1 Ama a̱ Roben na̱ Gadu gba aza a na a̱ shi no oɓolo e inan ni ikyon na̱ mgbele na̱ a̱bunda̱ lon, e ene ta̱ iɗa ya Jaza na̱ Giliyadu uba̱ta̱ u sa'ani u ɗa adama e iliyamunga. 2 Adama o ndolo a̱vu a̱ 'ya̱wa̱ ya Musa na̱ Eliyaza ganu na azagbain a ama a Isra'ila, a̱vu a damma, 3 <<Ataro na̱ Dibon na̱ Jaza na̱ Nimra na̱ Heshibon na̱ Eliyale na̱ Sibma na̱ Nebo na̱ Beyon, 4 iɗa i na A̱sulazuva a lyuwai nu uvon a̱ ma̱ka̱ka̱n ma ama a Isra'ila, u tu ulobonu adama e iliyamunga. Waru agbashi a̱ wu a̱ ta̱ ni iliyamunga ya̱ a̱bunda̱.>> 5 A̱vu a damma, <<Na̱ tsu tsura̱ isa'ani e ekere a̱ wu, lyawa a ca agbashi a̱ wu iɗa i nda, wo o'wo tsu za va agadu. She vu zuwa tsu tsu pasa mavada ma̱ Urudu wan.>>

6 Amma Musa usu ta̱ ama a Roben na ama a Gadu u damma, <<I ciga ta̱ a̱za̱ a̱ ɗu a̱ 'ya̱wusa̱ uvon, a̱ɗu gba i da̱nu ili i ɗu ko? 7 Adama a̱ nye ya kuɗa okolo a ama a Isra'ila a pasa a̱ 'ya̱wa̱ e iɗa i na A̱sulazuva a ca nle? 8 Ne ɗa nkaya n ɗu n yuwain mantsa ma na n lyungu nle diga Kadesh Baniya a̱ ka̱lyuwa̱ iɗa'a. 9 Mantsa ma na a̱ 'ya̱wa̱i o uka̱ri wa Eshiko e enei iɗa'a, a̱vu a kuɗa okolo a ama a Isra'ila na a uwa pe e iɗa i na A̱sulazuva a ca nle. 10 Reve A̱sulazuva a yuwan upan urana u ndolo, a̱vu u yuwan akucunu a nda: 11 <Adama a na a̱ kuru numu no okolo a̱ ta̱ shi, ko vuma ta̱ a̱tsuma̱ a ama za na ri na a'wan ushin a̱ 'ya̱wa̱ elime, aza a na o uta̱ diga Masar ee ene iɗa i na n kucinayi na maa ca Ibrahim na̱ Ishiyaku Yakubu shi. 12 Babu za ro na a uwa she Keleb ulobo wa̱ Jefune vuma va Keniziya, na̱ Josuwa ulobo wa̱ Nun, adama a na ele ɗa goon a̱ kuruyi A̱sulazuva no okolo a̱ ta̱.> 13 A̱sulazuva a yuwan ta̱ upan na aza a Isra'ila lon, a̱vu u zuwa le e reme igaru a̱tsumona a'wan amunga. Hali she na mantsa ma aza a na a yuwain iwuya e esu a̱ A̱sulazuva mo kotoi.

14 <<A̱ɗu ɗa nda gba, umatsun wa̱ a̱za̱ o unusu, u na i ri o una̱ wu nkaya n ɗu, a zuwusa A̱sulazuva a̱ da̱shi yuwusan upan lon na aza a Isra'ila. 15 Ni i kuɗa̱ a̱ kuru yi, u ta da̱shi lyawa ama a nda a̱tsumona. A̱ɗu ɗa gba yoo o'wo ili i na i ta̱wa̱yi nu ukwa̱.>>

16 A̱vu a rawa zuzu na̱ Musa a damma, <<Tsu ta ciga tsu suwaa iliyamunga i tsu uva̱la̱ta̱ pa, ni ilyuci adama a̱ a̱ma̱ci na̱ muwun n tsu. 17 A̱ma̱ci a̱ tsu na̱ muwun n tsu a̱ ta̱ da̱nu e ilyuci gbagbain i na i ri uka̱nda̱ruwu na̱ kari, adama e megeshe e ekere a̱ a̱za̱ e iɗa'a. Amma a̱tsu tsu tu ufoɓu u na tsaa tara itana yu uvon i tsu a̱vu tsu lyuwa elime a̱ a̱za̱ a̱ tsu aza a Isra'ila, hali she na̱ tsu 'ya̱wa̱ ne ele uba̱ta̱ u le. 18 A̱tsu gba tsa̱a̱ ka̱mba̱ a 'wa tsu shi, she mantsa ma na za va Isra'ila suru tsura̱i agadu a̱ yi. 19 Tsa̱a̱ ushi agadu oɓolo ne ele ɗe mavada ma̱ Urudu shi, adama a na tsu tsura̱ ta̱ ɗe agadu a̱ tsu upasu wa asana a̱ Urudu.>>

