1 Ana Balam enei u yo'ono ta̱ A̱sulazuva u zuwaa aza a Isra'ila aba'un, u 'ya̱wa̱ izami ya̱ a̱sa̱la̱ o ro tsu ufaru shi, ɗaɗa u vadalai urewesu wa̱ yi a̱ tyo a̱tsumona. 2 Ana Balam ka̱lyuwa̱i a̱vu we ene aza a Isra'ila uva̱lu gundo gundo, ɗaɗa Ruhu va̱ A̱sula̱ cipa̱a̱ niyi. 3 Reve u yuwan adanshi e ikaka ya̱ A̱sula̱:

<<Adanshi e ikaka ya̱ A̱sula̱ a Balam ulobo wa̱ Beyo,

adanshi e ikaka ya̱ A̱sula̱, yi za na esu a̱ yi e tse ene ulobonu lon.

4 Adanshi e ikaka ya̱ A̱sula̱, yi za na tsu uwwa adanshi a̱ A̱sula̱,

za na tse ene alavu alavu uba̱ta̱ u Mogono me Ili Suru,

za na tsu riya̱ ma̱kpa̱ɓa̱ waru esu a̱ yi a̱ ri ukpa̱tu'u.

5 Yakubu ogodo a̱ ɗu a̱ tu ulobonu,

uba̱ta̱ wu nden n ɗu aza a Isra'ila!

6 A̱ tu ugeru cine vu revei a̱rumbu a ɗanga vu shuwa

ko tsa̱ a̱rumbu a na a̱ ri zuzu nu uɗolu,

cine vu revei ɗanga na a̱ tsu ɗe aliyo na A̱sula̱ a̱ shuwa̱i,

ko ɗanga vu ugbamu na a̱ tsu ɗe sida zuzu na̱ mini.

7 A̱ ta̱ tsura̱ iro'i ya̱ a̱bunda̱,

icu'un i le i ta̱ tsura̱ mini pere.

Mogono me le ma ta la'a Aga tsugbain,

a ta ca tsugono tsa̱ yi tsugbain lon.

8 A̱sula̱ o uta̱a̱ le ta̱ a̱tsuma̱ a Masar.

U ta̱ nu ucira u yanci.

O to kototo iɗa i na i ri usuɗuwu,

a̱vu a kuɗa etele e le,

a̱vu waru a sapa le na aya e le.

9 A̱ tsu ka̱ta̱pa̱ ta̱ a̱vu o von tsu kamu,

na̱ tsu kamu vu ka, zane ɗa a kawan 'ya̱sa̱n le?

Lyawa aza a na a zuwaa nuwu aba'un a̱ da̱na̱ na aba'un,

aza a na waru a yuwaan nuwu una̱, una̱ u toni le!>>

10 A̱vu Balak yuwan upan na̱ Balam a̱bunda̱ lon. A̱vu u luma akatsu reve u damma, <<N ɗe wu ta̱ adama vu yuwaan n'yuwatan n va̱ una̱, agba reve vu zuwaa le aba'un toto uta'atsu. 11 Gogo she vu ka̱ra̱ a̱ ka̱mba̱ o u'wa! N damma wu ta̱ n ta tsupa wu ulobonu, amma A̱sulazuva a putsa wu ta̱ a̱ tsura̱ iliyinkapa ya̱ wu.>>

12 A̱vu Balam usu Balak, <<N damma agbashi a na vu lyunguyi ya̱'a̱ va̱ shi? 13 <Ko na̱ shi Balak aa ca mu ukobu wa̱ yi tapu na̱ azurufa na̱ zinariya, maa yuwan ili nu ucira u va̱ shi, ili yu ulobonu ko ili yu uwuyanu, n fele ili i na A̱sulazuva a dammai, n ciga n 'yuwan n damma ili i na A̱sulazuva a dammai goon shi?> 14 Gogo n ta̱ ka̱mba̱ uba̱ta̱ wa ama a̱ va̱, amma ta̱wa̱, lyawa n rono wu atsuvu e ili i na ama a nda a̱ ta̱wa̱ a yuwan na ama a̱ wu a mantsa ma na ma̱a̱ ta̱wa̱.>>

15 A̱vu u damma adanshi e ikaka ya̱ A̱sula̱ ya̱ yi:

<<Adanshi e ikaka ya̱ A̱sula̱ ya Balam ulobo wa̱ Beyo,

adanshi e ikaka ya̱ A̱sula̱, yi za na esu a̱ yi e eneshe ulobonu lon,

16 adanshi e ikaka ya̱ A̱sula̱, yi za na a uwwusa adanshi a̱ A̱sula̱,

za na ri nu urevu e ekere o Mogono ma̱ A̱sula̱,

za na tse ene alavu alavu e ekere o Mogono me Ili Suru,

za na tsu von ma̱kpa̱ɓa̱, waru za na esu a̱ yi a̱ ri ukpa̱tu'u.

17 Me ene yi ta̱, agba gogo ɗa shi,

n cinkaya yi ta̱ agba zuzu ɗa shi.

Talyo'o to uta̱ a̱tsuma̱ a Yakubu,

aɗanga a tsugbain a̱ to uta̱ a̱tsuma̱ a Isra'ila.

U to kototo icin ya̱ a̱za̱ a̱ Mowa,

okoluwo a̱ muwun mo olobo ma̱ Shitu.

18 A ta lyuwa Edom nu uvon,

waru a ta lyuwa Seyi n'yuwatan ma̱ yi nu uvon,

amma aza a Isra'ila a̱ ta̱ da̱na̱ nu ucira.

19 Za tsugbain to uta̱ a̱tsuma̱ a Yakubu

reve u kototo akapi a ama a na a buwai a̱tsuma̱ a̱ lyuci gbai'in.>>

20 A̱vu Balam ka̱lyuwa̱ aza a Amaleka a̱vu u damma adanshi e ikaka ya̱ A̱sula̱ ya̱ yi:

<<Amaleka ɗa za na da̱na̱i za vu ufaru a̱tsuma̱ a nɗa,

amma o ukosu u to koto suru suru.>>

21 A̱vu we ene aza a Keniya reve u damma adanshi e ikaka ya̱ A̱sula̱ ya̱ yi:

<<Uba̱ta̱ wu nden ma̱ wu u ri na addama shi,

u'wa wa̱ wu u tu ufoɓu a aatali.

22 Na̱ ne suru vu reve ta̱ aza a Keni o to koto,

mantsa ma na Ashu pura̱ nɗu tsugbashi.>>

23 A̱vu waru u yuwan adanshi e ikaka ya̱ A̱sula̱ ya̱ yi:

<<To, zane ɗa aa la'a a mantsa ma na A̱sula̱ aa yuwan ili i nda?

24 Antsun a̱ mini a̱ ta̱ ta̱wa̱ diga a̱ nge'en m mini ma̱ Kitim,

a ta ca aza a Ashu na̱ Eba a̱tsuma̱lima̱,

amma ko ele fo a̱ ta̱ ta̱wa̱ o koto.>>

25 Reve Balam 'yon u ka̱mba̱ a̱ wa̱ta̱, Balak waru u saɓa ure wa̱ yi.