1 Ni i yuwan tsutoni na̱ A̱sulazuva A̱sula̱ a̱ ɗu reve i kuru ili i na u zuwai a na maa casu ɗu ana'an suru ulobonu, A̱sulazuva A̱sula̱ a̱ ɗu a ta zuwa ɗu yoo o'wo elime a akapi a nɗa mu uvaɗi suru. 2 Aba'un a nda suru a̱ ta̱ ta̱wa̱ ɗu a̱vu o toni ɗu nni i yuwan tsutoni na̱ A̱sulazuva A̱sula̱ a̱ ɗu: 3 I to o'wo na aba'un a̱tsuma̱ a̱ lyuci na aba'un waru a̱ a̱ɗuma̱. 4 Muwun ma̱ a̱tsuma̱ n ɗu n ta̱ da̱na̱ na aba'un, ne ɗa waru itana yu uɗuma̱ i ɗu nu umatsun wi iliyamunga i ɗu, mudindim mo oɓolo e inan i ɗu ni ikyon na̱ mgbele n ɗu.

5 <<Apara a̱ ɗu na̱ meretsu n ɗu a̱ ta̱ da̱na̱ na aba'un.

6 <<I ta̱ da̱na̱ na aba'un a mantsa ma na yaa uwa na̱ mantsa ma na yoo uta̱.

7 <<A̱sulazuva a ta zuwa i lyuwa n'yuwatan n ɗu a̱ ma̱ka̱ka̱n ma̱ ɗu aza a na a̱a̱ riya̱a̱ ɗu nu uvon. A̱ ta̱ ta̱wa̱ ɗu nu ure u ta̱, agba a ta suma na̱ re cindere.

8 <<A̱sulazuva a̱ ta̱ lyungu na aba'un a̱tsuma̱ o mpon n ɗu nu ulinga we ekere a̱ ɗu suru. A̱sulazuva A̱sula̱ a̱ ɗu a ta zuwaa ɗu aba'un a̱tsuma̱ e iɗa i na waa casu ɗu.

9 <<A̱sulazuva a̱ ta̱ zuwa ɗu yo o'wo ama a akiza a̱ yi, cine u yuwaan nɗu nzuwulai ma akucunu, ni i kuru ili i na A̱sulazuva A̱sula̱ a̱ ɗu a zuwai, a̱vu i yuwan mmalu a̱tsuma̱ o ure wa̱ yi. 10 A̱vu ama o uvaɗi suru e ene a na e te ɗesu ɗu na ala a̱ A̱sulazuva, reve a uwwa wovon u ɗu. 11 A̱sulazuva a ta zuwa ɗu i bala a̱bunda̱ lon, a̱tsuma̱ a limatan ɗu na̱ nu umatsun wi iliyamunga n ɗu na̱ a̱tsuma̱ e itana yu uɗuma̱ yi iɗa i ɗu, a̱tsuma̱ e iɗa i na u kucinayi nkaya n ɗu a na waa ca ɗu.

12 <<A̱sulazuva a̱ ta̱ kpa̱tu'wa̱ zuva, uba̱ta̱ wi izuwa wa̱ a̱bunda̱ ya̱ yi, u lyunguwa̱ ɗu ni iro'i a̱tsuma̱ e iɗa'a a̱tsuma̱ a mantsa a̱vu waru u zuwaa ulinga wu ukere u ɗu aba'un. I ta ca nɗa ma̱ a̱bunda̱ okopu agba a̱ɗu yoo kopo shi. 13 A̱sulazuva a ta zuwa ɗu yo o'wo aci agba a̱ca̱pa̱ shi. Ni i yuwan tsutoni ni ili i na A̱sulazuva A̱sula̱ a̱ ɗu a zuwai a na maa casu ɗu ana'an reve i kuru le ulobonu, i ta̱ da̱na̱ zuva kuci, amma za̱la̱ shi. 14 She i ɓatsa usa'ani ko ugula̱ i lyawa ko za ta̱ a̱tsuma̱ e ili i na maa dansaa ɗu ana'an i toni musula̱ n ro a yuwusaan le a̱ga̱nda̱ wan.>>

