1 <<A̱tsuma̱ e iɗa i na A̱sulazuva A̱sula̱ a̱ ɗu aa ca ɗu za va agadu ni i cina pe za na o unai a̱tsuma̱ e iɗa'a, agba i reve za na una niyi shi, 2 mbara n ɗu na̱ a̱za̱ o uge'etosu a̱ ɗu o uta̱, a̱vu o rito alanga o uba̱ta̱ u na a̱kwa̱kwa̱'a̱ a̱ ri ni ilyuci i na i ri lo uka̱nda̱ruwu. 3 A̱vu mbara n lyuci n na la'ai zuzu na̱ a̱kwa̱kwa̱'a̱ a tara manan ma na koto a yuwain ulinga na̱ a̱yi shi waru koto a zuwayi a̱gba̱la̱ shi. 4 A̱vu mbara'a a tara yi a̱ tyo o uka̱ri u na koto a lumai ko a̱ cu'wa̱in shi, uba̱ta̱ u na uɗolu u ri e meyene. Ɗe o uka̱ri'i ɗaɗa a kuɗa yinlu i mana'an. 5 A̱vu nan ganu, olobo a̱ Levi, a̱ ta̱wa̱ elime, adama a na A̱sulazuva A̱sula̱ a̱ ɗu a ɗangula le ta̱ adama a yuwan a̱ga̱nda̱ a̱vu a zuwa aba'un a̱tsuma̱ a ala a̱ A̱sulazuva, reve a paɗa una̱ wa adanshi a na a̱ ri a mawasan na̱ wamatowun u na za ro amatoyin za ro. 6 A̱vu mbara n lyuci n na n ri zuzu na̱ a̱kwa̱kwa̱'a̱ a sa'a ekere e le zuva manan ma na a kuɗai yinlu o uka̱ri'i, 7 A̱vu a damma, <Ekere a̱ tsu o oco mpasa nda shi, waru esu a̱ tsu e ene ana a yuwain ili i nda shi. 8 A̱sulazuva, usu kucci matara mo ume mo unusu ma nda o una̱ wa ama a̱ wu Isra'ila, aza a na vu tsupayi, agba she vu reme ama a̱ wu nu unusu wu mpasa wu za na ri nu unusu wan.> A̱vu a yuwan gafura vu mpasa n na o ocoi'i. 9 Ne ɗa yaa tawaa aciya̱ɗu unusu u wocosu wu mpasa n na n ri nu unusu shi, adama a na i yuwain ili i na i ri mejege e ekere a̱ A̱sulazuva.

10 <<A mantsa ma na i 'ya̱wa̱i na yaa yuwan uvon na̱ n'yuwatan n ɗu, a̱vu A̱sulazuva A̱sula̱ a̱ ɗu a ca ɗu ele e ekere a̱ ɗu a̱vu i pura̱ le o o'wo agbashi a̱ ɗu, 11 reve na̱ ve ene ka vu ulobonu ta̱ pe a̱tsuma̱ a aza a na i pura̱i'i, reve u uwa o okolo a̱ wu vu ta gura tara yi wo o'wo ka va̱ wu. 12 Vu tara yi a̱ tyo o u'wa wa̱ wu a̱vu vu zuwa yi u puna a̱nji a̱ yi, wu koɗo a̱kpa̱ta̱ a̱ yi. 13 A̱vu u foɗo a̱tugu a na u da̱na̱i wotowu ne ele a mantsa ma na e reme niyi. Nu u ri nden o u'wa wa̱ wu a̱vu u yuwan nden n wira̱ u ta̱ ma mma va̱ yi na̱ dada va̱ yi woto u ta̱ ma̱ɓula̱, a̱vu vu uwa ya̱'a̱ yi vo o'wo vali va̱ yi a̱yi waru wo o'wo ka va̱ wu. 14 Na̱ vu uwwa uyo'o wu nden na̱ a̱yi shi, a̱vu vu lyawa yi u ka̱ra̱ a̱ tyo uba̱ta̱ u na u cigai biti. Agba vaa wina yi shi ko vu da̱na̱ a yuwusan na̱ a̱yi tsa aagbashi shi, adama a na vu von ta̱ ɗe na̱ a̱yi.

15 <<Na̱ vali ta̱ na̱ a̱ma̱ci e re, a̱vu u la'a ciga za ta̱, a̱vu u 'yuwan za ta̱, agba suru nle a matsaan yi ta̱ muwun ma ali agba ulobo wu ufaru ma ka na u cigai ɗa shi, 16 a mantsa ma na wee ne'esheen muwun ma̱ yi agadu a̱ yi, waa ca ucira u mawun mo ufaru ma ka na u la'a cigai o una̱ wu ulobo wu ufaru wa amayun ma̱ yi ma ka na u kuɗa̱i a ciga shi. 17 Nu u 'yuwan u ciga u usu umatsun wu ulobo wu ufaru ma ka na u cigai shi tsu ulobo wu ufaru wa̱ yi na waa ca yi uɓatsulai ure wi ili i na u ri na̱ a̱yi. Ulobo u ndolo a̱yi ɗa iroci yu ucira yu ufaru wa dada va̱ yi. Ucira u mawun mo ufaru wa̱ yi u ɗa.

18 <<Na̱ vuma ta̱ nu ulobo za na ri ugbawu ko za na tsu uwwa adanshi shi, za na tsu ca dada va̱ yi na̱ mma va̱ yi tsugbain shi waru u tsu uwwa adanshi e le a mantsa ma na aa ɓarasa yi shi, 19 dada va̱ yi na̱ mma va̱ yi e reme yi a̱vu a̱ ta̱wa̱ na̱ a̱yi uba̱ta̱ wu mbara n lyuci n le o una̱ntsu u lyuci. 20 A̱vu a damma mbara'a, <Mawun ma̱ tsu ma nda u tu ugbawu waru u tsu uwwa adanshi shi. U tsu yuwaan tsu tsutoni shi. A̱yi za va alya a̱bunda̱ no ososowi a ɗa.> 21 A̱vu ama a̱ lyuci le suru a vara yi na atali hali u kuwa̱. Ni i ciga i 'yuwan yu uta̱a̱ iwuya a̱tsuma̱ a̱ ɗu. Isra'ila suru a ta uwwa reve a uwwa wovon.

22 <<Na̱ vuma yuwan unusu u na u rawai u kuwa̱, a̱vu o una yi, reve a̱ sa̱ga̱do lipu va̱ yi zuva vu uɗanga, 23 yaa lyawa lipu va̱ yi zuva vu uɗanga a cina usana shi. I reve i ciɗo yi ta̱ o urana u ndolo, adama a na za na suru a̱ sa̱ga̱doi zuva vu uɗanga A̱sulazuva a yuwaan yi ta̱ una̱. I ciɗo yi adama i lyungusa̱ iɗa i na A̱sulazuva A̱sula̱ a̱ ɗu aa casu ɗu agadu wan.✝>>