1 <<Poloi atsuvu a̱ɗu zuva, n ta yuwan adanshi.

A̱vu iɗa vu uwwa adanshi o una̱ a̱ va̱.

2 Lyawa uritosu u va̱ wu ɗa̱wa̱ tsi iro'i,

adanshi a̱ va̱ a̱ cipa̱ tsa a'iza,

tsa̱ yiji'in a anlya a sa'avu,

waru tsi iro'i a̱ a̱vu'un a sa'avu.

3 Adama a na n te ɗe ala a̱ A̱sulazuva.

Cuwai tsugbain tsa̱ A̱sula̱ a̱ tsu!

4 A̱yi Aatali a ɗa. Ulinga wa̱ yi u shiwan ta̱,

adama a na re va̱ yi suru amayun a ɗa.

A̱sula̱ a̱ a̱ɓula̱ za na tsu nusan shi,

a̱yi za va amayun na̱ a̱ɓula̱ a ɗa.

5 <<A yuwan ta̱ ili yi idaba a̱ tyo e ekere a̱ yi,

a̱za̱ o unusu a ɗa a buwa muwun ma̱ yi shi,

amma ama e iwuya a na a lyawai ure.

6 Ne ɗa yaa tsupa A̱sulazuva,

a̱ɗu a̱za̱ o ulambu wu urevu a na a̱ ri nu ugbozu shi?

A̱yi dada ɗu ɗa shi, za na ruma nɗu,

za na yuwan nɗu a̱vu u shuwa̱ ɗu shi?

7 <<I cuwan na̱ rana va̱ a̱ca̱pa̱,

i yuwan majiyan mantsa ma̱ a̱bunda̱ ma na ma̱ ka̱ra̱i.

Ecei dada ɗu, u ta damma ɗu.

Ecei mbara n ɗu a ta damma ɗu.

8 Ana Mogono ma̱ A̱sula̱ ma cayi nɗa agadu e le,

a mantsa ma na u ne'eshen ama suru,

a̱vu u zuwaa gundo a̱tyoo

o una̱ wa̱ a̱bunda̱ wa aza a Isra'ila.

9 Adama a na akunda a̱ A̱sulazuva ele ɗa ama a̱ yi,

Yakubu akunda a agadu a̱ yi.

10 <<U tsura̱ yi ta̱ a̱tsuma̱ a̱ a̱tsumona,

o ogozo a na vuma ri shi iɗa i na i kuwa̱i.

Reve u yuwaan yi a̱ra̱ga̱ u ka̱lyuwa̱ yi,

u geshe yi tsa mawun ma̱ lyusu ma̱ yi,

11 tsa̱ a̱kuru a na a tsu zuwa yikinda ya̱ yi zuva,

za na tsu 'yawan zuva muwun ma̱ yi,

za na tsu bece evelu a̱ yi a̱vu u keɗe le

a̱vu u sheɗe le e evelu a̱ yi.

12 A̱sulazuva a ɗa goon o rono niyi aɗanga,

ko mocin ma̱sula̱ ma̱ shi oɓolo na̱ a̱yi shi.

13 <<Reve u zuwa yi u kumba a agaɗi,

a̱vu u lyuwato yi ni itana yu uɗuma̱.

Reve u kungwato yi ni ishiki diga a aatali

na̱ mani'in ma̱ zetun diga a aatali o ugbamu,

14 na̱ maani ma̱ a̱ga̱ɓa̱ na̱ maani me inan ni ikyon

na abaji a mani'in me ikyon na̱ mukyokyon,

no ogono e inan na̱ nga̱ji diga Bashan,

oɓolo ni yitabo i na i la'ai ulobonu.

Reve vu sowo masayan ma̱ ina̱bi ma sa'ani ma̱ shili.

15 <<Reve Jeshurun* yuwan mgbain u ka̱ra̱ a̱ 'ya̱susa̱n aci,

u cuwa̱n, u yuwan ugba̱mu u yuwan shembu shembu.

Reve u lyawa A̱sula̱ za na yuwan niyi

u cuwa na Aatali Za vi Iwawi ya̱ yi shi.

16 Reve a zuwa yi tsushu'un na̱ musula̱ n le,

reve a zuwa yi upan adama a̱ a̱ma̱li e idaba e le.