15 <<Amma, ni i 'yuwan a yuwan tsutoni na̱ A̱sulazuva A̱sula̱ a̱ ɗu waru i toni ili i na u zuwai ni ili i na a̱a̱ kuru ulobonu aza a na maa casu ɗu ana'an shi, una̱ u nda suru o to toni ɗu reve e reme ɗu:

16 <<Una̱ u te reme ɗu a̱tsuma̱ a̱ lyuci na̱ a̱ a̱ɗuma̱.

17 <<Una̱ u te reme apara a̱ ɗu na̱ meretsu n ɗu.

18 <<Una̱ u te reme muwun ma̱ a̱tsuma̱ n ɗu, ni itana yu uɗuma̱ i ɗu nu umatsun wi iliyamunga i ɗu, mudindim mo oɓolo e inan i ɗu ni ikyon na̱ mgbele n ɗu.

19 <<Una̱ u te reme ɗu a mantsa ma na yaa uwwa, na̱ mantsa ma na yoo uta̱. 20 A̱sulazuva a ta yuwaan ɗu una̱, reve u zuwa ɗu i ra̱pula̱, waru u ta ɓara ɗu a̱tsuma̱ e ili i na i zuwai ekere a̱ ɗu suru, she no o kototo ɗu reve i la̱nga̱ babu usa̱n adama e iwuya i na i yuwain na i lyawa niyi. 21 A̱sulazuva a̱ ta̱ tsuwa̱n ɗu mɓa̱la̱ hali u kototo ɗu a̱tsuma̱ e iɗa i na yaa zama i uwa wo o'wo ɗu agadu. 22 A̱sulazuva a ta faba ɗu na̱ mɓa̱la̱ mu ukelu nu uta̱nu na̱ mɓa̱la̱ ma atsutsa nu usuɗuwu u lipu wu usa̱n nu ulambu wi iro'i, na̱ ma̱lyo nu upa̱luwusa̱, za na ee reme ɗu she ni i koto. 23 Zuva ɗu u to o'wo tsa̱ rumushili iɗa za̱la̱ ɗu waru u to o'wo tsa̱ rumu. 24 A̱sulazuva a̱ ta̱ ka̱mba̱to iro'i yi iɗa i ɗu ma̱buta̱ na̱ yira, u ta̱ cipa̱ diga zuva hali she no o kototo ɗu.>>

25 <<A̱sulazuva a ta zuwa n'yuwatan n ɗu n lyuwa ɗu. I ta̱ riya̱a̱ le nu ure u ta̱, agba i ta sumaa le na̱ re cindere. I to o'wo ili i ma'yuwatan e ekere o tsugono tsu uvaɗi suru. 26 A̱kwa̱kwa̱ a̱ ɗu o to o'wo ilyalya yi nnunu n tsu'yan ni inama yu uvaɗi suru, agba babu za na oo loso le. 27 A̱sulazuva a ta lapa ɗu na amicin a Masar no oboto na̱ mɓa̱la̱ mi iciri ni ikavuru, aza a na ya̱a̱ ka̱mba̱ gbaga shi. 28 A̱sulazuva a ta lapa ɗu nu ujaaru na̱ tsurumba̱ nu ura̱pulu wo okolo. 29 Nu urana a aci i ta̱ da̱na̱ a yuwusan mmalu tse irumba̱ a̱tsuma̱ e irumbu. Yaa lyuwa aci shi a̱tsuma̱ e ili i na suru yaa yuwan. Urana suru o to ɓongi ɗu, reve a yuwusaan ɗu a'usa, agba a̱a̱ tsura̱ za na aa wawa ɗu shi.>>