20 A̱vu Musa damma le, <<Na̱ yaa yuwan ne, i foɓo aciya̱ɗu i 'ya̱wa̱ uvon a̱ ma̱ka̱ka̱n ma̱ A̱sulazuva, 21 waru na̱ suru nɗu i ta̱ 'ya̱wa̱ ufoɓu mavada ma̱ Urudu a̱ ma̱ka̱ka̱n ma̱ A̱sulazuva hali she nu u gba̱ra̱ n'yuwatan ma̱ yi a̱ ma̱ka̱ka̱n ma̱ yi, 22 ɗaɗa a mantsa ma na iɗa'a yo o'woi za va̱ A̱sulazuva, reve i ka̱mba̱ a̱vu yoo o'wo fa̱a̱n o ulinga u ɗu u na i yuwayin A̱sulazuva A̱sula̱ a̱ ɗu nzuwulai na ama a Isra'ila. Iɗa i nda gba i to o'wo za ɗu a̱ ma̱ka̱ka̱n ma̱ A̱sulazuva.

23 <<Amma ni i kuɗa̱ a yuwan ne, i ta yuwaan A̱sulazuva unusu, waru i reve unusu u ɗu u te reme ɗu. 24 I suwaa a̱ma̱ci a̱ ɗu na̱ muwun n ɗu ilyuci, nu uva̱la̱ta̱ adama e ikyon i ɗu. Amma i yuwan ili i na i yuwain nzuwulai.>>

25 A̱vu ama a Gadu na̱ a̱za̱ a̱ Roben a damma Musa, <<A̱tsu agbashi a̱ wu tsu ta yuwan cine zagbain tsu dammai. 26 Muwun n tsu na̱ a̱ma̱ci a̱ tsu, ikyon i tsu ni inan i tsu a̱ ta̱ da̱na̱ pa e ilyuci ya Giliyadu. 27 Amma agbashi a̱ wu, vali suru na ri ufoɓu adama o uvon u ta pasa mavada u yuwan uvon a̱ ma̱ka̱ka̱n ma̱ A̱sulazuva, cine zagbain tsu dammai.>>

28 A̱vu Musa rono Eliyaza ganu, na̱ Josuwa ulobo wa̱ Nun na azagbain a 'wa vu gundo va aza a Isra'ila atsuvu. 29 A̱vu u damma le, <<Na ama a Gadu na̱ Roben, vuma na suru ri ufoɓu adama o uvon, u pasa mavada ma̱ Urudu oɓolo na̱ a̱ɗu a̱ ma̱ka̱ka̱n ma̱ A̱sulazuva, na a lyuwa iɗa'a i ca le iɗa ya aza a Giliyadu wo o'wo za le. 30 Agba na a pasa oɓolo na̱ a̱ɗu ufoɓu shi, na a ciga a 'yuwan a̱ ushi agadu e le oɓolo na̱ a̱ɗu a̱tsuma̱ a Ka'ana.>>

31 Reve aza a Gadu na aza a Roben a̱ usu, <<Agbashi a̱ wu a ta yuwan ili i na A̱sulazuva a dammai. 32 Tsu ta pasa mavada a̱ ma̱ka̱ka̱n ma̱ A̱sulazuva a uwa a̱tsuma̱ e iɗa ya Ka'ana ufoɓu. Amma itana ya agadu i na tsu tsura̱i o to o'wo pa a̱ mɓa̱nga̱ ma̱ Urudu n nda.>>

33 A̱vu Musa ca ama a Gadu na ama a̱ Roben, nu uɓatsulai wu ugundo wa Manase ulobo wa̱ Isuhu upasu u tsugono tsa Sihon mogono ma aza a Amoriya, na̱ tsugono tso Og mogono ma Bashan, nɗa'a suru ni ilyuci i gbagbain i le suru.

34 A̱vu ama a Gadu a suwisa lyuci va Dibon na̱ Ataro na̱ Arowa, 35 na̱ Ataro Shofan, na̱ Jaza na̱ Yogbeha, 36 na̱ Bet Nimra na̱ Bet Haran, oo o'wo ilyuci i gbagbain i na i ri uka̱nda̱ruwu na̱ kari. A̱vu waru a suwaa ikyon i le va̱la̱ta̱. 37 A̱vu ama a Roben a suwisa lyuci va Heshibon na̱ Eliyale na̱ Kiriyatayim, 38 oɓolo na̱ Nebo na̱ Ba'al Meyo, a vadala ta̱ ala a nda na̱ Sibima. A̱vu a ca ilyuci i na a suwisai'i ala o ro.

39 A̱vu umatsun wa Maki mawun ma Manase a̱ 'ya̱wa̱ Giliyadu, a̱vu a lyuwa yi nu uvon, a̱vu a̱ gba̱ra̱ aza a Amoriya a na a̱ da̱na̱i pe. 40 A̱vu Musa ca ama a Maki umatsun wa Manase Giliyadu, a̱vu a̱ da̱nu pe. 41 Jayi umatsun wa Manase u lyuwa ta̱ mulyuci n le a̱vu u ɗe le Havot Jayi. 42 A̱vu Noba lyuwa Kena na̱ mulyuci ma̱ yi a̱ ka̱nda̱ruwa̱, a̱vu u ca yi ala Noba o una̱ wa ala a̱ yi.