1 <<Na̱ vumava̱sula̱ ko za na tse ene alavu a̱ 'yon a̱tsuma̱ a̱ ɗu, a̱vu u damma ɗu iroci ko ili ya asalama i ro, 2 ni iroci ko ili ya asalama'a i shiwan, reve u damma, to, <Tsu toniyi musula̱ n ro, reve tsu yuwaan nle a̱ga̱nda̱.> Musula̱ n na koto i revei shi. 3 She i zuwaa vumava̱sula̱ ndolo na̱ za na ri eneshe alavu o ndolo atsuvu wan. A̱sulazuva A̱sula̱ a̱ ɗu u ta̱ lyungusa̱ ɗu we ene ko i ciga yi ta̱ no okolo a̱ ta̱ na asuvu a̱ ɗu suru. 4 A̱sulazuva A̱sula̱ a̱ ɗu a ɗa yoo toni, a̱yi ɗa waru goon yaa uwwa wovon, i toni ili i na u dammai suru, adanshi a̱ yi a ɗa goon yaa zuwaa atsuvu, a̱yi ɗa goon yaa yuwaan a̱ga̱nda̱, a̱yi ɗa waru goon yaa suraa. 5 A̱yi vumava̱sula̱ ndolo ko a̱yi za va alavu o ndolo a ciga a 'yuwan o una yi, adama a na u yuwan ta̱ alajiya o u'ya̱susa̱n wa aci e ekere a̱ A̱sulazuva A̱sula̱ a̱ ɗu, za na uta̱a̱ nɗu a̱tsuma̱ a Masar a̱vu u tsupaa ɗu e iɗa i tsugbashi. U yuwan ta̱ mpolo u vadala ɗu diga o ure u na A̱sulazuva A̱sula̱ a̱ ɗu a ciga nɗu i toni. I ciga i 'yuwan yu uta̱a̱ ili i wuya i na i ri a̱tsuma̱ a̱ ɗu.>>

6 <<Na̱ mawun ma̱ a̱na̱wun ma̱ wu ko ulobo wa̱ wu ko usheli wa̱ wu, ko ka va̱ wu na vu cigai, ko i'utsa̱ i na i ri zuzu na̱ a̱vu u yuwan wu ugbozu usokowu, adansa, <Lyawai tsu 'ya̱wa̱i tsu yuwayin musula̱ n ro a̱ga̱nda̱,> musula̱ n na a̱ɗu ko nan dada ɗu i revei shi, 7 musula̱ ma ama n na a̱ ri uka̱nda̱ruwu na̱ a̱ɗu, ko zuzu ko alanga, diga o ufaru wu uvaɗi u nda a̱ tyo o ukosu wu uvaɗi u ndeɗe, 8 she i usu yi ko i zuwaa yi atsuvu wan. She ye ene iliyali ya̱ yi wan. She i lyawa yi wuma ko i soko yi wan. 9 I ciga i 'yuwan yu una yi. Ekere a̱ ɗu a ɗa a fara ju'wa̱n yi, reve akapi a ama a vuvara yi hali u kuwa̱. 10 Yi vara yi na atali hali u kuwa̱, adama a na u zami ta̱ ure u na waa zuwa ɗu i lyawa itoni ya̱ A̱sulazuva A̱sula̱ a̱ ɗu, za na uta̱a̱ nɗu diga Masar e iɗa i tsugbashi. 11 Tsundolo tsa ɗa aza a Isra'ila suru aa uwwa, reve aa uwwa wovon, reve a̱ kuɗa̱ a na aa yuwan cu'un vi ili i wuya i ndolo a̱tsuma̱ a̱ ɗu waru.>>

12 <<Na̱ yu uwwa a dansa adama a̱ lyuci ta̱ na A̱sulazuva A̱sula̱ a̱ ɗu a ca nɗu i da̱nu pe a na, 13 ama a wuya o ndolo o uta̱ ta̱ a̱tsuma̱ a̱ ɗu a̱vu a̱ pusa̱n ugbozu wa ama a̱ lyuci le, a dansa, <Lyawai tsu 'ya̱wa̱i tsu yuwayin musula̱ n ro a̱ga̱nda̱,> musula̱ n na koto i revei shi, 14 ni i ciga i 'yuwan i zami, i bingi, i yuwan yeci ya̱ a̱bunda̱. Na amayun a ɗa cu'un vi idaba i ndolo i farai pe a̱tsuma̱ a̱ ɗu, 15 a̱vu gba yu una aza a na a̱ ri pe na̱ nden a̱tsuma̱ a̱ lyuci'i suru ni iliyamunga i na i ri pe na̱ matsun me pe'eni. 16 Ili i na i pura̱i o uvon suru i ɓoloto le a̱tsuma̱ a agalaci a̱ lyuci'i. A̱vu i kula̱to lyuci'i ni ili i na i pura̱i suru, i kula̱to le tse ili i na i cayi kucci va̱ yi vu ukula̱tosu e ekere a̱ A̱sulazuva A̱sula̱ a̱ ɗu. Lyuci'i u to o'wo okongo babu ukotu, a̱a̱ da̱shi suwisa yi shi. 17 She a̱ tsura̱ ili i ta̱ a̱tsuma̱ e ili i na a tawai adama o ukototosu u ndolo e ekere a̱ ɗu wan, adama A̱sulazuva a vadala a̱tsuma̱ o upan wu usuɗuwu u na u ri pe a̱tsuma̱ a̱ yi, a̱vu u ka̱lyuwa̱ ɗu ne esu a sa'ani, a̱tsuma̱ e isa'ani ya̱ yi waru u da̱shi ɗu a̱bunda̱ cine u yuwayin nkaya n ɗu nzuwulai oɓolo na akucunu. 18 U ta yuwan ne ni i yuwan tsutoni na̱ A̱sulazuva A̱sula̱ a̱ ɗu, reve waru i yuwan tsutoni ni ili i na u zuwai suru na maa casu ana'an, reve waru i yuwan ili i na i ri mejege e esu a̱ yi.>>