1 Ele nda ele ɗa adanshi a na Musa yuwayin aza a Isra'ila suru upasalai wa asana wu Uɗolu wa̱ Urudu a̱ a̱tsumona a Araba za na ri a̱ nka̱la̱la̱i na̱ Suf, e memere ma Faran na̱ Tofe na̱ Laban na̱ Hazero na̱ Dizaha. 2 Mmalu mu rana kupa na̱ za ta̱ ɗa diga Horeb a̱ tyo Kadesh Baniya nu ure u Masasan ma̱ Seyi.

3 O urana wu ufaru u woto wa kupa na̱ za ta̱ wa aa'wan amunga a na aza a Isra'ila o uta̱i Masar, reve Musa damma aza a Isra'ila ili i na A̱sulazuva a damma niyi suru adama e le. 4 A mantsa'a gba cina a lyuwa Sihon mogono ma aza a Amoriya ɗa, za na yuwain tsugono a Heshibon na̱ Og mogono ma Bashan za na da̱nuyi Ashitaro na̱ Edirai.

5 Asana a̱ Urudu a̱tsuma̱ e iɗa ya̱ Mowa ɗa Musa temei a cuɗuwusa wila̱ u nda, u damma:

6 <<A̱sulazuva A̱sula̱ a̱ tsu a damma tsu ta̱ a Horeb a na, <I jima ta̱ na̱ nden a masasan ma nda. 7 'Yoyin i reme ure a̱ tyo e iɗa ya agaɗi ya aza a Amoriya, i tyo uba̱ta̱ wu nron mu nden n le suru upasu wa Araba, e iɗa ya agaɗi ne e iɗa i mugaɗi na̱ Nege nu upasu wu nge'en m mala, a̱ tyo e iɗa ya aza a Ka'ana waru a̱ tyo Lebanon, hali a̱ tyo o Uɗolu u gbain wa̱ Yufiriti. 8 Nlo, n ca nɗu iɗa i nda. Uwai pe i ushi iɗa i na A̱sulazuva a kucinai na waa ca nkaya n ɗu, Ibrahim ni Ishiyaku na̱ Yakubu waru a̱ tyo a limatan va̱ a̱ca̱pa̱ a̱ ɗu.>

9 <<A mantsa mo ndolo, n damma ɗu ta̱, <Maa gura tara ume u ɗu a̱mu a̱ nde'en shi. 10 A̱sulazuva A̱sula̱ a̱ ɗu a̱ da̱shi ɗu ta̱ a̱bunda̱, hali a̱ɗu ɗa nda ana'an a̱bunda̱ tsi italyo'o ya zuva. 11 Lyawa A̱sulazuva A̱sula̱ a nkaya n ɗu a̱ da̱shi doɓonu ɗu a̱bunda̱ ukpakukupa kupa, a̱vu u zuwaa ɗu aba'un cine u yuwain nzuwulai! 12 Amma a̱mu a̱ nde'en cine maa gura tara ili i na yaa damatosun ɗu nu ume u ɗu na̱ nronuloi n ɗu? 13 Ɗangulai ama a̱ ta̱ ta̱ diga o ugundo suru, a̱za̱ o ugbozu nu urevu, aza a na aa casu tsugbain, n ta zuwa le tsugbain a aci a̱ ɗu.> 14 Reve i usu mu, <Ili i na vu foɓoi u lobono ta̱.>

