i yuwan aba'un a̱bunda̱ lon a̱tsuma̱ e ili i na yaa yuwan suru. I ta̱ tsura̱ muwun ma̱ a̱bunda̱ lon, mudindim, ni itana yu uɗuma̱. A̱sulazuva a ta yuwan ma̱za̱nga̱ u ca ɗu utsuru cine wu uwwai uyo'o wu nkaya n ɗu, 10 ni i yuwan tsutoni na̱ A̱sulazuva A̱sula̱ a̱ ɗu a̱vu i toni wila̱ wa̱ yi i yuwan ili i na u dammai i na i ri uɗanu a Aatagada a̱ Wila̱, a̱vu i ka̱mba̱ uba̱ta̱ wa̱ A̱sulazuva A̱sula̱ a̱ ɗu no okolo a̱ ɗu suru na asuvu a̱ ɗu suru.

11 <<Ili i na maa zuwusa ɗu ana'an u la'a ucira u ɗu shi, ko na ya̱a̱ kuɗa̱ a yuwan tsutoni na̱ a̱yi shi. 12 Wila̱'a̱ zuva ɗa a̱ ri shi, adama o ndolo yaa damma, <Zane ɗa aa kumba zuva u ta̱wa̱a̱ tsu ne ele, adama tsu uwwa reve tsu yuwan tsutoni ne ele?>✝ 13 Waru a̱ ri upasalai u mala shi, na yee ece, <Zane ɗa aa pasa mala'a u ta̱wa̱a̱ tsu ne ele adama tsu uwwa reve tsu yuwan tsutoni ne ele?> 14 I reve wila̱'a̱ a̱ ta̱ lo zuzu na̱ a̱ɗu, u ta̱ o una̱ u ɗu waru no o okolo a̱ ɗu adama i yuwan tsutoni ne ele.✝

15 <<A̱yi ɗa nda ana'an n zuwa ta̱ wuma nu ulyuwu we elime a̱ ma̱ka̱ka̱n ma̱ ɗu, ukwa̱ nu ukototosu. 16 Ana'an n ta dansaa ɗu i ciga A̱sulazuva A̱sula̱ a̱ ɗu, waru i wala e re va̱ yi, reve i kuru ili i na u zuwai ni ili i na a̱a̱ kuru na̱ wila̱ wa̱ yi. Ɗaɗa yaa da̱na̱ wuma reve i bala, waru A̱sulazuva A̱sula̱ a̱ ɗu a ta zuwaa ɗu aba'un a̱tsuma̱ e iɗa i na yaa zama i uwa wo o'wo ɗu agadu.

17 <<Agba nno okolo a̱ ɗu a vadala, a̱vu i 'yuwan a yuwaan yi tsutoni, waru nna a vadala ɗu i kingyo a̱ ma̱ka̱ka̱n ma̱ musula̱ n ro waru i yuwaan le a̱ga̱nda̱, 18 n dansaa ɗu ana'an, o to kototo ɗu suru. Waru yaa yuwan wuma wa̱ a̱bunda̱ e iɗa i na yaa zama i pasa Urudu i na woo o'wo za ɗu shi.

19 <<Ana'an n ɗe ta̱ zuva ni iɗa yo o'wo esu a aci a̱ ɗu, a na n zuwa ta̱ wuma nu ukwa̱ elime a̱ ɗu, nu una̱ na aba'un. Gogo i ɗangwa wuma adama a̱ɗu na̱ muwun n ɗu i da̱na̱ wuma. 20 I ciga A̱sulazuva A̱sula̱ a̱ ɗu, yu uwwa uɗyo wa̱ yi, reve i guza̱ yi ugbamu, adama a na A̱sulazuva a ɗa wuma u ɗu, waru u ta lyawa ɗu i yuwan wuma lon e iɗa i na u kucinayi nkaya n ɗu Ibrahim na̱ Ishiyaku na̱ Yakubu nzuwulai.>>