30 <<I te geɓe usheli, agba vuma ro ta tara yi u von na̱ a̱yi. I ta suwa u'wa, agba ya̱a̱ da̱nu pe shi. I ta̱ cu'wa̱n uɗuma̱ u ina̱bi, agba yaa ta'an umatsun wa̱ yi shi. 31 A ta paɗa nan ɗu e esu a̱ ɗu, agba yaa tama ili a̱tsuma̱ a̱ yi shi. A ta usa mololi ma̱ ɗu nu ucira agba a̱a̱ ka̱mbuwa̱ yi shi. A ta tara kyon ɗu a ca n'yuwatan n ɗu, agba ko za a̱a̱ da̱na̱ lo na waa kamba ɗu shi. 32 A ta ca nɗa n ro muwun mo olobo n ɗu ne esheli a̱ ɗu, reve esu a̱ ɗu a̱ kuna̱ a̱ a̱ka̱nla̱ o ure u le usana suru, agba ya̱a̱ da̱na̱ nu ucira u na yaa gura yuwan ili adama e le shi. 33 Ama a na i revei shi a ta lyuwa ili i na iɗa i ɗu i matsain na̱ melen ma̱ ɗu. Agba ya̱a̱ da̱na̱ ni ili i ro shi she iɓongi i iwuya a wuma u ɗu suru. 34 Ili i na esu a̱ ɗu ee ene a ta̱ zuwa ɗu i jaara. 35 A̱sulazuva a ta faba a̱lu na ana a̱ ɗu na amicin a̱ mɓa̱la̱ a na ee ina shi, a bazasa diga a apata a ana a̱ ɗu a gawan zuva va aci a̱ ɗu.>>

36 <<A̱sulazuva o to loso ɗu oɓolo na̱ mogono ma na i ɗangulayi aciya̱ɗu a̱ tyo e iɗa i na a̱ɗu na̱ nkaya n ɗu i revei shi. Ɗe ɗa yaa yuwaan musula̱ n ro a̱ga̱nda̱, musula̱ mu ɗanga na̱ va atali. 37 I to o'wo ili i ma'yuwatan ni ili yi izo'oshi, ni ili ya avandaru e ekere a nɗa n na A̱sulazuva oo loso ɗu a̱ tyo suru.>>

38 <<I ta̱ cu'wa̱n icu'un ya̱ a̱bunda̱ a̱ a̱ɗuma̱ a̱ ɗu, agba wa'a ɗa yaa gasa, adama a na apapari a ta tama le. 39 I ta̱ cu'wa̱n a̱ɗuma̱ a̱ ina̱bi, a̱vu i cimba le, agba yoo sowo masayan me le ko i ɓoloto umatsun u le shi, adama a na azun a ta tama le. 40 I ta̱ da̱na̱ na̱ ɗanga zetun uba̱ta̱ suru a̱tsuma̱ e iɗa i ɗu, agba a yuwan ulinga na̱ mani'in me le shi, adama a na limatan le ta̱ za̱ka̱tsa̱. 41 I ta̱ tsura̱ muwun mo olobo ne esheli agba i ta lamba le, adama a na a̱ ta̱ pura̱ le a̱ 'ya̱wa̱ tsugbashi. 42 Apapari a ta tama ɗanga ɗu suru ni itana yu uɗuma̱ i ɗu.>>

43 <<Omocin a na a̱ ri nden a̱tsuma̱ a̱ ɗu a̱ ta̱ da̱na̱ a lyuwusa elime elime amma a̱ɗu gba i ta̱ da̱na̱ a̱ ka̱mba̱sa̱ a̱ca̱pa̱ a̱ca̱pa̱. 44 A ta ca ɗu okopu, a̱ɗu gba yoo kopoo le shi. O to o'wo aci, amma a̱ɗu i to o'wo a̱ca̱pa̱.>>

