1 <<Na̱ vuma zuwa ka reve u ta̱wa̱ wu uwwisa uyo'o wa̱ yi shi adama a na u cina yi ta̱ ni ili i na i lobono niyi shi, a̱vu u ɗanaa yi aatagada a wukasu u lolo, a̱vu u ca yi adama u lyawaa yi u'wa.✝ 2 Reve na̱ wu uta̱ u lyawa u'wa wa̱ yi, a̱vu wo olo vali ro, 3 a̱vu vali ire'e waru u 'yuwan yi hali u ɗanaa yi aatagada a wukasu u lolo, a̱vu u ca yi u gba̱ra̱ yi a̱tsuma̱ o u'wa yi, ko waru gba na̱ vali'i u kuwa̱, 4 agba vali vu ufaru va̱ yi, za na ca niyi aatagada a wukasu u lolo wa̱a̱ da̱shi zuwa yi a na woo o'wo ka va̱ yi waru shi adama a na u lyungusa̱ ta̱ ɗe aciya̱yi nu ufaru. Ili yi idaba i ɗa e ekere A̱sulazuva. She i ta̱wa̱ ni ili yi idaba a̱tsuma̱ e iɗa i na A̱sulazuva A̱sula̱ a̱ ɗu aa ca ɗu agadu wan.

5 <<Vuma na yuwain lolo usa'avu, she i lyungu yi uvon wan ko i ca yi ulinga u ro wan. U ta̱ da̱na̱ fa̱a̱n wi isawan o u'wa hali aa'wan a̱ ta̱ adama u yo'onoto ka va̱ yi okolo.

6 <<She vu ushi aatali a yira o una̱ wu utan wan ko aatali e ke'en ko za gbain, adama a na u to o'wo she damma a tara ta̱ wuma u vuma'a o una̱ wi ili i na oo tono.

7 <<Vuma na e remei wi iva̱i za va̱ yi za va Isra'ila, a̱vu u ka̱mbuwa̱ yi tsa aagbashi ko u wina yi, vivu ndolo a̱ to una yi. Ne ɗa yaa tawa iwuya a̱tsuma̱ a̱ ɗu.

8 <<Adama a̱ mɓa̱la̱ mu ukutu, i yuwan ugbozu, i yuwan cine nan ganu, aza a na ele ɗa nan Levi a damma nɗu foo. I kuru ili i na n zuwaa nle ulobonu. 9 Cuwain ni ili i na A̱sulazuva A̱sula̱ a̱ ɗu a yuwain na̱ Maryamu o ure a mantsa ma na yu uta̱i a̱tsuma̱ a Masar.

10 <<Na̱ vu ca moron ma̱ nden ma̱ wu utan vu cu'un vi ili suru, she vu 'ya̱wa̱ a̱tsuma̱ o u'wa wa̱ yi adama vu tara yi itana o una̱ wi ili i na voo tono yi wan. 11 Vi isawan a alanga reve vu lyawa vuma na vu cayi uta'an u ta̱wa̱a̱ wu ni ili'i. 12 Na̱ vuma'a alambi a ɗa, she vaa asa ni ili i na u ca nuwu e ekere a̱ wu wan. 13 I ka̱mbuwa̱a̱ yi aapalutsu a̱ yi nu ulivu adama wa asaa. A̱vu u godyo ɗu, u to o'wo ɗu ili ya̱ a̱ɓula̱ e ekere a̱ A̱sulazuva A̱sula̱ a̱ ɗu.

14 <<She i paala za zamalinga za na ri nu ulambu wan, ko za ɗu za va Isra'ila ko mocin ɗa na ri nden a̱tsuma̱ e ilyuci i ɗu. 15 I tsupa yi ikebe ya̱ yi kafu urana u riya̱, adama a na u ta̱ nu ulambu waru u ta zuwusaa yi ucira. Adama ta̱wa̱ u showen A̱sulazuva a aci a̱ wu, reve wo o'wo wu unusu wan.

16 <<She o una nan dada adama o unusu u muwun n le wan, ko o una muwun adama o unusu u nan dada le wan. Za suru ta̱ kuwa̱ adama o unusu wa̱ yi.

17 <<She i putsa mocin ko makpa'an nu uge'etosu u mejege wan, ko i tara aapalutsu a̱ ma̱runa̱ o una̱ wi ili i na yoo tono yi wan. 18 I cuwan agbashi a ɗa i shi a̱tsuma̱ a Masar, reve A̱sulazuva A̱sula̱ a̱ ɗu a tsupaa ɗu diga ɗe. A̱yi ɗa i zuwai maa dansa ɗu i yuwan ili i nda.

19 <<A mantsa ma na vu ri o ugasa wu uɗuma̱ wa̱ wu a̱vu vi icina aakatalu, she vu ka̱mba̱ vu tanu yi wan. Lyawa yi pe adama o omocin na̱ mkpa'an na̱ nruna̱, adama A̱sulazuva A̱sula̱ a̱ ɗu a zuwaa wu aba'un a̱tsuma̱ o ulinga wu ukere wa̱ wu biti. 20 A mantsa ma na vu za̱ka̱tsa̱i ɗanga zetun va̱ wu, she vu ka̱mbisa̱ e ete'en ute'esan wan. Vu lyawa ili i na i buwai adama o omocin na̱ mkpa'an na̱ nruna̱. 21 A mantsa ma na vu ri o uta'an wa̱ ina̱bi a̱tsuma̱ o uɗuma̱ wa̱ ina̱bi wa̱ wu, she vu ka̱mbisa̱ u'yanlu a ataci'i wan. Vu lyawa ili i na i buwai adama o omocin na̱ mkpa'an na̱ nruna̱. 22 Cuwain a na agbashi a ɗa i shi e iɗa ya Masar. Adama o ndolo ɗa n damma nɗu i yuwan ili i nda.>>