1 Ana aza a Isra'ila a̱ da̱nuyi Shitim, reve ali e teme a yuwusan tsipere na̱ a̱ma̱ci a̱ Mowa, 2 aza a na a banu nle a̱ tyo uba̱ta̱ u kucci va̱ a̱ma̱li e le. Aza a Isra'ila a lyuwa ta̱ kucci'i reve waru a̱ ka̱ɗa̱towa̱ a̱ma̱li a̱ a̱za̱ a̱ Mowa. 3 Ne tsundolo tsa ɗa aza a Isra'ila o ɓoloi aciyele a yuwusaan Ba'al va Peyo a̱ga̱nda̱. Reve A̱sulazuva a yuwan upan ne ele.

4 Reve A̱sulazuva a damma Musa, <<Tara azagbain a ama a na a yuwain ili i nda suru, a̱vu vu una le, a̱vu waru vu uta̱a̱ le a alanga e eteshe nu urana a̱ ma̱ka̱ka̱n ma̱ va̱, adama upan u va̱ a̱ tyo e ekere a aza a Isra'ila u koto.>>

5 Ɗaɗa Musa dammai a̱za̱ o uge'etosu a Isra'ila, <<Za suru a̱tsuma̱ a̱ ɗu wu una ama a̱ yi a na a cayi aciyele a̱ a̱ga̱nda̱ a̱ a̱ma̱li a Ba'al va Peyo.>>

6 Ele lo ɗaɗa vuma ro za va Isra'ila ta̱wa̱i na̱ ka va Midiya a̱tsuma̱ o oogodo a̱ yi e esu a Musa ni iɓolo ya ama a Isra'ila suru a mantsa ma na a̱ da̱na̱i e mesun o una̱ntsu wo Oogodo o Uga'asusan. 7 Mantsa ma na Finiha ulobo wa Eliyaza, ulobo wa Haruna ganu, we enei ili i nda, reve u lyawa iɓolo ya ama'a. Reve u guza̱ ibata o ukere wa̱ yi. 8 A̱vu u toni vuma ndolo, hali a̱ tyo a̱tsuma̱ o oogodo a̱ yi. A̱vu u sapa le ra. Ibata'a yu utula̱i ta̱ lipu vuma'a na̱ ka'a. Ɗaɗa mɓa̱la̱ a aci a aza a Isra'ila n kotoi. 9 Na̱ ne suru aza a na a̱ kuwa̱i na̱ mɓa̱la̱'a̱ a rawa ta̱ ama ukpakukupa ushin nu ukpakukupa una̱shi (24,000).

10 Reve A̱sulazuva a damma Musa, 11 <<Finiha ulobo wa Eliyaza, ulobo wa Haruna ganu, u tawa ta̱ upan u va̱ e ekere a aza a Isra'ila, adama a na u ta̱ ni icigi ya amayun i va̱ a̱tsuma̱ e le. A̱yi ɗa i zuwai n kototoi aza a Isra'ila shi. 12 Adama o ndolo damma yi n ta yuwusan akucunu a asuvu a̱ nden na̱ a̱yi. 13 A̱yi oɓolo nu ugundo wa̱ yi, akucunu a nan ganu a̱ ta̱ da̱na̱ le lo babu ukotu, adama a na u ta̱ ni icigi ya amayun a na waa ca A̱sula̱ a̱ yi tsugbain, u tara ta̱ ume wu unusu wa aza a Isra'ila.>>

14 Aala a vuma va Isra'ila na o unai na̱ ka va Midiya a̱yi ɗa Zimri ulobo wa Salu, zagbain o ugundo wa Saminu. 15 Aala a ka'a gba a̱yi ɗa Kozibi usheli wa̱ Zur, vuma na da̱na̱i zagbain o ugundo wa aza a Midiya.

16 Reve A̱sulazuva a damma Musa, 17 <<I riya̱a̱ aza a Midiya nu uvon i kototo le. 18 Adama a na a yuwan ta̱ na̱ a̱ɗu cine vu revei n'yuwatan ana a̱ luma̱ nɗu e itoni ya Peyo na̱ Kozibi mawun ma̱ a̱na̱wun me ele mo usheli, usheli wu zagbain va aza a Midiya, ka na o unai adama a mantsa ma na mɓa̱la̱ n ta̱wa̱i adama a na a yuwayin Ba'al Peyo a̱ga̱nda̱.>>