15 <<Ɗaɗa n tarai azagbain o gundo ɗu, a̱za̱ o ugbozu aza a na aa casu tsugbain, reve n zuwa le tsugbain tsa̱ ɗu, azagbain o ukpakukupa kupa na̱ a̱za̱ o ukpaku ukpaku na aza a kupoton uton na aza a kupa kupa, o o'wo azagbain o gundo ɗu. 16 Reve n rono a̱za̱ o uge'etosu a̱ ɗu atsuvu a mantsa'a n damma, <Yu uwwa nronuloi ma na a̱za̱ a̱ ɗu aa yuwusan, a̱vu i ge'eto mejege, ko na adanshi'i za vu za va Isra'ila na̱ za va Isra'ila ɗa ko uba̱ta̱ wu za va Isra'ila na̱ mocin ɗa. 17 She i roco aɗangulu a̱tsuma̱ o uge'etosu wan. I polo atsuvu yu uwwa vuma ke'en na̱ zagbain suru una̱ta̱. She yu uwwa wovon wu za wan, adama a na uge'etosu za va̱ A̱sula̱ a ɗa. I ta̱wa̱a̱ mu na adanshi a na a la'a nɗu ucira, mu uwwa yi.> 18 A mantsa mo ndolo n damma ɗu ta̱ ili i na yaa yuwan suru.

19 <<Reve cine A̱sulazuva A̱sula̱ a̱ tsu a zuwa ntsu, tsu 'yon diga Horeb reve tsu kuru a̱ tyo e iɗa ya agaɗi ya aza a Amoriya na̱ a̱tsumona a gbain o wovon o ndolo a na ye enei. Reve tsu rawa Kadesh Baniya. 20 Reve n damma ɗu, <I rawa ta̱ iɗa ya agaɗi ya aza a Amoriya, za na A̱sulazuva A̱sula̱ a̱ tsu aa casu tsu. 21 Uwwai nda, A̱sulazuva A̱sula̱ a̱ ɗu a ca ɗu ta̱ iɗa'a. 'Ya̱wa̱i i usa yi cine A̱sulazuva A̱sula̱ a nkaya n ɗu a damma nɗu. She yu uwwa wovon wan, waru she okolo a̱ ɗu a kuɗa wan.>

22 <<Reve suru nɗu i ta̱wa̱ ya̱'a̱ va̱ a̱vu i damma, <Lyawa tsu lyunguyi ama elime a̱ tsu a tawaa tsu utyo wi iɗa'a, reve a̱ ta̱wa̱ a damma tsu ure u na tsa̱a̱ kuruwa̱a̱ ni ilyuci i na tsaa uwa.>

23 <<Reve me ene a̱sa̱la̱'a̱ o lobono mu ta̱. Ɗaɗa n ɗangwai ama kupa ne ejere, ugundo suru vuma ta̱. 24 Reve a̱ 'yon a gawan a̱ tyo e iɗa ya agaɗi, reve a rawa o uka̱ri wa Eshikol a̱vu a tawa iɗa'a utyo. 25 Reve a tara umatsun wu ɗanga vi iɗa'a e ekere e le a̱ ta̱wa̱a̱ tsu, reve a damma, <Iɗa i sa'ani i ɗa i na A̱sulazuva A̱sula̱ a̱ tsu aa casu tsu.> >>

26 <<Agba i shi a zama i gawan ɗe shi. I 'yuwan a yuwaan adanshi a̱ A̱sulazuva A̱sula̱ a̱ ɗu tsutoni. 27 I yuwan ta̱ adanshawuya o ogodo a̱ ɗu i damma, <A̱sulazuva a 'yuwan tsu ta̱, ɗaɗa i zuwai wu uta̱a̱ ntsu e iɗa ya Masar, adama u zuwa tsu e ekere a aza a Amoriya tsa̱ra̱ o kototo tsu. 28 Te tsee tyo? A̱za̱ a̱ tsu a na tsu lyunguyi a zuwa ta̱ okolo a̱ tsu a kuɗa. A damma ta̱, <<Ama'a a la'a tsu ta̱ ucira nu uga'an. Ilyuci'i a̱ ta̱ gbagbain na̱ kari hali she zuva. Hali gba tse ene ta̱ aza a Anaku ɗe.>> >

29 <<Reve n damma ɗu, <She okolo a̱ 'yon ɗu ko yu uwwa wovon u le wan. 30 A̱sulazuva A̱sula̱ a̱ ɗu zane ri elime a̱ ɗu u ta yuwan uvon adama a̱ ɗu, cine u yuwaan nɗu a̱tsuma̱ a Masar e esu a̱ ɗu, 31 na̱ a̱ a̱tsumona waru. Uba̱ta̱ u na ye enei cine A̱sulazuva A̱sula̱ a̱ ɗu a tanu nɗu, cine dada tsu tanu mawun ma̱ yi, a̱tsuma̱ a mmalu n ɗu suru hali i rawa pa.>

