1 A̱sulazuva a yuwan ta̱ adanshi na̱ Musa u damma, 2 Yuwan adanshi na aza a Isra'ila vu damma le, <<Na̱ vali ko ka tara akucunu a̱ la̱nga̱, akucunu a na waa tawa aciya̱yi adama u ca aciya̱yi e ekere a̱ A̱sulazuva, 3 she u sowo masayan ma̱ ina̱bi wan ni ili yo oso i na i tsu tsura̱to wan. She u sowo masayan ma̱ ina̱bi ma alamu ko ili yo oso i na a yuwain na̱ limatan ina̱bi wan. She u lyuwa limatan ina̱bi vu uta̱nu ko a̱za̱ o u'yewu wan. 4 Mantsa ma na u tawai aciya̱yi suru, waa lyuwa ko ili i na a yuwain wa ataci a̱ ina̱bi shi, ko vi icu'un ko wa aputsu.

5 <<Suru mantsa ma akucunu ma na u tawai aciya̱yi, ko utanu wa̱a̱ ju'wa̱n aaci a̱ yi shi. U ta̱ da̱na̱ na akiza hali she na̱ mantsa ma matawa ma̱ yi a̱ tyo e ekere a̱ A̱sulazuva mo koto. A mantsa'a u ta lyawa a̱nji a̱ yi a yuwan uga'an. 6 Suru mantsa ma matawa ma̱ yi a̱ tyo e ekere a̱ A̱sulazuva, waa rawa zuzu na̱ a̱kwa̱kwa̱ shi. 7 Woo o'woto aciya̱yi idaba adama a aza a na a̱ kuwa̱i shi ko na̱ shi dada va̱ yi ɗa ko mma va̱ yi ɗa kuwa̱i ko mawun ma̱ a̱na̱wun ma̱ yi mo ulobo ko vu usheli, adama a na u ta̱ nu urotsu u na a tawa niyi a̱ tyo e ekere a̱ A̱sulazuva a aaci a̱ yi. 8 A mantsa ma matawa ma̱ yi suru u ta̱ da̱na̱ na akiza uba̱ta̱ wa̱ A̱sulazuva.

9 <<Na̱ za ro kuwa̱ uragazu zuzu na̱ a̱yi, to, a̱nji a aaci a̱ yi a na a tawai o o'wo ta̱ idaba, u ta puna a̱nji a̱ yi o urana we cindere urana wu usumbu wa̱ yi. 10 Reve o urana wa̱ kunla̱ u ta̱wa̱ na̱ muwun m muɗa n re ko nrukuku n re ya ganu o una̱ntsu wo Oogodo o Uga'asusan. 11 Reve ganu ca za ta̱ kucci vu unusu za ve ire waru kucci vu ukula̱tosu, u yuwan kucci matara mo ume mo unusu adama a̱ yi, adama a na u yuwan ta̱ unusu a na u ri zuzu na̱ a̱a̱kwa̱kwa̱. O urana u ndolo gan u ta tawisa aciya̱yi. 12 U ta tawisa aciya̱yi a̱ tyo e ekere a̱ A̱sulazuva una̱ta̱ na̱ mantsa ma na u shi u tawai aciya̱yi. Reve u ta̱wa̱a̱ na̱ ma̱giri'i ma aa'wan a̱ ta̱ nu umatsun adama a̱ kucci makuɗa ma̱ wila̱. Ee kece mantsa ma na ma̱ ka̱ra̱i shi, adama a na wo o'wo ta̱ idaba a̱tsuma̱ a mantsa ma matawa ma̱ yi.

13 <<Apa nda wila̱ adama a Za na a Tawai na̱ mantsa ma matawa ma̱ yi mo koto. A̱ ta̱ ta̱wa̱ na̱ a̱yi o una̱ntsu wo Oogodo o Uga'asusan. 14 Ɗe ɗa waa ca A̱sulazuva kucci va̱ yi, ma̱giri'i ma̱ ta̱ ma aa'wan a̱ ta̱ nu umatsun za na ri usa̱du shi adama a̱ kucci vu ukula̱tosu na̱ mokyokyon ma̱ ta̱ ma aa'wan a̱ ta̱ nu umatsun za na ri usa̱du shi adama a̱ kucci vu unusu, na̱ a̱a̱giri'i a̱ ta̱ za na ri usa̱du shi adama a̱ kucci muwwulai, 15 oɓolo na aasaka a̱ ta̱ o opopofu a na a̱ ri na̱ wolilo shi, na akala a yira i lashi i na a̱ ja̱mba̱ra̱i na̱ mani'in ne emeshen a na a putalai mani'in, oɓolo na̱ kucci vi ishina le na̱ kucci vi ili yo oso le.

16 <<Ganu ta̱ ta̱wa̱ ne ele uba̱ta̱ wa̱ A̱sulazuva reve u ca kucci vu unusu na̱ kucci vu ukula̱tosu. 17 Reve waru u ca kucci muwwulai va̱ a̱a̱giri'i oɓolo na aasaka o opopofu a na a̱ ri na̱ wolilo shi. Waru u ta ca kucci vi ishina na̱ kucci vi ili yo oso.

18 <<Reve za na a tawai'i u puna a̱nji a aaci a̱ yi o una̱ntsu wo Oogodo o Uga'asusan. Reve u tara a̱nji a aaci a na u tawai'i u tsun le a akina a na a̱ ri za̱la̱ kucci muwwulai.

19 <<Reve ganu tara anana e elime a̱ a̱a̱giri'i a na a su'wain no oopopofu a̱ ta̱ a na a̱ ri na̱ wolilo shi ne emeshen a̱ ta̱ a na a̱ ri na̱ wolilo shi. A̱vu u zuwa le e ekere a za a na a tawai, cina u puna a̱nji a matawa ma̱ yi. 20 Reve ganu 'ya̱sa̱n le a̱ ma̱ka̱ka̱n ma̱ A̱sulazuva kucci vu u'ya̱susa̱n. Akunda a akiza a ɗa waru akunda a ganu a ɗa, oɓolo na̱ ma̱ka̱ka̱n ma na a̱ 'ya̱sa̱in na aagutsu a na a̱ ta̱wa̱yi. No o koto, reve za na a tawai'i u ta gura sowo masayan ma̱ inabi.

21 <<A̱yi nda a̱yi ɗa wila̱ wu za na tawai aciya̱yi za na yuwain akucunu na waa tawa aciya̱yi a̱ tyo e ekere a̱ A̱sulazuva, nu uda̱shiyi wi ili i na waa gura ca. U to shiton akucunu a na u yuwain a̱ wila̱ wu za na a tawai.>>

22 A̱sulazuva a yuwan ta̱ adanshi na̱ Musa u damma, 23 <<Damma Haruna no olobo a̱ yi, apa nda cine yaa zuwaa aza a Isra'ila aba'un. I damma le,

24 <<Lyawa A̱sulazuva aa zuwaa ɗu aba'un,

waru u yuwaan ɗu mapari.

25 Lyawa A̱sulazuva a zuwa urewesu wa̱ yi wi ikana ɗu,

waru u roco ɗu isa'ani.

26 Lyawa A̱sulazuva a vadala urewesu wa̱ yi ya̱'a̱ ɗu,

waru u ca ɗu asuvu nden.

27 <<Na̱ Haruna no olobo a̱ yi a zuwaa aza a Isra'ila aba'un na ala a̱ va̱, a̱mu gba n ta zuwaa le aba'un.>>