1 <<Na̱ A̱sulazuva A̱sula̱ a̱ ɗu o kototo nɗa n na waa ca ɗu, a̱vu ni i lo le o uta̱ reve i da̱nu e ilyuci i le na̱ 'wa le, 2 i ne'eshen iɗa'a uta'atsu, a̱vu i tawa ilyuci i ta'atsu aza a na a̱ ri e memere me iɗa'a na̱ A̱sulazuva A̱sula̱ a̱ ɗu aa ca ɗu wo o'wo agadu a̱ ɗu. 3 I yuwan re a̱tsuma̱ e le, adama na̱ vuma una vuma ro u tsura̱ uba̱ta̱ u na waa suma a̱ tyo.

4 <<Apa cine wa̱a̱ da̱na̱ na̱ vuma una vuma babu ucigu, waru a̱ ri a n'yuwunlai ɗe a̱ca̱pa̱ shi, u ta gura suma a̱ tyo e ilyuci i ndolo adama u la'ato wuma wa̱ yi. 5 Iroci, a damma nanza 'ya̱wa̱ ta̱ magasa ma ɗanga oɓolo ni i'utsa̱ ya̱ yi o ogozo, reve za ta̱ a̱tsuma̱ a magasa reve rumu va aɓau sa̱nga̱ reve u gasa za ve ire hali wu una yi, a̱yi vuma na unai vuma'a, u ta gura suma a̱ tyo a̱ lyuci ta̱ vi ilyuci i ndolo, adama u wawa aciya̱yi. 6 Na̱ ne ɗa shi, a̱yi imaci i zuzu yi za na o unai za na cigai u tsupaa mpasa mu za va̱ yi, u ta gura toni vuma ndolo nu upan, reve u cina yi adama a na ure'e u ri alanga, reve wu una yi ko na wu ntsaa o una yi shi, adama a na u yuwan yi ta̱ babu n'yuwunlai ɗe a̱ca̱pa̱. 7 Adama o ndolo a ɗa n zuwa nɗu i tawaa aciya̱ɗu ilyuci i ta'atsu.

8 <<Na̱ A̱sulazuva A̱sula̱ a̱ ɗu a zuwa iɗa i ɗu i yuwan mgbain, cine u yuwayin nkaya n ɗu nzuwulai, reve u ca ɗu iɗa'a suru cine u yuwaan nle nzuwulai, 9 nni i toni, a̱vu i yuwan tsutoni ni ili i na n zuwaa nɗu ana'an, i ciga A̱sulazuva A̱sula̱ a̱ ɗu, reve i yuwan mmalu o ure wa̱ yi kuci, to i da̱shi tawa ilyuci i ta'atsu waru. 10 A yuwan tsundolo adama she o oco mpasa mu za babu unusu a̱tsuma̱ e iɗa i na A̱sulazuva A̱sula̱ a̱ ɗu aa casu ɗu wo o'wo ɗu agadu wan, adama mpasa mu za babu unusu u da̱na̱ a aci a̱ ɗu wan.

11 <<Amma na̱ za ro 'yuwan za va̱ yi, reve u 'ya̱wa̱ u vawan yi a̱vu u 'yon wu una yi, a̱vu u suma a̱ 'ya̱wa̱ a̱tsuma̱ e ilyuci i ndolo, 12 azagbain a̱ lyuci va̱ yi a̱ lyunguwa̱ yi za a̱ ta̱wa̱ na̱ a̱yi, reve a ca yi e ekere a za na cigai u tsupaa mpasa mu za va̱ yi na o unai, adama o una yi. 13 She ye ene iliyali ya̱ yi wan. Tsundolo tsa ɗa yaa putsa wocosu wu mpasa mu za babu unusu a̱tsuma̱ a Isra'ila, tsa̱ra̱ i tsura̱ asuvu nden.

14 <<She i tawa urotsu wu utyo wi iɗa ya agadu o moron ma̱ nden ma̱ ɗu wan za na nkaya n ɗu n zuwai, za na a̱yi ɗa agadu e iɗa i na A̱sulazuva A̱sula̱ a̱ ɗu aa casu ɗu.

15 <<Adanshi a vuma ta̱ a rawa a̱ usu a na a ca za ro unusu shi, ko a damma u ta̱ nu unusu shi, shede na a uwwa o una̱ wa ama e re ko ama a ta'atsu kafu wo o'wo amayun.✝

16 <<Na̱ za na ri na̱ majiyan ma wuya u ciga u yuwan adanshi a aci a za ro, 17 ele ra a̱ ta̱ ta̱wa̱ a̱ ma̱ka̱ka̱n ma̱ A̱sulazuva, waru a̱ ma̱ka̱ka̱n ma nan ganu na̱ a̱za̱ o uge'etosu aza a na a yuwusan ulinga a mantsa'a. 18 Ele a̱za̱ o uge'etosu e te petelyuwe adanshi o ndolo ulobonu. Na a cina u yuwan ta̱ epen a aci a vuma ndolo, a casu adanshi e epen a aci a za va̱ yi, 19 a̱vu a yuwan na̱ vuma ndolo ili i na u shi u cigai a yuwaan za va̱ yi. Tsundolo tsa ɗa yaa tawa iwuya a̱tsuma̱ a̱ ɗu. 20 Akapi a ama a ta uwwa a̱vu a uwwa wovon, a̱a̱ da̱shi yuwan cu'un vi iwuya ndolo a̱tsuma̱ a̱ ɗu shi. 21 She ye ene iliyali wan, u to o'wo wuma o una̱ u wuma, lyusu waru o una̱ u lyusu, anga o una̱ wa anga, ukere waru o una̱ wu ukere, anana o una̱ wa anana.>>