1 Reve aza a Isra'ila a̱ ka̱ra̱ a̱ tyo a agalaci a̱ Mowa, reve a̱ va̱la̱ mavada ma̱ Urudu a̱ nka̱la̱la̱i na̱ Jeriko.

2 Balak ulobo wa Zipo we ene ta̱ ili i na aza a Isra'ila a yuwain na aza a Amoriya suru. 3 Reve Mowa uwwa wovon lon adama a na ama'a a̱ da̱na̱ ta̱ a̱bunda̱ lon. Amayun Mowa shiwan ta̱ na̱ wovon adama a aza a Isra'ila.

4 Reve a̱za̱ a̱ Mowa a damma azagbain a Midiya, <<Ama a̱ a̱bunda̱ a nda e te peɗe ili suru a̱ka̱nda̱ruwa̱ tsu, cine nan tsu peɗe anlya a atsusa.>> Adama o ndolo a ɗa Balak ulobo wa Zipo, za na shi mogono ma̱ Mowa a mantsa'a, 5 u lyunguyi nlingata e ɗe Balam ulobo wa̱ Beyo, za na da̱na̱i a Peto zuzu nu Uɗolu'u e iɗa yu umatsun ya̱ yi. Balak damma ta̱, <<Ama o ro o uta̱ ta̱ diga Masar, a̱ ɓa̱ru ta̱ iɗa'a a̱vu a̱ va̱la̱ zuzu na̱ a̱mu. 6 Ta̱wa̱ vu yuwaan ama a nda una̱, adama a na a la'a mu ta̱ ucira. U ta gura o'wo a̱vu n lyuwa le nu uvon, a̱vu n gba̱ra̱ le a̱tsuma̱ e iɗa'a. Adama a na n reve ta̱ aza a na vu zuwayi aba'un suru o tso o'wo ta̱ na aba'un, aza a na vu yuwayin una̱ waru u tsu reme le ta̱.>>

7 Azagbain a̱ Mowa na̱ Midiya a̱ ka̱ra̱ ta̱, a tara ikebe adama a̱ yindi. Ana a rawai uba̱ta̱ wa Balam, a̱vu a̱ ka̱mbuwa̱ yi ili i na Balak dammai.

8 Reve u damma le, <<Asai pa, n ta̱wa̱a̱ ɗu nu u'usuwu u na A̱sulazuva aa ca numu.>> Ɗaɗa azagbain a̱ Mowa e isawain oɓolo na̱ Balam.

9 Reve A̱sula̱ a̱ ta̱wa̱ ya Balam a̱vu we ece, <<Nan zane ɗa ama a nda a na a̱ ri oɓolo na̱ a̱vu'u?>>

10 A̱vu Balam damma A̱sula̱, <<Balak ulobo wa Zipo, mogono ma̱ Mowa ma̱ lyunguwa̱ mu ta̱ ni ikaka i nda: 11 <Ka̱lyuwa̱, a̱yi ɗa nda ama a na o uta̱i diga Masar a̱ ɓa̱ru ta̱ iɗa suru. Vu ta̱wa̱ gogo vu yuwaan mu ele una̱. Kila n ta gura yuwan uvon ne ele a̱vu m gba̱ra̱ le o uta̱.> >>

12 A̱vu gba A̱sulazuva a damma Balam, <<She vu kuru le wan. She vu yuwaan ama o ndolo una̱ wan, adama a na n zuwaa le ta̱ aba'un.>> 13 Ana usana u tawai reve Balam 'yon reve u damma azagbain a Balak, <<Ka̱mba̱i e iɗa i ɗu, adama a na A̱sulazuva a putsa mu ta̱ n kuru ɗu wan.>>

14 Adama o ndolo reve azagbain a̱ Mowa a̱ 'yon reve a̱ ka̱ra̱ a̱ ka̱mba̱ ya Balak a̱vu a damma, <<Balam 'yuwan ta̱ a̱ kuru tsu a̱ ta̱wa̱.>>

15 Reve Balak lyunguwisa̱ azagbain o ro, aza a na a la'ai a̱za̱ o ufaru a̱bunda̱ na̱ tsugbain. 16 Ana a̱ ta̱wa̱i uba̱ta̱ wa Balam, reve a damma yi: <<Apa ili i na Balak mawun ma Zipo ma dammai, <She vu lyawa ili i ro i geshe wu a̱ ta̱wa̱ ya̱'a̱ va̱ wan. 17 N ta tsupa wu ulobonu, waru n ta yuwan ili i na vu dammai suru. Vu ta̱wa̱ vu yuwaan mu ama a nda una̱.> >>

18 Amma a̱vu Balam usu le, <<Ko na̱ shi Balak aa ca mu ukobu wa̱ yi tapu na̱ azurufa na̱ zinariya, maa yuwan ko ili gbain ko ili i ke'en n fele ili i na A̱sulazuva A̱sula̱ a̱ va̱ a zuwa numu n yuwan shi. 19 Ya asa pa na ayin a nda, cine ama a̱ ndeɗe a yuwain, a̱mu n ta̱ bunga̱ mu uwwa ili i na waru A̱sulazuva aa damma mu.>>

20 A̱tsuma̱ a ayin o ndolo, reve A̱sula̱ a̱ ta̱wa̱ ya Balam reve u damma yi, <<Ana wo o'woi ama a nda a̱ ta̱wa̱ ta̱ tsa̱ra̱ a tara wu vu 'ya̱wa̱ oɓolo ne ele, vu 'yon vu kuru le, amma ili i na n damma nuwu ɗa goon vaa yuwan.>>

