1 <<A mantsa ma na i uwai a̱tsuma̱ e iɗa i na A̱sulazuva A̱sula̱ a̱ ɗu aa casu ɗu ya agadu, a̱vu i tara yi wo o'wo za ɗu, a̱vu i da̱nu pe, 2 i tara umatsun wu ufaru wi ili i na i cimbai e iɗa i na A̱sulazuva A̱sula̱ a̱ ɗu aa casu ɗu suru i zuwa le a aasaka. Reve i 'ya̱wa̱ uba̱ta̱ u na A̱sulazuva A̱sula̱ a̱ ɗu aa ɗangula adama Ala a̱ yi a̱a̱ da̱na̱. 3 A̱vu i damma ganu na ri o ulinga a mantsa'a, <N damma ta̱ A̱sulazuva A̱sula̱ a̱ wu ana'an a na n ta̱wa̱ ta̱ e iɗa i na A̱sulazuva a kucinayi nkaya n tsu na waa ca tsu.> 4 A̱vu ganu ushi aasaka'a e ekere a̱ ɗu reve u zuwa yi e iɗa elime a masa'a ma̱ A̱sulazuva A̱sula̱ a̱ ɗu. 5 A̱vu i damma a̱ ma̱ka̱ka̱n ma̱ A̱sulazuva A̱sula̱ a̱ ɗu, <Dada va̱ za va Aram va agara a ɗa a̱ shi, reve u cipa̱ a̱ tyo Masar na ama wa'a reve u da̱nu ɗe, a̱vu wo o'wo iɗa i gbain yu ucira na̱ a̱bunda̱. 6 Amma a̱vu ama a Masar o ɓongi tsu a̱vu a ca tsu a̱tsuma̱lima̱ a zuwa tsu ulinga wu usa̱n. 7 A̱vu tsu showen A̱sulazuva A̱sula̱ a nkaya n tsu, a̱vu A̱sulazuva a uwwa mesun ma̱ tsu a̱vu we ene a̱tsuma̱lima̱ a̱ tsu, nu ulinga wu usa̱n u tsu ni iɓongi i na tsoo sowuso. 8 Ɗaɗa A̱sulazuva o uta̱a̱ ntsu nu ukere wu ucira a̱tsuma̱ a Masar, ni ili i wovon yu ucira, ni iroci ni ili ya asalama. 9 A̱vu u ta̱wa̱to tsu uba̱ta̱ u nda, a̱vu u ca tsu iɗa i nda, iɗa i na ye yeneshe maani ni ishiki. 10 Agba gogo tsu ta̱wa̱ ta̱ nu umatsun wu ufaru wi iɗa i na a̱vu A̱sulazuva vu ca ntsu.> A̱vu i zuwa aasaka'a a̱ ma̱ka̱ka̱n ma̱ A̱sulazuva A̱sula̱ a̱ ɗu a̱vu i ka̱ɗa̱to a̱ ma̱ka̱ka̱n ma̱ yi. 11 A̱vu a̱ɗu na̱ nan Levi no omocin a na a̱ ri nden oɓolo na̱ a̱ɗu i yuwan ma̱za̱nga̱ adama e ili i sa'ani i na A̱sulazuva A̱sula̱ a̱ ɗu a ca nɗu na̱ 'wa ɗu suru.

12 <<A mantsa ma na i kotoi wuta̱su wu za ta̱ a̱tsuma̱ a kupa a aa'wan a ta'atsu, aa'wan a̱ wuta̱su wu za ta̱ a̱tsuma̱ a kupa i ca nan Levi ele, no omocin na̱ mkpa'an na̱ nruna̱, adama a lyuwa a̱ lyuci ɗu a̱ cuwa̱n. 13 A̱vu i damma A̱sulazuva A̱sula̱ a̱ ɗu, <Mu uta̱a̱ ta̱ upasu wa akiza o u'wa u va̱ a̱vu n ca nan Levi a̱yi, no omocin na̱ mkpa'an na̱ nruna̱, cine vu zuwai suru. M ɓatsa ko za ta̱ a̱tsuma̱ e ili i na vu zuwai ko mi icina za ta̱ a̱tsuma̱ e le shi. 14 N lyuwa ko ili a̱tsuma̱ e ili ya akiza a mantsa ma na n da̱na̱i a̱ nden ma̱ a̱tsumola̱ngu shi, ko mu uta̱a̱ ili diga a̱tsuma̱ e le a mantsa ma na n da̱na̱i idaba shi, ko n ca a̱kwa̱kwa̱ ili i ta̱ a̱tsuma̱ e le shi. N yuwan ta̱ tsutoni na̱ A̱sulazuva A̱sula̱ a̱ va̱. N yuwan ta̱ ili i na vu zuwa numu suru. 15 Ka̱lyuwa̱ diga zuva uba̱ta̱ wu nden wa akiza wa̱ wu, a̱ tyo e iɗa, a̱vu vu zuwaa ama a̱ wu Isra'ila aba'un, ni iɗa i na vu ca ntsu cine vu tarayi nkaya n tsu akucunu, iɗa i na yee yeneshe maani ni ishiki.>

16 <<A̱sulazuva A̱sula̱ a̱ ɗu a zuwa ɗu ta̱ ana'an i toni ili i na a zuwai na̱ wila̱ nda, i kuru le ulobonu no okolo a̱ ɗu suru na̱ wuma u ɗu suru. 17 I damma ta̱ ana'an a na A̱sulazuva a̱yi ɗa A̱sula̱ a̱ ɗu, waru i ta yuwan mmalu a̱tsuma̱ e re va̱ yi, tsa̱ra̱ i guza̱ ili i na u zuwai ni ili i na u dammai na̱ wila̱ wa̱ yi, waru i ta yuwaan yi tsutoni. 18 Waru A̱sulazuva a damma ta̱ ana'an a na a̱ɗu ama a̱ yi a ɗa, ama a̱ la̱nga̱ a̱ yi cine u yuwaan nɗu nzuwulai, a̱ɗu waru i ta̱ kuru ili i na u dammai. 19 A̱yi waru u ta̱ 'ya̱sa̱n ɗu yo o'wo ili yi ica aza a ala na̱ tsugbain, upasu na akapi a ama o uvaɗi a na u yuwain. I to o'wo ama a akiza a̱ A̱sulazuva A̱sula̱ a̱ ɗu cine u yuwain nzuwulai.>>