45 <<Una̱ u nda suru u te reme ɗu. A ta gbagba ɗu a̱vu a cina ɗu hali she no o kototo ɗu, adama a na i 'yuwain a yuwan tsutoni na̱ A̱sulazuva A̱sula̱ a̱ ɗu, waru i toni ili i na u zuwai ni ili i na u damma nɗu shi. 46 O to o'wo iroci ni ili ya asalama e ekere a̱ ɗu na̱ limatan ɗu babu ukotu. 47 Adama a na i yuwayin A̱sulazuva A̱sula̱ a̱ ɗu a̱ga̱nda̱ a̱tsuma̱ a̱ ma̱za̱nga̱ na̱ mere a mantsa mo ulyuwu we elime shi. 48 Adama o ndolo, a̱tsuma̱ a ambulu na akuli na ataɓu nu ulambu suru suru, i ta yuwaan n'yuwatan n na A̱sulazuva a̱a̱ lyunguwa̱ ɗu tsugbashi. U ta̱ kuru a̱a̱gba̱la̱ a̱ rumu a̱ yinlu i ɗu, hali she nu u kototo ɗu.>>

49 <<A̱sulazuva a̱ ta̱ ta̱wa̱a̱ ɗu ni iɗa diga alanga diga o ukosu wu uvaɗi tsa̱ a̱a̱kuru a̱ za̱luwusa̱ a̱ cipa̱ za na a yuwan nla̱ngi na̱ a̱ɗu, iɗa i na yaa gura reve elentsu e le shi. 50 Iɗa i na ama a̱ yi a̱ ri usuɗuwu i na yee ene tsugbain tsa abara ko e ene iliyali i mawun shi. 51 A ta tama umatsun wi iliyamunga i ɗu ni itana ya̱ a̱ɗuma̱ a̱ ɗu, hali she na̱ o kototo ɗu. Aa lyawaa ɗu ishina shi, ko masayan ma sa'avu shi, ko mani'in ko ma̱dindim mo oɓolo mi inan i ɗu ko vi ikyon ko vu mgbele vo oɓolo a̱ ɗu shi, hali she no o kototo ɗu.>> 52 <<A̱ ta̱ ka̱nda̱ruwa̱ iɗa suru a̱tsuma̱ e iɗa i ɗu hali she na̱ ɓaɓu vu uga'an vu ucira na yaa zuwusaa ucira a̱ riya̱. A̱ ta̱ ka̱nda̱ruwa̱ iɗa i ɗu suru i na A̱sulazuva aa casu ɗu nu uvon.

53 <<Adama a̱ a̱tsuma̱lima̱ a na n'yuwatan n ɗu maa ca ɗu a mantsa ma na a̱ ka̱nda̱ruwa̱i'i i ta tama muwun n ɗu n na i matsain, inama i muwun mo olobo n ɗu ne esheli a na A̱sulazuva A̱sula̱ a̱ ɗu a ca nɗu. 54 Ko vuma va̱ a̱ɓula̱ na la'ai uvotowun wu ugbozu na ankuri a̱tsuma̱ a̱ ɗu wee ene iliyali yi za va̱ yi ko ka va̱ yi na u cigai ko muwun ma̱ yi n na n ri wuma shi. 55 Agba waa ca nanza a̱tsuma̱ e le nama muwun ma̱ yi na waa tamusa shi. Adama ana a̱yi ɗa ili i na wa̱a̱ da̱na̱ na̱ a̱yi goon a mantsa ma̱ a̱tsuma̱lima̱ a na n'yuwatan n ɗu maa ca ɗu mantsa ma na a̱ ka̱nda̱ruwa̱i ilyuci i ɗu nu uvon suru. 56 Ka va̱ a̱ɓula̱ na la'ai uvotowun wu ugbozu na ankuri a̱tsuma̱ a̱ ɗu, za na aa zuwa anana a̱ yi e iɗa shi adama ankuri a̱ yi nu uvotowun wu ugbozu, u ta 'yuwan vali va̱ yi na u cigai na̱ mawun ma̱ yi mo ulobo nu usheli, 57 nu umatsutsun na̱ muwun n na u matsain waru. Adama a na u ta ciga u tama le usokowu mantsa mo uka̱nda̱ruwu wu uvo'on na̱ a̱tsuma̱lima̱ a na n'yuwatan n ɗu maa ca ɗu a̱tsuma̱ e ilyuci'i.>>

