1 <<She i ca A̱sulazuva A̱sula̱ a̱ ɗu nan ko kyon na ri na̱ mɓa̱la̱ ko usa̱du wan, adama a na ili yi idaba i ɗa e ekere a̱ A̱sulazuva A̱sula̱ a̱ ɗu.

2 <<Na a cina vali ko ka na ri nden a̱tsuma̱ e ilyuci i na A̱sulazuva a ca nɗu a yuwusan ili i wuya a̱ ma̱ka̱ka̱n ma̱ A̱sulazuva A̱sula̱ a̱ ɗu, a kuɗusa akucunu a̱ yi, 3 e re na a yuwusaan musula̱ n ro tsutoni na̱ a̱ga̱nda̱, va̱ a̱ga̱nda̱ o urana ko woto, ko italyo'o ya zuva za na m putsayi, 4 waru na̱ a̱ ta̱wa̱a̱ ɗu ta̱ na aɗa o ndolo, i ciga i 'yuwan yi indana yi ulobonu lon. Nna amayun a ɗa reve a̱ usu a yuwan ta̱ ili i wuya i ndolo a̱tsuma̱ a Isra'ila, 5 i tara vali'i ko ka'a za na yuwain ili i wuya i ndolo a̱ 'ya̱wa̱ o una̱ntsu u lyuci, reve a vara yi hali o una yi. 6 Na adanshi o una̱ wa ama e re ko ama a ta'atsu a ta gura una vuma, amma u ri n yuwan o una vuma adama a adanshi o una̱ u vuma ta̱ shi. 7 Ekere a ama a na e ene niyi'i ele ɗa aa fara mavara ma̱ yi reve aza a na a buwai o ɓolo ekere adama o una yi. Tsundolo tsa ɗa aa tawa iwuya a̱tsuma̱ a̱ ɗu.✝

8 <<Na adanshi o usuɗuwu a̱ ta̱wa̱ o ukobu wu uge'etosu adama vu ge'eto, ko adama o wocosu wu mpasa, ko mawasan o ukobu wu uge'etosu ko wisulusa, vu tara le a̱ tyo uba̱ta̱ u na A̱sulazuva aa ɗangwa. 9 I 'ya̱wa̱ na adanshi'i uba̱ta̱ u nan ganu a na a̱ ri nan Levi, na̱ za na ri za vu uge'etosu a mantsa'a. I damma le ili i na yaa damatosun ɗu, a ta paɗa ugana u na wu ntsayi. 10 Reve i yuwan cine wila̱ wi ili i na a paɗai u damma nɗu uba̱ta̱ u na A̱sulazuva A̱sula̱ a̱ ɗu aa ɗangwa. I reve i yuwan ta̱ cine a damma nɗu. 11 I toni wila̱ u na o rito nɗu na afada a na a paɗaa nɗu, she i ɓatsa e ili i na a damma nɗu a̱ tyo ugula̱ ko usa'ani wan. 12 Vuma na yuwain aciyogbamu na̱ za vu uge'etosu ko na̱ ganu na aa yuwusan ulinga a mantsa'a e ekere a̱ A̱sulazuva A̱sula̱ a̱ ɗu, a ciga a 'yuwan o una yi. Tsundolo tsa ɗa aa tawa iwuya a̱tsuma̱ a aza a Isra'ila. 13 Ama'a suru a ta uwwa reve wovon u tsura̱ le, a̱a̱ da̱shi yuwan aciyogbamu waru shi.

14 <<Ni i uwa a̱tsuma̱ e iɗa i na A̱sulazuva A̱sula̱ a̱ ɗu a casu ɗu reve i tara yi wo o'wo za ɗu reve waru i da̱nu pe, reve i damma, <Lyawai tsu zamiyi mogono cine akapi a nɗa a na a̱ ri u ka̱nda̱ruwu na̱ a̱tsu a̱ ri,> 15 i reve i zuwa ta̱ mogono ma na A̱sulazuva A̱sula̱ a̱ ɗu aa ɗangwaa ɗu. Vuma'a i ciga i 'yuwan wu uta̱ a̱tsuma̱ a̱ a̱za̱ a̱ ɗu, she i zuwa mocin za na za va Isra'ila ɗa shi wo o'wo mogono ma̱ ɗu wan. 16 She mogono'o u ɓolotowo aciya̱yi ido wan, waru she u lyungu ama a̱ 'ya̱wa̱ a̱ da̱shi tsula ido a̱tsuma̱ a Masar wan, adama a na A̱sulazuva a damma ta̱ ama a̱ yi, <I buwa a̱ ka̱mba̱ a̱tsuma̱ a Masar shi.> 17 Waru waa zuwa a̱ma̱ci a̱ a̱bunda̱ shi, ta̱wa̱ a vadala okolo a̱ yi u lyawa A̱sulazuva wan. She u ɓoloto azurufa na̱ zinariya va̱ a̱bunda̱ wan.

18 <<Nu u kumba o ootogu o tsugono tsa̱ yi, u ta̱ zuwa a̱ pura̱a̱ yi wila̱ u nda a aatagada o ukutsuluwu, za na ri e ekere a nan ganu, aza a na ele ɗa nan Levi. 19 Aatagada a̱ wila̱ꞌa̱ u ta̱ da̱na̱ oɓolo na̱ a̱yi, mogono'o u ta̱ da̱na̱ e ɗesu yi nu una̱ hali ukosu u wuma wa̱ yi adama u rito cine waa yuwan mmalu a̱tsuma̱ o wovon wa̱ A̱sulazuva A̱sula̱ a̱ yi, a yuwusan tsutoni ulobonu ni idanshi i wila̱ i nda ni ili i na a zuwa suru. 20 Nu u yuwan ne u ta putsa yi a̱ 'ya̱sa̱n avangaci a̱ yi ngashi u la'a ta̱ akapi a̱ a̱za̱ a̱ yi. Reve u putsa yi a vadalaa wila̱ꞌa̱ ucina̱ a̱ tyo usa'ani ko ugula̱. Reve a̱yi nu ugundo wa̱ yi a jima a yuwusan tsugono a̱tsuma̱ a Isra'ila.>>