1 Musa lyuwa ta̱ elime na adanshi u damma, <<I guza̱ woto wa Abib *reve i yuwan tsutoni na̱ A̱buki a Mapasa a̱ A̱sulazuva A̱sula̱ a̱ ɗu, adama a na o woto u ɗaɗa o uta̱a̱ nɗu a̱tsuma̱ a Masar na ayin. 2 I ta ca A̱sulazuva A̱sula̱ a̱ ɗu kucci va̱ A̱buki a Mapasa a̱tsuma̱ e iliyamunga i na i ri ne ele, ikyon na̱ mgbele ni inan, uba̱ta̱ u na A̱sulazuva aa ɗangwa Ala a̱ yi a̱a̱ da̱na̱. 3 She i tama kucci'i no opopofu a na a yuwain na̱ wolilo wan, amma a̱tsuma̱ a rana cindere i tama opopofu a na a yuwain babu wolilo, opopofu a̱ a̱tsuma̱lima̱, adama a na i lyawai Masar ni ilaɗi, adama a rana wuma ɗu suru i da̱na̱ a cuwusan na̱ mantsa ma na i lyawai Masar. 4 She a cina wolilo a̱tsuma̱ e itana i ɗu ko ke'en wan hali rana cindere e iɗa i ɗu. She i lyawa inama i na i paɗai kucci nu ulivu urana wu ufaru waa asa hali she usana u ro wan.

5 <<Yaa ca kucci va̱ A̱buki a Mapasa a̱tsuma̱ e ilyuci i na A̱sulazuva A̱sula̱ a̱ ɗu aa casu ɗu shi. 6 Amma i ca kucci'i uba̱ta̱ u na A̱sulazuva A̱sula̱ a̱ ɗu aa ɗangwa nɗu adama Ala a̱ yi a̱a̱ da̱na̱. Uba̱ta̱ u ɗaɗa goon yaa ca kucci va̱ A̱buki a Mapasa, nu ulivu nu urana u riya̱, tsa mantsa ma na yu uta̱i diga Masar gan. 7 I ta su'wan yi reve i tama yi uba̱ta̱ u na A̱sulazuva A̱sula̱ a̱ ɗu aa ɗangwa. Nu usana u tawa reve vuma suru ka̱mba̱ a̱tsuma̱ o oogodo a̱ yi. 8 A̱tsuma̱ a rana ta̱li ɗa yaa tama opopofu a na a̱ ri na̱ wolilo shi. O urana we cindere u ɗa yaa yuwan a̱ba̱jini e iɓolo a̱ tyo uba̱ta̱ wa̱ A̱sulazuva A̱sula̱ a̱ ɗu, a̱tsuma̱ o urana u ndolo yaa yuwan ulinga u ro shi.

9 <<I kece ajuma e cindere, diga a mantsa ma na i temei kya'an vi ishina i na i ri mishin. 10 A̱vu i yuwan A̱buki a Ajuma ajuma a̱ ma̱ka̱ka̱n ma̱ A̱sulazuva A̱sula̱ a̱ ɗu a casu ne'e no okolo a̱ ta̱ a̱tyo a aba'un a na A̱sulazuva A̱sula̱ a̱ ɗu a ca nɗu. 11 A̱vu i yuwan mere a̱ ma̱ka̱ka̱n ma̱ A̱sulazuva A̱sula̱ a̱ ɗu uba̱ta̱ u na waa ɗangwa adama Ala a̱ yi a̱a̱ da̱na̱, a̱ɗu no olobo ne esheli a̱ ɗu, na agbashi a ali na̱ va̱ a̱ma̱ci, oɓolo na̱ nan Levi a na a̱ ri a̱tsuma̱ e ilyuci i ɗu, no omocin na̱ mkpa'an oɓolo na̱ nruna̱ n na n ri a̱tsuma̱ a̱ ɗu. 12 I cuwan ɗe nu ufaru a̱ɗu agbashi a ɗa i shi e iɗa ya Masar, reve i toni wila̱ u na a ca nɗu ulobonu.

13 <<I yuwan a̱buki a̱ Muva̱li hali rana cindere ni i koto uɓolotosu wi itana yu uɗuma̱ i na i fabai nu uba̱ta̱ u na i kpokoi masayan ma̱ ina̱bi. 14 I yuwan mere a̱tsuma̱ a̱ a̱buki a̱ ɗu, a̱ɗu, no olobo ne esheli a̱ ɗu na agbashi a ali a̱ ɗu na̱ va̱ a̱ma̱ci na̱ nan Levi, oɓolo no omocin a̱ ɗu na̱ mkpa'an na̱ nruna̱ n na n ri nden a̱tsuma̱ e ilyuci i ɗu. 15 Rana cindere ɗa yaa yuwan A̱buki'i a̱ ma̱ka̱ka̱n ma̱ A̱sulazuva A̱sula̱ a̱ ɗu uba̱ta̱ u na aa ɗangwa, adama a na u ta zuwaa ɗu aba'un e itana yu uɗuma̱ i ɗu suru oɓolo na̱ linga ve ekere a̱ ɗu, waru i ta yuwan ma̱za̱nga̱ ma amayun.

16 <<Ali suru a ciga a 'yuwan a̱ ta̱wa̱ o ɓoloto a̱ ma̱ka̱ka̱n ma̱ A̱sulazuva toto uta'atsu a̱tsuma̱ a aa'wan uba̱ta̱ u na A̱sulazuva A̱sula̱ a̱ ɗu aa ɗangula: a̱yi ɗa A̱buki o Opopofu a na a̱ ri na̱ wolilo shi, na̱ A̱buki a Ajuma a ajuma na̱ A̱buki a̱ Muva̱li. She vuma ta̱wa̱ a̱ ma̱ka̱ka̱n ma̱ A̱sulazuva ekere lya̱nga̱ wan. 17 Vuma suru u ta̱wa̱a̱ ni ili i na waa gura ta̱wa̱a̱, a̱tyo a aba'un a na A̱sulazuva A̱sula̱ a̱ ɗu a zuwaa nɗu.>>

18 Reve Musa lyuwa elime na adanshi u damma, <<I zuwa a̱za̱ o uge'etosu na azagbain o gundo ɗu suru a̱tsuma̱ e ilyuci i na A̱sulazuva A̱sula̱ a̱ ɗu aa casu ɗu. A ta yuwaan ama uge'etosu wa amayun. 19 She i vadala amayun wan ko i roco ikpa'a wan. She i ushi utowusu wu una̱ wan, adama a na utowusu wu una̱ u tsu rumba̱na̱to ta̱ esu a za vu ugbozu reve u vadala adanshi a za va̱ a̱ɓula̱. 20 I toni amayun, waru amayun goon adama i yuwan wuma waru i tsura̱ iɗa i na A̱sulazuva aa casu ɗu.

21 <<She i shuwa̱ a̱shuwutsu o una̱ wa̱ a̱ma̱li a Ashera zuzu na̱ masa'a ma na yaa yuwan adama a̱ A̱sulazuva A̱sula̱ a̱ ɗu wan. 22 A̱a̱ shuwa̱ aatali adama a yuwaan yi a̱ga̱nda̱ shi, adama a na A̱sulazuva A̱sula̱ a̱ ɗu a 'yuwan ta̱ ili i ndolo.>>