1 <<Ele nda ele ɗa ili i na a zuwai ni ili i na o toni na̱ wila̱ u na A̱sulazuva A̱sula̱ a̱ ɗu a zuwa numu n rito ɗu adama i yuwan tsutoni ne ele e iɗa i na yaa pasa Urudu wo o'wo za ɗu, 2 adama a̱ɗu, na̱ muwun n ɗu na̱ muwun n tsukaya n ɗu yu uwwa wovon wa̱ A̱sulazuva A̱sula̱ a̱ ɗu waru i yuwan tsutoni ni ili i na a zuwai ni ili i na o toni i na maa casu ɗu, adama i jima o uvaɗi. 3 Uwwai, a̱ɗu ama a Isra'ila! I ka̱mbuwa̱ ugbozu i reve i kuru le ta̱ ulobonu adama ili i wala ɗu mejege, waru adama i bala a̱bunda̱ e iɗa i na yee yeneshe maani ni ishiki, cine A̱sulazuva A̱sula̱ a nkaya n ɗu a yuwaan nɗu nzuwulai.

4 <<Uwwai nda, ama a Isra'ila! A̱sulazuva A̱sula̱ a̱ tsu a̱yi ɗa A̱sula̱ a̱ ta̱ goon.✝ 5 Adama o ndolo, i ciga A̱sulazuva A̱sula̱ a̱ ɗu no okolo a̱ ta̱, na asuvu a̱ ɗu suru, nu ucira u ɗu suru.✝ 6 Lyawa adanshi a na n yuwaan ɗu ana'an a̱ da̱na̱ o okolo ɗu. 7 I rito muwun n ɗu ele kuci, waru i yuwan adanshi e le nni i ri nden o u'wa, ko ni i ri a mmalu o ure, ko nni i von, ko nni i 'yon. 8 Yi nla̱ le e ekere a̱ ɗu, reve waru yi nla̱ le e icin i ɗu tsi iroci i macuwayin. 9 Waru i ɗana le a̱ na̱ntsu vu kobu ɗu na̱ a na̱ntsu vu u'uwata wu ukari u lyuci ɗu.

10 <<A̱sulazuva A̱sula̱ a̱ ɗu a yuwaan ta̱ nkaya n ɗu Ibrahim na̱ Ishiyaku na̱ Yakubu nzuwulai n na waa ca ɗu iɗa i na waa tara ɗu a̱ tyo. Iɗa nda iɗa i ɗa i na i ri ni ilyuci i gbagbain, na̱ saa sa'ani na a̱ɗu i suwai shi. 11 Waru u ta ca ɗu 'wa na ri ni itana i sa'ani i na i zuwai pe shi. A̱sulazuva a ta ca ɗu oko'o a na i ka̱pa̱i shi, na̱ a̱ɗuma̱ na̱ ɗanga na a tsu yuwan limatan ulobonu a na i shuwa̱i shi. Agba nni i lyuwa hali u rawa ɗu, 12 i ka̱mbuwa̱ ugbozu, she yi icina na̱ A̱sulazuva za na uta̱a̱ nɗu e iɗa ya Masar, diga e iɗa i tsugbashi wan.

13 <<A̱sulazuva A̱sula̱ a̱ ɗu a ɗa yaa uwwa wovon. A̱yi ɗa yaa yuwaan a̱ga̱nda̱ waru na ala a̱ yi a ɗa goon yaa kucinaa.✝ 14 She i kuru musula̱ n ro, musula̱ ma ama a na a̱ ri uka̱nda̱ruwu na̱ a̱ɗu wan, 15 adama a na A̱sulazuva A̱sula̱ a̱ ɗu, a na a̱ ri oɓolo na̱ a̱ɗu A̱sula̱ a̱ tsushu'un a ɗa waru upan wa̱ yi u ta̱ puna̱ a̱ tyo a aci a̱ ɗu. A̱vu u kototo ɗu diga o uvaɗi. 16 She i lyungwa̱ A̱sulazuva A̱sula̱ a̱ ɗu cine i yuwain a Masa wan.✝ 17 I reve gba i kuru ta̱ wila̱ u na A̱sulazuva A̱sula̱ a̱ ɗu a zuwaa nɗu, ni ili i na ya̱a̱ kuru nu ure u na u zuwaa nɗu. 18 I yuwan ili i na i ri mejege ni ili i sa'ani e ekere a̱ A̱sulazuva, adama i da̱nu lafiya. Waru adama i uwa i usa iɗa i sa'ani i na A̱sulazuva a kucinayi nkaya n ɗu wo wo'o za ɗu. 19 U ta̱ gba̱ra̱ n'yuwatan n ɗu elime a̱ ɗu, cine u yuwain nzuwulai.

20 <<Ɗe elime na̱ muwun n ɗu me ece ɗu, <Nye i ɗa urevu wi ili nu ure na̱ wila̱ u na A̱sulazuva A̱sula̱ a̱ tsu a zuwa nɗu i kuru?> 21 I usu le, <Agbashi a Firi'awuna a ɗa tsu shi e iɗa ya Masar, agba reve A̱sulazuva o uta̱a̱ tsu diga Masar nu ukere wu ucira. 22 E esu a̱ tsu a ɗa A̱sulazuva a yuwain iroci ya asalama i gbagbain i wovon a aci a aza a Masar na̱ Firi'awuna nu u'wa wa̱ yi suru. 23 Reve wu uta̱a̱ tsu ɗe, adama u 'ya̱wa̱to tsu pe u ca tsu iɗa i na u yuwayin nkaya n tsu nzuwulai. 24 Reve u zuwa tsu kuru ili i nda suru, reve tsu uwwa wovon wa̱ A̱sulazuva A̱sula̱ a̱ tsu adama tsu lyuwa elime kuci waru tsu da̱na̱ wuma, cine tsu ri ana'an. 25 Na̱ tsu ka̱mbuwa̱ ugbozu tsu kuru wila̱ u nda suru a̱ ma̱ka̱ka̱n ma̱ A̱sulazuva A̱sula̱ a̱ tsu cine u zuwa ntsu, u to o'wo tsu ili ya̱ a̱ɓula̱ e ekere a̱ tsu.> >>