17 Reve a ca otoni a̱ lima̱ aza a na A̱sula̱ a ɗa shi kucci,

musula̱ n na e revei shi,

na̱ musula̱ n sa'avu n na a̱ ta̱wa̱ yi na̱ a̱ca̱pa̱,

aza a na nkaya n ɗu mu uwwai wovon u le shi.

18 A vari Aatali a na a matsan nle,

e icina na̱ A̱sula̱ a na a ca nle wuma.

19 <<A̱sulazuva e ene ta̱ ili i nda reve u 'yuwan le,

adama a na olobo a̱ yi ne esheli a̱ yi a zuwa yi ta̱ u yuwan upan.

20 Reve u damma, <N to sokoo le urewesu u va̱,

a̱vu me ene cine ukosu u le woo o'wo,

adama a na ele mantsa ma vama ma ɗa,

muwun mu ulambu wa̱ a̱ɓula̱.

21 A zuwa mu ta̱ tsushu'un na̱ musula̱ me epen.

A̱vu a zuwa mu upan na̱ a̱ma̱li e pere e le.

Adama o ndolo n ta zuwa le tsushu'un tsa aza a na ama a ɗa shi.

N ta zuwa le upan ni iɗa i na i ri nu ugbozu shi.✝

22 Adama a na upan u va̱ u ta madala tsa akina,

u ta̱ ma̱kula̱ a̱ cipa̱ hali a̱ tyo a̱ a̱ru'un o ukwisa̱.

U ta lyuwusa uvaɗi nu utsuru wa̱ yi,

reve u lyuwa hali a̱ tyo a̱ nkyun mu nsasan.

23 << <N to ɓolotowo le mɓa̱la̱,

reve n kotoo le aya a̱ va̱.

24 Ambulu a̱ ta̱ lungusa̱ le,

ubanakun na̱ mɓa̱la̱ mu usuɗuwu n to soɗu le.

N ta̱ lyunguwa̱ le na anga e inama yu una

na̱ tsukono tsi ili yi ika̱ta̱pu yu una le.

25 Aza a na a̱ ri a alanga matsun me pe'eni ma̱ to una le,

a 'wa le wovon u te reme le.

Olobo ne esheli a̱ ta̱ kuwa̱,

na̱ muwun n na maa apusa maani no ozo o yono fo.

26 N damma ta̱, n te bete'we le

n zuwa e icina ne ele a̱tsuma̱ a ama.> >>

27 Amma n ta sumusa izami yi nla̱ngi yi n'yuwatan,

ta̱wa̱ nda a yuwan majiyan

a̱vu a damma, <<Nu ukere u tsu u ɗa tsu lyuwai aci,

A̱sulazuva a ɗa a yuwain ili i nda suru shi.>>

28 <<Isra'ila iɗa i ɗa i babu ugbozu,

urevu wu pe a̱tsuma̱ e le shi.

29 Nna̱ a̱ shi nu ugbozu, a̱ shi te e reve ili nda,

a̱vu e reve cine ukosu u le woo o'wo!

30 Cine tsa ɗa vuma ta̱ a̱a̱ gba̱ra̱ ama ukpakukupa (1,000),

ko ama e re a zuwa ama ukpakukupa kupa (10,000) a suma,

she na Aatali e le a wina le,

ko na̱ A̱sulazuva a wina le?

31 Adama a na aatali e le a̱ ri tsa Aatali a̱ tsu shi,

ko n'yuwatan n tsu n reve ta̱ ne ɗa.

32 Ataci a̱ ina̱bi e le o uta̱ ta̱ diga a ataci a̱ ina̱bi o Sodom

na̱ a̱ɗuma̱ a Gomora.

Muwun n ina̱bi n le n ta̱ tapu na̱ tsukono,

waru okono.

33 Masayan me le tsukono tso yo tsa ɗa,

tsukono tsa wuya vu ruku.

34 << <N soko ili i nda

a̱vu m ɓa̱ru le o uzuwata u va̱ shi?

