1 A̱ɗu muwun ma̱ A̱sulazuva A̱sula̱ a̱ ɗu a ɗa. She i ɗana lipu ɗu wan agba i puna kpana va aci a̱ ɗu a mantsa ma na i ri a̱ nden n wira̱ ma aza a na a̱ kuwa̱i wan, 2 adama a na a̱ɗu ama a akiza a̱ A̱sulazuva A̱sula̱ a̱ ɗu a ɗa. A̱tsuma̱ a ama a na a̱ ri pe a̱tsuma̱ o uvaɗi u nda suru, A̱sulazuva a ɗangwa ɗu ta̱ ama a̱ yi ili ya agadu a̱ yi.

3 She i tama ili yi idaba wan. 4 Apa cu'un vi inama i na yaa tama: nan, na̱ kyon, oɓolo na̱ megbele, 5 meshon na̱ mere'on na̱ geve na̱ megbele mo una no oroci e geve na̱ kyon masasan. 6 I ta gura tama nama vu nama na okotsu a̱ yi a̱ ri uɓatsulai ure na̱ nama na tsu ka̱mbuwa̱ utamisa. 7 Amma na̱ ne suru, a̱tsuma̱ a aza a na a̱ tsu ka̱mbuwa̱ utamisa na aza a na okotsu e le a̱ ri uɓatsulai, yaa tama nama va arakumi shi, na̱ mozomu oɓolo na̱ magima. Ko na a̱ tsu ka̱mbuwa̱ utamisa, a̱ ri no okotsu uɓatsulai shi ele ili yi idaba i ɗa e ekere a̱ ɗu. 8 Yaa tama ma̱gurusumu shi, ko na okotsu a̱ yi a̱ ri uɓatsulai u tsu ka̱mbuwa̱ utamisa shi. Ili yi idaba i ɗa e ekere a̱ ɗu, yaa tama nama va̱ yi shi ko i ju'wa̱n a̱kwa̱kwa̱ a̱ yi shi.

9 A̱tsuma̱ e ili i na i ri na̱ wuma a̱tsuma̱ a̱ mini suru, i ta gura tama ili i na i ri na̱ muvelu ko a̱ka̱ɓa̱ a̱ lipu. 10 Amma ili i na i ri na̱ muvelu ko a̱ka̱ɓa̱ shi yaa tama yi shi, ili yi idaba i ɗa e ekere a̱ ɗu.

11 I ta gura tama nnunu n cece suru. 12 Amma ele nda yaa tama shi: a̱a̱kuru na aasala na amikiya, 13 na̱ varaɗo na aajimba, ni icu'un i le koko'o, 14 na̱ cu'un va aakakan suru, 15 na̱ a̱pa̱ma̱ na̱ magapu no oroci a papagula oɓolo na ajimba icu'un icu'un, 16 na̱ vori ke'en na̱ a̱ba̱jini o vori na̱ basara uri, 17 na̱ vori vu una na aasala no oroci a gbagba mini, 18 na aashamuwa no oroci a azamina suru na̱ zogolgomu no oogyon.

19 Mubumbu n na n ri ne evelu suru aza a na a̱ tsu ka̱ta̱pa̱ e iɗa ili yi idaba i ɗa e ekere a̱ ɗu, yaa tama le shi. 20 Ili i na i ri ne evelu suru i na i ri cece i ta gura tama le.

21 She i tama ili i na i kuwa̱i ɗe wan. I ta gura ca mocin na ri nden a̱ lyuci ɗu, u ta gura tama yi, ko i winaa mocin. Amma a̱ɗu gba ama a akiza a ɗa i ri e ekere a̱ A̱sulazuva A̱sula̱ a̱ ɗu. <<She i su'wan megbgbele ma na buwai apasa maani wan.>>

22 <<I reve yu uta̱a̱ ta̱ za ta̱ a̱tsuma̱ a kupa e itana ya̱ a̱ɗuma̱ a na yaa cimbusa aa'wan suru. 23 A̱ ma̱ka̱ka̱n ma̱ A̱sulazuva A̱sula̱ a̱ ɗu, uba̱ta̱ u na waa ɗangwa adama Ala a̱ yi a̱a̱ da̱na̱ ɗa yaa lyuwa za ta̱ a̱tsuma̱ a kupa a̱ kucci vi ishina i ɗu, oɓolo na̱ masayan ma̱ ina̱bi ma sa'avu, na̱ mani'in ma̱ ɗu oɓolo na̱ kucci vu umatsun wu ufaru vi iliyamunga i ɗu suru, inan ni ikyon na̱ mgbele n ɗu, adama i rito cine yaa uwwa wovon wa̱ A̱sulazuva A̱sula̱ a̱ ɗu babu ukotu. 24 Amma na̱ A̱sulazuva A̱sula̱ a̱ ɗu aa zuwaa ɗu aba'un, reve gba uba̱ta̱ u na A̱sulazuva A̱sula̱ a̱ ɗu aa ɗangwa adama a Ala a̱ yi a yuwan ɗu alanga a na ya̱a̱ 'ya̱wa̱a̱ na̱ za ta̱ a̱tsuma̱ a kupa, a na yaa gura 'ya̱wa̱a̱ shi, 25 i wina za ta̱ a̱tsuma̱ a kupa'a a̱vu i kita'wan ni ikebe a̱vu i 'ya̱wa̱ ni ikebe'e uba̱ta̱ u na A̱sulazuva A̱sula̱ a̱ ɗu aa ɗangwa. 26 I yuwan ulinga ni ikebe'e i tsula ili i na i cigai: nan ko kyon, oɓolo na̱ masayan ma̱ ina̱bi ko cu'un vi ili yo oso vu ucira ro, ko waru ili i ro ɗe ko'o i na i cigai. A̱vu a̱ɗu na̱ 'wa ɗu suru i lyuwa lo a̱ ma̱ka̱ka̱n ma̱ A̱sulazuva A̱sula̱ a̱ ɗu reve i yuwan ma̱za̱nga̱. 27 Amma she yi icina na̱ nan Levi a na a̱ ri pe a̱tsuma̱ e ilyuci i ɗu wan, adama a na a̱ ri na akunda ko agadu a aciyele tsa̱ ɗu shi.

28 <<O ukosu wa aa'wan a ta'atsu suru, i ta̱ uta̱a̱ za ta̱ a̱tsuma̱ a kupa suru a̱tsuma̱ e itana yu uɗuma̱ u ɗu za na i gasai a a'wan o ndolo, i zuwa le e ilyuci i ɗu. 29 Adama nan Levi a na a̱ ri na akunda ko agadu shi oɓolo no omocin a̱tsuma̱ a̱ ɗu na̱ mkpa'an oɓolo na̱ nruna̱ aza a na a̱ ri na̱ nden e ilyuci i ɗu a̱ tsura̱ a lyuwa hali a̱ cu'wa̱n. Tsundolo tsa ɗa A̱sulazuva A̱sula̱ a̱ ɗu aa zuwaa ɗu aba'un a̱tsuma̱ a linga ɗu suru.>>