1 <<O ukosu wa a'wan e cindere suru i ciga i 'yuwan yu una atatan. 2 Apa cine aa yuwan yi: Za na oo tono za va̱ yi za va Isra'ila utan suru wu una atata'an. Wa̱a̱ ushi atsupu e ekere a za va̱ yi za va Isra'ila ko mawun ma̱ a̱na̱wun ma̱ yi shi, adama a na a yuwan ta̱ yisaali i mona mo utan ma̱ A̱sulazuva. 3 Vu ta gura gbagba mocin tsupa wu, amma ciga 'yuwan vu una utan u na voo tono za va̱ wu. 4 Amayun, A̱sulazuva A̱sula̱ a̱ ɗu a ta zuwaa ɗu aba'un a̱tsuma̱ e iɗa i na waa casu ɗu wo o'wo ɗu ili ya agadu. A̱a̱ tsura̱ za vu ulambu a̱tsuma̱ a̱ ɗu shi, 5 nna̱ yaa zuwaa A̱sulazuva A̱sula̱ a̱ ɗu atsuvu, i yuwan tsutoni waru i yuwan ili i na n damma nɗu suru ana'an. 6 A̱sulazuva A̱sula̱ a̱ ɗu a ta zuwaa ɗu aba'un cine u yuwain nzuwulai, i to kopoo nɗa ma̱ a̱bunda̱ a̱ɗu gba ya̱a̱ ushi okopu e ekere a nanza shi. I ta yuwan tsugono tsa nɗa ma̱ a̱bunda̱ amma babu za na aa yuwan tsugono a aci a̱ ɗu.

7 <<Na̱ a̱ tsura̱ za vu ulambu a̱tsuma̱ a mmaci n ɗu a̱tsuma̱ e iɗa i na A̱sulazuva A̱sula̱ a̱ ɗu aa casu ɗu, she i gbama okolo ko i yuwan ukere ugbamu a̱ tyo e ekere a za ɗu za vu ulambu wan. 8 Amma i kpa̱tu'wa̱a̱ yi ukere, a̱vu i ca yi okopu e ili i na u cigai suru. 9 I yuwan ugbozu, she i da̱na̱ na̱ majiyan me iwuya ma nda wan a na, <Aa'wan e cindere, aa'wan a na oo una atatan a yuwan ta̱ zuzu,> hali i rogbodowo za ɗu za vu ulambu urewesu a̱vu i 'yuwan a ca yi ili i ro. Nu u 'ya̱wa̱a̱ A̱sulazuva na̱ mesun a aci a̱ ɗu a̱ ta̱ tsura̱ ɗu nu unusu. 10 I ca yi no okolo a̱ ta̱ babu a̱tsumola̱ngu. Adama o ndolo A̱sulazuva A̱sula̱ a̱ ɗu a ta zuwaa ɗu aba'un a̱tsuma̱ e ili i na i yuwain biti ni ili i na i ju'wa̱in suru. 11 A kasa na alambi a̱tsuma̱ e iɗa i ɗu shi, <A̱yi ɗa i zuwai maa dansaa ɗu, i ca a̱za̱ a̱ ɗu no okolo a̱ ta̱, oɓolo na alambi na aza a na a cigai ikambi a̱tsuma̱ e iɗa i ɗu.>

12 <<Na̱ za ɗu imaci ya Ibrahim vali ko ka u winaa ɗu aciya̱yi, a̱vu u yuwaan ɗu ulinga hali a'wan a̱ ta̱li a aa'wan e cindere reve i lyawa yi u ka̱ra̱ fa̱a̱n. 13 Na̱ yaa lyawa yi u ka̱ra̱, yaa lyawa yi u ka̱ra̱ ekere lya̱nga̱ shi. 14 I ca yi ne'e no okolo a̱ ta̱ a̱tsuma̱ e iliyamunga i na i ri na̱ a̱yi, ikyon na̱ mgbele n ɗu ni ishina i na i fabai, na̱ masayan ma̱ ina̱bi ma na i kpokoi. I ca yi a̱tyo a na A̱sulazuva A̱sula̱ a̱ ɗu a zuwaa nɗu aba'un. 15 I cuwan ɗe nu ufaru a̱ɗu agbashi a ɗa i shi e iɗa ya Masar, amma A̱sulazuva A̱sula̱ a̱ ɗu a tsupaa ɗu ta̱. A̱yi ɗa i zuwai maa zuwusaa ɗu ili i nda ana'an.

16 <<Amma na aagbashi a̱ ɗu a damma ɗu, <N ciga n lyawa ɗu shi,> adama a na u te icigi i ɗu na̱ a̱za̱ o u'wa a̱ ɗu suru, waru u yo'ono yi ta̱ u da̱na̱ oɓolo na̱ a̱ɗu, 17 to, a̱vu i tara yi a̱ tyo o una̱ntsu wu ukobu u ɗu a̱vu i ba̱ma̱ yi utsuvu na̱ bele ma̱ba̱ma̱. U to o'wo aagbashi a̱ ɗu babu ukotu. Tsundolo tsa ɗa yaa yuwan na aagbashi o usheli a̱ ɗu.

18 <<She i tara malyawa ma aagbashi ili yu usa̱n i ɗa wan, adama a na u lingaa ɗu ta̱ a'wan a̱ ta̱li, waru ulinga wa̱ yi u la'a ta̱ ulinga wu za zamalinga toto ure. Ni i yuwan tsunda, A̱sulazuva A̱sula̱ a̱ ɗu a ta zuwaa ɗu aba'un a̱tsuma̱ e ili i na i yuwain biti.

19 <<I ta tawaa A̱sulazuva A̱sula̱ a̱ ɗu umatsun wu ufaru suru, ogono e inan ni ikyon, oɓolo na̱ mgbele. Yaa yuwan iluma no oogono a nan umatsun wu ufaru shi, waru yaa puna eleme o kyon na̱ megbele umatsun wu ufaru shi. 20 A aa'wan suru a̱ɗu na̱ a̱za̱ o u'wa a̱ ɗu i ta tama le a̱ ma̱ka̱ka̱n ma̱ A̱sulazuva A̱sula̱ a̱ ɗu uba̱ta̱ u na waa ɗangula. 21 Amma nu u ri usa̱du, ko a̱kutsuma̱ ko irumba̱ ko cu'un vu mɓa̱la̱ n vama n ro ko'o, yaa ca A̱sulazuva A̱sula̱ a̱ ɗu kucci va̱ yi shi. 22 I tama le e ilyuci i ɗu. Vuma na ri idaba na̱ za na ri cece u ta gura tama yi, cine a tsu tama mere'on ko meshon. 23 Mpasa n ɗaɗa goon yaa tama shi, i to oco yi e iɗa tsa̱ mini.>>