1 <<Mantsa ma na i 'ya̱wa̱i i yuwan uvon na̱ n'yuwatan n ɗu reve ye ene ido oɓolo ni ikeke yi ido na̱ a̱soja a na a la'ai a̱za̱ a̱ ɗu, she yu uwwa wovon u le wan, adama a na A̱sulazuva A̱sula̱ a̱ ɗu, za na uta̱a̱ nɗu a̱tsuma̱ a Masar, u to oɓolo na̱ a̱ɗu. 2 Kafu i teme uvon, ganu ta uwa elime a̱vu u yuwan adanshi na̱ a̱soja. 3 Apa ili i na waa damma: <Zuwai atsuvu a̱ɗu aza a Isra'ila, ana'an i ta̱ 'ya̱wa̱ uvon na̱ n'yuwatan n ɗu. She okolo a̱ ɗu a kuɗa wan ko yu uwwa wovon wan, ko lipu ɗu je'en wan ko yi da'wan a̱ ma̱ka̱ka̱n me le wan. 4 Adama a na A̱sulazuva A̱sula̱ a̱ ɗu u ta̱ 'ya̱wa̱ oɓolo na̱ a̱ɗu u yuwan nla̱ngi na̱ n'yuwatan n ɗu, waru u ta ca ɗu ulyuwu wa aci.>

5 <<Apa ili i na azagbain a̱ a̱soja aa damma a̱soja'a, <Za ro ta̱ lo na suwai u'wa u sa'avu agba koto u ca yi e ekere a̱ A̱sulazuva shi? Lyawa u ka̱mba̱ o u'wa, ta̱wa̱ u kuwa̱ a̱tsuma̱ o uvon reve nanza ca A̱sulazuva a̱yi. 6 Nanza cu'wa̱n ta̱ ɗe uɗuma̱ wa̱ ina̱bi, agba koto u fara a lyuwusa yi shi? Lyawa u ka̱mba̱ o u'wa, ta̱wa̱ u kuwa̱ o uvon reve nanza uwwa uyo'o wa̱ yi. 7 Nanza ta̱ ne egeɓe a na waa zama u zuwa, agba koto u zuwa yi shi? Lyawa u ka̱mba̱ o u'wa, ta̱wa̱ u kuwa̱ a̱tsuma̱ o uvon reve nanza zuwa yi.> 8 Reve azagbain a̱ a̱soja'a a̱ da̱shi damma, <Nanza ta̱ pa aa uwwusa wovon ko ukuɗu wo okolo? Lyawa u ka̱mba̱ o u'wa tsa̱ra̱ okolo a kuɗa a̱za̱ a̱ yi wan.> 9 Mantsa ma na azagbain a yuwayin a̱soja adanshi o kotoi, reve a ɗangwaa le nan yali ya̱ a̱soja.

10 <<Ni i rawa zuzu na̱ lyuci na ya̱a̱ riya̱a̱ nu uvon, i fara lyunguwa̱ le ni ikaka yi izami yi nden ma asuvu. 11 Na̱ a̱ usu ikaka yi izami yi nden ma asuvu'u a̱vu a ca aciyele e ekere a̱ ɗu, to, ama a̱ lyuci'i suru a ta yuwaan ɗu ulinga, a ta yuwaan ɗu tsugbashi. 12 Agba na a 'yuwan a̱ usu a yuwan nden ma asuvu na̱ a̱ɗu reve e teme uvon na̱ a̱ɗu, reve i ka̱nda̱ruwa̱ lyuci'i nu uvon. 13 Na̱ A̱sulazuva A̱sula̱ a̱ ɗu a ca ɗu lyuci ndolo e ekere a̱ ɗu, ali a na a̱ ri pe suru o una le na̱ matsun me pe'eni. 14 Amma a̱ma̱ci na̱ muwun ni iliyamunga oɓolo ni ili i na i ri pe a̱tsuma̱ a̱ lyuci'i i ta gura pura̱ le. U to o'wo ɗu agadu e ili i na a usai uba̱ta̱ wu uvon. I yuwan ulinga ni itana i na i usai uba̱ta̱ wu uvo'on, itana i na A̱sulazuva A̱sula̱ a̱ ɗu aa casu ɗu diga e ekere a n'yuwatan n ɗu. 15 Tsundolo tsa ɗa yaa yuwan ni ilyuci i na i ri alanga na̱ a̱ɗu suru, ilyuci ya ama a na a̱ ri zuzu na̱ nɗa n na n ri zuzu na̱ a̱ɗu shi.

16 <<Amma mantsa ma na i remei iɗa i na A̱sulazuva A̱sula̱ a̱ ɗu aa casu ɗu agadu a̱ yi, she i lyawa ko ili i ro wuma wan. 17 I kototo le suru suru, aza a Hitiya na aza a Amoriya na aza a Ka'ana, oɓolo na aza a Periziya na aza a Hiviya na aza a Jebusiya, cine A̱sulazuva A̱sula̱ a̱ ɗu a zuwa nɗu. 18 Na̱ ne ɗa shi o to rito ɗu ili yi idaba i na aa yuwusaan musula̱ n le, hali a zuwa ɗu i yuwan unusu e ekere a̱ A̱sulazuva A̱sula̱ a̱ ɗu.

19 <<Ni i jima a̱ ka̱nda̱ruwusa̱ lyuci nu uvon, adama i lyuwa yi, yoo una ɗanga lyuci'i na̱ wukoɗu u le na aɓau shi, adama a na i ta gura lyuwa limatan le, yoo koɗo le shi. Ɗanga vu una ama a ɗa shi a na ya̱a̱ ka̱nda̱ruwa̱ le nu uvon. 20 Amma gba, i ta gura koɗo ɗanga na i revei a tsu matsan muwun shi. Ele ndolo i ta gura yuwan ulinga ne ele i yuwan ukumbata adama o uvon hali she na̱ lyuci na ri a yuwusan uvon na̱ a̱ɗu riya̱.>>