32 <<Suru na̱ ne, i 'yuwan ta̱ a zuwaa A̱sulazuva A̱sula̱ a̱ ɗu ucira, 33 za na walai elime a̱ ɗu a̱tsuma̱ a mmalu n ɗu, na akina na ayin, waru ne eleshe nu urana, adama u zamiya ɗu uba̱ta̱ u na ya̱a̱ va̱la̱, reve waru u roco ɗu ure u na ya̱a̱ kuru.

34 <<Ana A̱sulazuva a uwwai ili i na i dammai, u yuwan ta̱ upan lon. Reve u kucina, 35 <Ko vuma ta̱ a̱tsuma̱ a ama a nda va mantsa ma wuya ma nda wee ene iɗa i sa'ani i na n kucinai na maa ca nkaya n ɗu shi, 36 she Keleb ulobo wa Jefune. U te ene yi, waru n ta ca yi na̱ muwun mu ugundo ma̱ yi iɗa i na u dasai na anana a̱ yi, adama a na u kuru ta̱ A̱sulazuva no okolo a̱ ta̱.>

37 <<Adama a̱ ɗu a ɗa A̱sulazuva a yuwain upan na̱ a̱mu, a̱vu u damma, <A̱vu fo vaa uwa pe shi. 38 Amma Josuwa ulobo wa̱ Nun, za na aa kambusa wu, u ta uwa. Vu da̱shi yi okolo ugbamu, adama a na a̱yi ɗa woo rono aza a Isra'ila aɗanga o o'wo ni iɗa'a. 39 Waru muwun n ɗu aza a na i dammai e te reme le o uvon, aza a na koto e revei isa'ani ni iwuya shi, a ta uwa e iɗa'a. N ta ca le a̱yi, reve a tara yi wo o'wo za le. 40 Amma a̱ɗu gba, i vadala i ka̱mba̱ a̱ tyo a̱tsumona nu ure u Mala ma̱ Shili.>

41 <<Reve i usu, <Tsu yuwaan ta̱ A̱sulazuva unusu. Tsu ta gawan tsu yuwain uvon cine A̱sulazuva A̱sula̱ a̱ tsu a zuwa ntsu.> Ɗaɗa za suru a̱tsuma̱ a̱ ɗu tarai itana yu uvon ya̱ yi, a majiyan ili yu usa̱n i ɗa shi i gawan a̱ tyo e iɗa ya agaɗi.

42 <<Amma A̱sulazuva a damma mu ta̱, <Damma le, she i gawan i 'ya̱wa̱ uvon wan adama a na ma̱a̱ da̱na̱ oɓolo na̱ a̱ɗu shi. Na̱ ne ɗa shi, n'yuwatan n ɗu n ta lyuwa ɗu.>

43 <<Ne ɗa gba n damma nɗu, agba yu uwwa shi. A̱vu i yuwaan adanshi a̱ A̱sulazuva aciyogbamu, reve a̱tsuma̱ a aciyogbamu a̱ ɗu i ka̱ra̱ a gawan a uwa e iɗa ya agaɗi. 44 Reve gba aza a Amoriya a na a̱ ri nden e iɗa ya agaɗi o ndolo o uta̱ adama a̱ ɗu. Reve a saɓa ɗu na̱ a̱bunda̱ tsi ishiki, a̱vu e reme ma̱dukwa̱ ma̱ ɗu diga Seyi hali a̱ tyo Homa. 45 Ana i ka̱mba̱i a̱vu i shon a̱ ma̱ka̱ka̱n ma̱ A̱sulazuva, agba wu uwwa mesun ma̱ ɗu shi ko u poloo ɗu atsuva shi. 46 A̱yi ɗa i zuwai i yuwain rana a̱bunda̱ Kadesh, cine i yuwain ɗe.>>