1 <<Vuma na suru o foɗoi arawa a̱ yi ko o koɗoi lipu tsali tsa̱ yi waa uwa a̱tsuma̱ e iɓolo ya ama a̱ A̱sulazuva shi.

2 <<A̱girutu suru ko limatan vu ugundo wa̱ yi, waa uwwa a̱tsuma̱ e iɓolo ya ama a̱ A̱sulazuva shi, hali a cina mantsa ma kupa.

3 <<Babu za va Amon ko vuma va̱ Mowa ko limatan vu gundo le na aa uwa a̱tsuma̱ e iɓolo ya ama a̱ A̱sulazuva, hali a cina mantsa ma kupa. 4 Adama a na a ga'aton ɗu no opopofu na̱ mini o ure a mantsa ma na yu uta̱i Masar shi, adama a na a tsupa ta̱ Balam ulobo wa̱ Beyo diga Peto a̱tsuma̱ a Mesopotamiya adama u yuwaan ɗu una̱. 5 Amma gba A̱sulazuva A̱sula̱ a̱ ɗu a zuwaa Balam atsuvu shi, amma a̱vu u vadala una̱ u na waa yuwusaan ɗu a̱ ka̱mba̱ aba'un, adama a na A̱sulazuva A̱sula̱ a̱ ɗu a ciga ɗu ta̱. 6 She i zami nden m muwwulai ne ele ko ulyuwu we elime u le wan a̱tsuma̱ a mantsa ma rana wuma ɗu.

7 <<She ye yene idaba ya aza a Edom wan, adama a na imaci i ɗu i ɗa. She ye ene idaba ya aza a Masar wan, adama a na ɗe nu ufaru i yuwan ta̱ nden n tsumocin a̱tsuma̱ e iɗa i le. 8 Muwun n na a matsaan nle a mantsa ma ta'atsu a ta gura uwa a̱tsuma̱ e iɓolo ya ama a̱ A̱sulazuva.

9 <<A mantsa ma na i va̱la̱i na yaa yuwan uvon na̱ n'yuwatan n ɗu i suma ili i na suru i rotsoi idaba. 10 A̱tsuma̱ a̱ ɗu na̱ nanza oco ta̱ tsali tsa̱ yi na ayin, u to uta̱ o uva̱la̱ta̱ a̱vu wi isawan a alanga. 11 Ulivu a mayuwaan reve u sumba̱, a̱vu nu urana u riya̱ u ka̱mba̱ o uva̱la̱ta̱.

12 <<I tawa uba̱ta̱ u ro ko'o a̱ca̱pa̱ o uva̱la̱ta̱ u ɗu adama i tsura̱ uba̱ta̱ u na ya̱a̱ da̱na̱ aa yuwusan rulu. 13 A̱tsuma̱ e itana yu ulinga u ɗu reve i zami ili i na ya̱a̱ da̱na̱ a̱ ka̱pusa̱ iɗa na̱ a̱yi, a mantsa ma na i yuwain rulu, a̱vu i ka̱pa̱ a̱ka̱ri reve i ciɗo rulu na i yuwain. 14 Adama a na A̱sulazuva A̱sula̱ a̱ ɗu a tsu burusa ɗu ta̱ a̱tsuma̱ o uva̱la̱ta̱ u ɗu adama u geshe ɗu, a̱vu u ca n'yuwatan n ɗu e ekere a̱ ɗu. Uba̱ta̱ wu nden n ɗu u da̱na̱ na akiza, adama ta̱wa̱ we ene ili i ro i na i ri idaba a̱tsuma̱ a̱ ɗu, a̱vu u vadalaa ɗu ucina̱ wan.

15 <<Na aagbashi a suma u pa'an ya̱'a̱ wu she vu ka̱mbuwa̱ yi e ekere a zagbain va̱ yi wan. 16 I lyawa yi u da̱nu na̱ a̱ɗu uba̱ta̱ u na u cigai biti ko a̱ lyuci na u ɗangulai suru. She i ɓongi yi wan.

17 <<Babu vali va Isra'ila ko ka na voo o'wo ashakala a̱ a̱a̱'isa̱. 18 Agba she i ta̱wa̱ ni ikebe i na aashakala a vali ko a ka a̱ tsura̱i a̱tsuma̱ o u'wa wa̱ A̱sulazuva A̱sula̱ a̱ ɗu adama aa tsupa akucunu wan, adama a na ili yi idaba i ɗa e ekere a̱ A̱sulazuva A̱sula̱ a̱ ɗu.

19 <<She vu ushi uda̱shiyi a̱tsuma̱ o okopu a na vu cayi za va̱ wu wan, uda̱shiyi wi ikebe, uda̱shiyi wi ilyalya, uda̱shiyi wi ili i na o kopoi suru a na wa̱a̱ ta̱wa̱ nu uda̱shiyi. 20 I ta gura ushi uda̱shiyi e ekere o mocin, babu na̱ za va̱ wu za va Isra'ila, adama a na A̱sulazuva A̱sula̱ a̱ ɗu a ta zuwaa ɗu aba'un a̱tsuma̱ e ili i na i zuwai ekere a̱ ɗu a̱tsuma̱ e iɗa i na i cigai i uwwa wo o'wo agadu a̱ ɗu.

21 <<A mantsa ma na i yuwain akucunu na̱ A̱sulazuva A̱sula̱ a̱ ɗu, she i jima babu tsupa wan, adama a na A̱sulazuva A̱sula̱ a̱ ɗu e te ece ɗu, e te reme ɗu nu unusu. 22 Amma ni i suma matara ma akucunu, woo o'wo ɗu unusu shi. 23 Suru ili i na una̱ u ɗu u dammai i yuwan ne, adama a na i yuwan ta̱ akucunu nu ucigu u ɗu a̱ tyo uba̱ta̱ wa̱ A̱sulazuva A̱sula̱ a̱ ɗu nu una̱ u ɗu.

24 <<A mantsa ma na vu uwai a̱tsuma̱ o uɗuma̱ wa̱ ina̱bi u moron ma̱ nden ma̱ wu, vu ta gura lyuwa muwun n ina̱bi cine vu cigai suru, amma she vu zuwa ko ili a̱tsuma̱ a̱ tsa̱n va̱ wu wan. 25 Na̱ vu uwa a̱tsuma̱ o uɗuma̱ wi ishina u moron ma̱ nden ma̱ wu, a̱vu vu cina ishina ya̱ yi mishin vu ta̱ gura kuɗa ne ekere a̱ wu, amma she vu kyu'wan ishina i mishin ya̱ yi na̱ matsun wan.>>