21 Ana usana u tawai, reve Balam 'yon u zuwaa mololi ma̱ yi urutsu, reve u kuru azagbain a̱ Mowa. 22 Ana u ka̱ra̱i, reve A̱sula̱ a uwwa upan lon. Reve malingata ma̱ A̱sulazuva me isawan o ure tsa̱ra̱ u geshe yi. Balam shi ta̱ ukumbu o mololi ma̱ yi, waru agbashi e re a̱ yi a̱ da̱na̱ ta̱ oɓolo na̱ a̱yi. 23 Ana mololi ma Balam me enei malingata ma̱ A̱sulazuva mishin o ure na̱ matsun me pe'eni utalu o ukere wa̱ yi, reve u lyawa ure u uwa o ogozo. Reve Balam faba yi adama u ka̱mba̱to yi o ure.

24 A̱vu malingata ma̱ A̱sulazuva'a ma̱ ta̱wa̱ me isawan o ure uba̱ta̱ wu uɓoru e memere ma̱ a̱ɗuma̱ a̱ ina̱bi e eɓele ra ra ra. 25 Ana mololi me enei malingata'a, reve u raɓato a̱ tyo nu uɓaɓu, reve u gbara anana a Balam o uɓaɓu. A̱vu Balam fabisa yi.

26 Reve malingata ma̱ A̱sulazuva ma̱ da̱shi wala elime. A̱vu wi isawan uba̱ta̱ wu ugbagbalu u na a̱a̱ tsura̱ ure u na aa ɓatsa a̱ mɓa̱nga̱ a̱ tyo wu usa'ani ko ugula̱ shi. 27 A mantsa ma na mololi'i me enei malingata'a, reve u von. A̱vu Balam uwwa upan lon, reve u fabisa yi na aaɗanga a̱ yi. 28 Ɗaɗa A̱sulazuva a kpa̱tu'wa̱i una̱ u mololi'i, a̱vu we ece Balam, <<Nye n yuwaan nuwu a na vu faba numu hali toto uta'atsu?>>

29 Reve Balam usu mololi'i, <<Vu ka̱mbuwa̱ mu tu ulo! A damma n shi ta̱ na̱ matsun me pe'eni o ukere u va̱, n shi ta̱ o una wu gogo nda.>>

30 Reve mololi'i ma damma Balam, <<A̱mu mololi ma̱ wu ma ɗa shi, za na vaa kumbusa kucci hali a̱ tyo ana'an shi? N tsu yuwaan wu ta̱ cu'un vi ili i nda?>>

A̱vu u usu, <<O'o.>>

31 A̱vu A̱sulazuva a̱ kpa̱tu'wa̱ esu a Balam we ene malingata ma̱ A̱sulazuva mishin o ure na̱ matsun me pe'eni utalu. Reve Balam kingyo u von ma̱kpa̱ɓa̱.

32 A̱vu malingata'a me ece yi, <<Nye i zuwai vu fabai mololi ma̱ wu hali toto uta'atsu? N ta̱wa̱ ta̱ adama n tiga̱ wu ure, adama a na ili i na vu ri e ifoɓi vu yuwan u lobono e ekere a̱ va̱ shi. 33 Mololi'i we ene mu ta̱ ɗaɗa u ɓatsaa numu toto uta'atsu. Na̱ shi u ɓatsa shi, n shi to una wu, a̱vu a̱yi gba n lyawa yi wuma.>>

34 Reve Balam damma malingata'a, <<N yuwan ta̱ unusu. N reve a na a̱vu ɗa vu ri mishin o ure adama vu tiga̱ mu shi. Na̱ vu ciga n 'ya̱wa̱ shi, n ta̱ ka̱mba̱.>>

35 Reve malingata'a ma damma Balam, <<Kuru ama a nda agba ili i na n damma nuwu ɗa goon vaa damma.>> Ɗaɗa Balam ka̱ra̱i oɓolo na azagbain a Balak.

36 A mantsa ma na Balak uwwai a na Balam ta̱ lo a̱ ta̱wa̱, reve u ka̱ra̱ o uta̱ adama a na waa ga'aton yi ɗe Mowa o utyo wa Anon, o ukosu wi iɗa ya̱ yi. 37 Reve Balak damma Balam, <<N lyunguwa̱ wu vu ta̱wa̱ shi? Nye i zuwai vu ta̱wa̱i shi she gogo? Vu te inda gashi maa gura tsupa wu shi?>>

38 Reve Balam usu, <<A̱mu ɗa nda n ta̱wa̱i uba̱ta̱ wa̱ wu gogo. Agba n ta̱ nu ucira u na maa gura damma ili i ro? She ili i na A̱sula̱ a zuwai o una̱ u va̱.>>

39 Reve Balam kuru Balak a̱ tyo Kiriya Huzo. 40 Reve Balak ca kucci vi inan ni ikyon, a̱vu u ca Balam akunda e inama na azagbain a na a̱ shi oɓolo na̱ a̱yi. 41 Ana usana u tawai a̱vu Balak tara Balam u gawan na̱ a̱yi a̱ tyo Bamo Ba'al, reve diga lo we ene akapi a ama a Isra'ila.