1 Reve azagbain o ugundo wa Giliyadu ulobo wa Maki, ulobo wa Manase, a̱za̱ o ugundo wu umatsun wa̱ Isuhu, a̱ ta̱wa̱ a yuwan adanshi a̱ ma̱ka̱ka̱n ma Musa na azagbain a 'wa va aza a Isra'ila. 2 A damma, <<A̱sulazuva a damma wu ta̱ zagbain tsu vu ne'eshen aza a Isra'ila iɗa agadu na̱ mazuwa ma agita. U zuwa wu ta̱ vu ca esheli a Zelofeha agadu a mawun ma̱ a̱na̱wun ma̱ tsu. 3 Amma no o olo ta̱ ali a̱tsuma̱ o gundo ro va aza a Isra'ila, to, reve a tara agadu a na a ca nle diga a agadu a nkaya n tsu o ɓolo na agadu o ugundo u na o oloi. Ne ɗa ee kene a̱tsuma̱ a agadu a̱ tsu. 4 Reve mantsa ma na A'wan a̱ A̱buki o uka̱mbusa̱ fa̱a̱n va aza a Isra'ila a̱ ka̱nda̱ruwa̱i, o to ɓolo agadu e le na agadu o ugundo u na oloi, reve a tara itana i le diga a agadu o ugundo wu nkaya n tsu.>> 5 Ɗaɗa Musa zuwai ama a Isra'ila o udammu wa̱ A̱sulazuva u damma: <<Ili i na ugundo wu umatsun wa̱ Isuhu u dammai mejege ma ɗa. 6 Apa nda ili i na A̱sulazuva a dammai o una̱ we esheli a Zelofeha, <Lyawa nle o olo za na a cigai o olo suru, amma wo o'wo a̱tsuma̱ o ugundo wu nkaya n le. 7 Aa vadala agadu a aza a Isra'ila diga o ugundo u ro a̱ tyo o ugundo u ro shi, adama a na za va Isra'ila suru ta̱ guza̱ agadu a nkaya ma̱ yi. 8 Usheli u na suru u lyuwai agadu a̱tsuma̱ o ugundo wa aza a Isra'ila biti nu u ciga u 'yuwan wo olo a̱tsuma̱ o ugundo wu nkaya ma̱ yi, adama za va Isra'ila suru u lyuwa agadu a nkaya ma̱ yi. 9 Ne ɗa aa tara agadu a̱ tyo a agadu o ro shi, adama a na ugundo wa Isra'ila biti u ta̱ guza̱ agadu a̱ yi.> >> 10 Reve esheli a Zelofeha a yuwan cine A̱sulazuva a dammai Musa. 11 Adama a na Mala na̱ Tiriza na̱ Hogula na̱ Milika, na̱ Nowa, suru nle o olo ta̱ olobo a̱ muwun ma̱ a̱na̱wun ma dada le. 12 O olo ta̱ a̱tsuma̱ o gundo vu umatsun wa Manase ulobo wa̱ Isuhu. A̱vu agadu e le o o'wo a̱tsuma̱ o umatsun wu ugundo wu nkaya n le. 13 Ele nda ele ɗa ili i na a zuwai ni ili i na aa yuwan i na A̱sulazuva a zuwai o una̱ wa Musa ele uva̱lu a agalaci a̱ Mowa zuzu na̱ Urudu a̱ nka̱la̱la̱i na̱ Jeriko.