58 <<Ni i yuwan tsutoni ni idanshi i wila̱ u nda suru ulobonu shi, aza a na a ɗanai a̱tsuma̱ a aatagada nda shi, adama yu uwwa wovon wa Ala a tsugbain o ndolo ili i wovon, ala a̱ A̱sulazuva A̱sula̱ a̱ ɗu shi, 59 A̱sulazuva a̱ ta̱ lyunguwa̱ ɗu na̱ limatan ɗu mɓa̱la̱ n wovon, mu usuɗuwu na̱ meleshe ma babu ukotu na̱ banakun vu usuɗuwu na voo koto shi. 60 A̱vu u ta̱wa̱a̱ ɗu na̱ mɓa̱la̱ m Masar suru aza a na yaa uwwusa wovon, a̱vu e reme ɗu. 61 A̱sulazuva a̱ ta̱ ta̱wa̱a̱ ɗu na̱ cu'un vu mɓa̱la̱ suru na̱ meleshe ma na a ɗanai a̱tsuma̱ a aatagada a̱ wila̱ a nda shi, hali she no o kototo ɗu. 62 A̱ɗu na i da̱na̱i a̱bunda̱ tse italyo'o ya zuva i to o'wo ke'en, adama a na i yuwain tsutoni na adanshi a̱ A̱sulazuva A̱sula̱ a̱ ɗu shi. 63 Cine A̱sulazuva a uwwai uyo'o u zuwa ɗu i lyuwa elime reve waru i yuwan a̱bunda̱, ne ɗa waru woo yo'ono yi u lungusa̱ ɗu a̱vu u kototo ɗu. A ta tawa ɗu a̱tsuma̱ e iɗa i na i cigai i uwa wo o'wo ɗu agadu.

64 <<Reve A̱sulazuva e bete'we ɗu a̱tsuma̱ a nɗa suru, diga o ukosu wu uvaɗi u nda a̱ tyo o ukosu u ndeɗe. Ɗe ɗa yaa yuwaan musula̱ n ro a̱ga̱nda̱, musula̱ mu ɗanga na̱ va atali aza a na a̱ɗu ko nkaya n ɗu n revei shi. 65 A̱tsuma̱ a nɗa n ndolo ya̱a̱ tsura̱ wivuwun shi, ko uba̱ta̱ u na anana a̱ ɗu aa dasa. Ɗe ɗa A̱sulazuva aa ca ɗu wuda'un wo okolo, yo o'wo na̱ a̱da̱mba̱lya̱ e esu nu ukuɗu wo okolo. 66 I ta̱ da̱na̱ a̱tsuma̱ a addama kuci tapu na̱ wovon ayin nu usana, yee reve ko i ta rawa nfa'an shi. 67 Nu usana i ta damma, <A̱ shi de a damma ulivu u ɗa!> Nu ulivu waru a̱vu i damma,<A̱ shi de a damma usana u ɗa!> Adama o wovon u na woo shiton okolo a̱ ɗu ni ili i na esu a̱ ɗu ee eneshe. 68 A̱sulazuva a̱ ta̱ ka̱mbuwa̱ ɗu Masar a̱tsuma̱ a antsun ko na n dammai ya̱a̱ da̱shi 'ya̱wa̱ ɗe shi. Ɗe ɗa yaa ciga i wina aciya̱ɗu e ekere a n'yuwatan n ɗu yo o'wo agbashi e le ali na̱ a̱ma̱ci, agba ko za aa tsula ɗu shi.>>