35 Atsupu za va̱ ɗa, waru n ta tsupa.

Mantsa ma̱ ta̱ lo a̱ ta̱wa̱ ana ana e le ee derece,

mantsa ma̱ a̱tsuma̱lima̱ me le ma yuwan ta̱ zuzu,

meleshe me le ma̱ zura̱ ta̱ a rawa le.>✝

36 A̱sulazuva a ta zuwa ama a̱ yi o'wo fa̱a̱n,

a̱vu we ene iliyali ya agbashi a̱ yi,

na̱ we ene ucira u le u koto,

waru ko vuma ta̱ pasa shi ko aagbashi ko umatsun wu u'wa.✝

37 Reve u damma, <Te ɗa gba musula̱ n le

aatali a na a tarai upa'atan,

38 musula̱ n na n tamai mani'in ma̱ kucci le,

reve o sowo masayan ma̱ kucci vi ili yo oso i le?>

Lyawa le a̱ 'yon a kamba ɗu!

Lyawa le a ca ɗu upa'atan!

39 << <Ka̱lyuwa̱i nda gogo a̱mu na aciya̱va̱ a̱mu ɗa a̱yi!

A̱sula̱ o ro o lo shi she a̱mu.

N tsu una ta̱ waru n tsu ka̱mba̱to ta̱ wuma,

n tsa amaton ta̱ reve waru n ka̱mbuwa̱ gbaga,

ko za aa gura papa za ro o ukere u va̱ shi.

40 N 'ya̱sa̱n ta̱ ukere u va̱ zuva reve n damma,

nna̱ n ri wuma babu ukotu,

41 nna̱ n tewen matsun me pe'eni ma madala ma̱ va̱,

a̱vu n guza̱ yi o ukere u va̱ adama o uge'etosu,

n ta tsupa n'yuwatan n va̱.

A̱vu waru n tsupa aza a na a 'yuwan numu.

42 N ta zuwa aya a̱ va̱ o o'wo usowu na̱ mpasa,

waru matsun me pe'eni ma̱ va̱ ma ta tama inama,

na̱ mpasa ma aza a na a paɗai na aza a na e remei uba̱ta̱ wu uvon,

na aci a azagbain a n'yuwatan.> >>

43 << <Yuwain ma̱za̱nga̱ a̱ɗu nɗa oɓolo na ama a̱ yi,

adama a na u ta tsupaa mpasa ma agbashi a̱ yi.

U ta tsupa n'yuwatan ma̱ yi,

reve u lapula iɗa ya ama a̱ yi.> >>

44 Reve Musa ta̱wa̱ oɓolo na̱ Josuwa ulobo wa̱ Nun, reve u damma idanshi yi ishipa i nda suru a atsuva a ama. 45 Ana Musa kotoi a dansaa aza a Isra'ila idanshi i nda suru, 46 a̱vu u damma le, <<I guza̱ idanshi i na maa ɓarasa ɗu ana'an o okolo, tsura̱ i zuwa muwun n ɗu n kuru idanshi i wila̱ u nda suru mejege. 47 Adanshi e pere a ɗa a̱ ri a̱ tyo e ekere a̱ ɗu shi, amma wuma u ɗu u ɗa. Waru idanshi i nda a ta zuwa ɗu i yuwan wuma a̱bunda̱ e iɗa i na yaa pasa Urudu wo o'wo za ɗu.>>

48 O urana u ndolo gan A̱sulazuva a damma ta̱ Musa, 49 <<Kumba a gawan upasu wa Abarim a̱ tyo a Masasan ma Nebo a̱tsuma̱ a̱ Mowa a̱ nka̱la̱la̱i na̱ Jeriko, vu ka̱lyuwa̱ iɗa ya Ka'ana, iɗa i na maa ca aza a Isra'ila wo o'wo za le. 50 Ɗe a masasan ma na vaa kumba ɗe ɗa va̱a̱ kuwa̱ a̱vu vu cina nkaya ma̱ wu, cine Haruna mawun ma̱ a̱na̱wun ma̱ wu ma̱ kuwa̱i a masasan ma Hor reve u cina nkaya ma̱ yi. 51 Adama a na a̱ɗu ra i yuwaan mu ta̱ ulambu wa̱ a̱ɓula̱ a̱ ma̱ka̱ka̱n ma aza a Isra'ila uba̱ta̱ u mini wa Meriba a Kadesh a̱ A̱tsumona a Zin, waru adama a na i kuɗa̱i o roco akiza a̱ va̱ a̱ ma̱ka̱ka̱n ma aza a Isra'ila. 52 Adama o ndolo, vu te ene iɗa'a diga alanga, agba vaa uwa pe e iɗa i na maa ca aza a Isra'ila'a shi.>>